مريت للحقباء ...... قصيدة للشاعر/ ناصر عبيد أبو حواس

[أبن رويل]

هـذه القصيدة للشاعر/ ناصر عبيد أبو حواس عند مروره بقرية الحقباء وهي أحدى هجر الحمادين والتابعة لقربة الثامرية , وقد أمضى الشاعر عدة أيام فى ضيافة أهلها بعدها أنشد هذه القصيدة .



مريت للحقبا بلاد العبيسان=يانعم بالديرة وحيٍ سكنها
ولقيت بالديره طويلين الأيمان=رجالٍ تسلىّ من يجىفي وطنها
وطيب البلد من طيب أهلها ليا كان=فيها رجالٍ تبعد العيب عنها
لا صار بالديرة رياجيل وذهان=كثرت مبانيها وقلّت فتنها
خصٍ اليا صاروا زحازيح وأخوان=والمرجلة شدوا لها في رسنها
واحد يشيل الحمل كـنه بليهان=واحد يخلص مانشب من شطنها
تعاضدوا بالطيب ذربين الأيمان=مشوا مسيرتهم وقادوا ظعنها
فلاح ابو هابس وسيفه عبيسان=كلٍ تلقى المرجلة وأحتضنها
ومعهم بعد حامد وحمدي وحمدان=أولاد عم منجية من زبنها
مريت ديرتهم مع الدرب عجلان=وأخذت فيها أيام مارحت عنها
من كثر مافيها نشامه ورجحان=نفسي بحب الدار ربي فتنها
ياوي من ديرة وياوي سكان=أهل الشيم وأهل القيم في سننها
وأهل صحون فوقها حيل وسمان=ولا سألوا راعي الغنم عن ثمنها
شرايت الهيل الحبش غالي الأثمان=وأهل النجور اللي يطّرب لحنها
ينطحك ريح العود من كل ديوان=العود الأزرق في المجالس دخنها
للضيف وسط بيوتهم دايمٍ شان=يدله وتمضي مدته ماذهنها
دارٍ لها بالمجد مركز وعنوان=وبالقمة العليا رفيعٍ مكنها
عسى تساقيها مراويح الأمزان=غر المزون اللي تنثر غشنها
ويعَّلها من رايح الوبل والدان=من كل قمرة عشر ماكف عنها
ديرة حمادينٍ على العي عيان=هل سربةٍ بالكون يعرف طعنها
يشهد لها يوم اللقا كل ميدان=لا طار من عج السبايا يقنها
ولا ينَّسى رجلٍ يلقب بالأركان=أسمه زهاله والسموة ضمنها
ركنٍ على ماقيل فعلٍ وبرهان=عزالله أنه يوم سمّي تكنها
تلقى بديوانه شبابٍ وشيبان=ومُضافةٍ دايم يقلط صحنها
وحليب خلفاتن مع أذناب خرفان=ماهي كرامة يوم طيلة زمنها
تمت وأحيى للسنافي كحيلان=فلاح لأجل الدار نفسه رهنها

[غريب الدار]

ابن رويل
صح لسان الشاعر بو حواس
والجماعه يستاهلون لانهم كفو واهل لماذكر
وفقك الله

[أبن رويل]

مشكور أخي غريب الدار

لمساتك ملموسه بالمواضيع

ومشاركات رائعه

[تقوى الهجر]

عز الله إنه مأخطــا...................... يوم قالهــا في قافيتـه

تصدق لو ماقالها كان قلتهــا....................


أهل الطيبـــ دائم يذكرون في كل مكــان وفي كل زمــان.......... والمرجلة لها راعيــها

الله ينعم عليهــم بنعمة الإسلام ويستر عليـهم وينور دروبــهم ناس هذي فعايلـــــــــهــا

[أبن رويل]

تقوى الهجر ماعليك زود ياغالي

أعتبرها وصلت :)

[الدويله]

ابن رويل

تسلم اخي على نقل هذه القصيده

شهادتي في تلك الهجره وأهلها مجروحه دائما

كيف لا
وانا ممن تربي تحت تلك التلال التي تحتضنها هذه الهجره

لي ديرةٍ حمر الزباير شماله = وشرقٍ من الحقباء كما قطعت الليل

كيف لا

وانا ممن تربى على يدي أولئك الأفذاذ الذين علا صيتهم بين الرجال
فسطروا ملحمه تاريخية نادره

كيف لا وانا اتذكر قول الشاعر منوخ بن نادر الحميداني


وانا بناخي يارده ورد ويعّل = ولي الشرف فيما تسلسل من رويل