المعزب يشوف الضيف شين مقاده

أفعل الطيب

المعزب يشوف الضيف شينٍ مقاده
مادرى أنّه يقاسي له همومٍ عديده

من غلاه أستخرت من السّفر للحماده
ماتعدّا الرفيق اللّي علومه حميده

في رضا الطيّب أنقل فوق حملي زياده
يوم ولد الرديّ هيّن ظروفي يكيده

أقدر الصبر لو أنّي فقدت السعاده
ماحدٍ جتله الدنيا على مايريده

أقرب النّاس ورّاني حياة الزهاده
موقف الطيب منّي ينقصه مايزيده

زودتي تنقصه والنقص منّي زواده
خاسرٍ منه أنا والمبغضه مستفيده

لاعدوٍّ وأكرّس جهدتي في جهاده
ولا صديقٍ تغيّر غيرته مع عضيده

طاول الهمّ حالي ماتحقق مراده
لافرقنا الممات ولا حياة سعيده

مالقى بالجماعه من يدلّه رشاده
كود ناسٍ تفرّح بالكلام وتزيده

حطّوا الدين عاده والنّميمه عباده
كلّ هافي بخت يظهر خبايث وريده

أسمع الهرج وأسكت كنّ بأذني سداده
كل يوم تردد لي علوم جديده

أفعل الطيب مادوّر وراه أستفاده
نوهتي عن مجمّعة السوالف بعيده

ماتهزهز وأنا لي موقف الطيب عاده
ألف عصفور مايقدر يهز الجريده

الرجا والمخافه من مدبّر عباده
مايهزّون معرفتي ضعافا عبيده

كلٍّ أقرا بوجهه ماضمر لي فؤاده
وأتصوّر على ظنّه بما لايفيده

كم صبي كلامه ماحسب لاقتصاده
لين يبرز هدف لأوّل فشقتن تصيده

مع غروره قرينه للمقادير قاده
موته الموت مهو مثل موت الفقيده

ماجمع بالنّميمه مايغطّي سواده
إن حداني على تطليع شيٍّ ماريده

والله أنّي لامشّيهم على غير عاده
لين أخلّي جليس السّو ينكر قعيده

أجمع الضرم بالصوّان وأقدح زناده
وأحمي النار للمسمار يصفي حديده

كم هياكل حديدٍ تتعود رماده
الحديد الملفّق مايجي له شريده

أتبيّن علن وأخوض حرب الأباده
لين تفهم مدى القوة خباث العقيده

كلّ تسديد ضربه قاضيه في شهاده
زايف الهرج تمحاه العلوم الأكيده

  • ما درى انه يقاسي له هموم عديده فلاح بن مبرد
330 views