انشدك ياللي تفتل الراي للريب

أنشدك ياللّي تفتل الراي للريب
نقّاض فتْل اللّي عقدها صعيبه

من غير لايعلم حكيم الطّلاليب
له منك رفع المستوى بالغليبه

لي بالوفا رمز الفخر مع هل الطيب
ليا قلت عنك بماقفٍ ماحكي به

من فكرتك زدني من العرف بصعيب
سولف وعطني سالفتك المصيبه

يومٍ فكري يلمس الراس ويغيب
هجسٍ يقفّي به وهجسٍ يجي به

بقفايته لاسمع منادي ولاجيب
سوق الهموم ابتاعبه واشتري به

كنّي دريك اللّوح بين المحاديب
ليا طمنّه موج الخضر يعتلي به

إن حدّرنه بين مثل الدغاليب
واليا ارتفع كنّه معدٍّ رقيبه

أنا وهاجوسي كما الغيص والسّيب
درّ البحر من نبت قوعه يجي به

ولياانحدر جوّدت له بالمجاذيب
حبلٍ على عدّ الدبش ما سني به

إلاّ ليا وردوا علينا الأجانيب
على مقام اعدودنا يرتوي به

لامرّنا الطرقي يعاف المشاريب
عدٍّ قراح ووُارده نعتني به

يفرح ليا شانت وجيه المعازيب
وعيّا على مرّ الهماج بقليبه

من لايعرف حقوق الأجواد والطّيب
ماهو بحول الطيب لو يدّعي به

71 views