زمان الشقاء

[سعد الحميداني]

عـــــلى الله ياحال ٍ نهارين ماهو حال= حبيــــس القلق من حاجة ضيقت بالي
توارد عــــلي أهموم ماكنها الا جبال = لهــا بالصـــدر ياعــــالم الغيب مدهالي
عــــــلومٍ تخلي راجح العقل فيه أهبال= زمان الشقى والمر غطى على الحالي
وانا لابغيت اسج وابعـد عن الازوال = تعلـــــيت في حــــزمٍ من الدايجه خالي
انــــزه جــــنابي عن مقاعيد قيل وقال = وأدور على سلوان قلـــــب ماهو سالي
وشبيّت ضوي ونكسر فـــــوقها فنجال = مســــــويه في يمناي ودلالـــــه أدلالي
علي جالها أهدى واتحيل عساي احتال =على الضيقه الــــلي مالها اول ولاتالي
يداعبني الغربي واهــج الضلوع اكتال =يبرد على صدر شكى جـــذوة الصـــالي
أخايل سحاب بـــــارقه بالدجــى عمال=يعيد الحياء لرضٍ شكت طول الامــحالي
يقولــــون ما يزمل من الكايــــده رجال=وكم كايده حــــطـــــيتــها وقاه لنعــــالي
لكن المـــصيبه لاتردا النصيب ومـــال=وهــزمني زمــــاني لاني أحارب لحـــالي
يكسر طموحي قدم عيني وانا مهـــتال= شـــرات القــــزاز اللي تحدر من العالي
وانا لاذكرت اني عصامي وطـيب فـال = تـــرحمت للـــــي يفرح لــطاري افعالي
وتمر السنين وراعي الذاهـــــبه رحال= يـــدور عسى العقلان فزعه من الوالي