ديوان الشاعر عبيسان بن رويل الحميداني

[أبن رويل]

مجروح روح

قصيدة غزلية لشاعر عبيسان الحميداني


الله من عين لها السهر ينتاب=تسهر اليا نامت عيون العربيا
تسهر وكن أبها من النار ملهاب=جفن جزا عن نومته والتهبيا
صفق عليّه تالي الليل دولاب=دالوب عاصوف الهوى لا ضربيا
دولاب صلفٍ تالي الليل هباب=شعف الشمال اللي هواه أكتربيا
من ضيقة جتني وأنا قبل محطاب=وزاد العنا في ضامري وأنحطبيا
ماهو مرض وعرضه كثر الأطباب=لكن شئٍ بالضماير لعبيا
مضى الأراع بعرض صفحات بكتاب=وعبرت مافي خاطري بالكتبيا
وأخذت لي من صافي القيل هنداب=ونظمت منظوم القوافي على أبيا
وجني أمطيعات جناديب وأسراب=ونظمتهن نظمت أعقود الحصبيا
معلوم ماشي يجي كود بأسباب=مجروح روح ومي كل السببـيا
يامي ماتسقي من المي ماطاب=من ذبلن يامي فيهن عذبيا
من ذبلن فيهن من الذوب ينساب=ألذ من شهد العسل لا نسكبيا
وعيون فيهن سحر هاروت جذاب=سود يغطيهن أضلال الهدبيا
وعليه مجدول كما عقد ذهاب=أشقر كما شرطان عقد الذهبيا
يامن زها جسمه حسينات الأسلاب=سلبت قلب أمولعٍ بك سلبيا
بالبيض مغلوب وبالبيض غلاب=لا شك مي اليوم حبه غلبيا
منها تحملت الشقاوة والأتعاب=أعيش في عيشة نكد وتعبيا
مايوم عن بالي وعن خاطري غاب=هنيت ناس في هواى الغيد غبيا
هذا ولا مسيت له ستر وحجاب=بالشوف وان الشوف ماطفى اللهبيا
محفوف من كل المخاطر والأصعاب=حتى بعد شوفه عليه صعبيا
ناس مراح يمهم دوم ينهاب=بوجيهم تلقى الدها والغضبيا
لو أنهم عندي من الربع الأقراب=جيته وتجبرهم على القربيا
متشربك مابين حاسد وقضاب=وعندك خبر في حاسدا لا غضبيا
مالي رفيق لي على جابتي جاب=ولامن عريبٍ بالعرب يستجبيا
يفزع لمظهود من الحب منصاب=مصيوب في رمح صوابه عطبيا
لو أنها في كثر فزعات وحراب=ربعي سقم عين العدو لا حربيا
ربعي مطير اللي يضدون الأجناب=اللي يفكون النشب والطلبيا
أمطوعت بأيمانها عكف الأشناب=أمطوعت عكفان روس الشنبيا
راح الزمان اللي بفزعات وحزاب=حكام ماتنفعك كثر الحزبيا
يالله ياحلال عسرات الأنشاب=أطلبك ياخلاق درب الصوبيا
أفزع يامعبودي لعبدك ليا أرتاب=أرتاب من جور الزمان أرتهبيا
والا فأنا متعرض نقد وعتاب=متعرض نقد العرب والعتبيا
أنهيت جملة مابديته بالأسهاب=وأخترت له نظم القوافي على أبيا

[أبن رويل]

شاطئ المسيلة
قصيدة غزلية لشاعر عبيسان الحميداني



سقاك الله يا شاطي المسيلة=وسقا الله فيه سجات العصاري
وسقا الله فيك سهرات جميلة=قضيناها مع البيض العذاري
فكم باقي نهار وطول ليلة=تسامرنا بها والعود ساري
أنا مجبور في حب الطويلة=لك الله حبها بالدم جاري
أنا من حبها ثوبي ماشيله=غدا حالي سوات العود باري
الا ينافل بالبيض جيله=ذبحتيني ولا حد عنك داري
دخيلي بأربي منجا دخيله=ولا حد قام يطرد بالثواري
ليامنه خزرني بالكحيله=غدا في كل طيب وأعتباري
ليامنه عطف وأضفا ثليله=نشحته نشح عطشان الخطاري
عليه اللي درج توه مديله=من أغلى مايجيبون التجاري
طويل ضافين يسحب شليله=على جسم نحيل غير عاري
فلا هي بالنشاش ولا الجليله=يحير الوصف فيها وأفتكاري
فكم حيله وكم دبرت حيله=وكم دست الخطاري بالغداري
فيوم أحوش اللي نمتنيله=ويوم مانحوش الا العذاري

[أبن رويل]

ريــــح المـســـك
قصيدة غزلية لشاعر عبيسان الحميداني



سقا الله مربع شديت منه=سقاه من الحيا مزن بكورا
مرازيمه محنات مرنه=من المغرب اليا عقب السحورا
على دار بها ليه مظنه=حبيب عشرته لي ما تبورا
تعاظم ضيقتي لقفيت عنه=وحس بشوفته كل السرورا
فريح المسك له بشفاه بنه=ومن ريقه تجي نشو الخمورا
أنا أحبه وله عندي محنه=محنة قلب من خل غيورا
على بعد الحبيب أجر ونه=وأنا لو أهجر النوم معذورا

[أبن رويل]

ملبوسها ضافي
قصيدة غزلية لشاعر عبيسان الحميداني



عيني لها عن لذة النوم صادوف=ونفسي تجيها ضيقة وتحشرها
والكبد لا قفها عن الزاد لا قوف=والعين من قشرة تزايد سهرها
كبدي كما حميضة وسط قفقوف=في عبلة جردا قليل شجرها
تلعب بها صفق الهبايب أبشفشوف=لين الهبوب الصلف يبس خضرها
ركب عليها من حمى الصيف شاحوف=لين أحترق جمارها مع ثمرها
عليك ياللي ماتشبه بنفنوف=ولا جات للخياط يشبر نحرها
الجادل اللي زينها زايد نوف=وملبوسها ضافي وزاد أبفخرها
ياعين حر لبرق الريش ناتوف=ليا طب في جول الحباري سعرها
أن كان فيك من الولي يالقضي خوف=أرحم سقيم زار نفسه خطرها
أنت السبب بقضاي عيني عن الشوف=مافيه غيرك زول يملي نظرها
أن شمت شمنا لك على كل غطروف=ماعاد نقبل غيركم من بشرها
وأن كان صابك ياريش العين عاصوف=نفسي عن المقفين دوما عسرها
ماني أبمشاين على غير مصروف=أهين نفسي ماتتبع بأثرها

[أبن رويل]

شوفتكم ربيعــــه
قصيدة غزلية لشاعر عبيسان الحميداني



الا يشاقر راسك بحنا=أهذا صبغ ولا من طبيعه
تفنن وأنت كلك زود فنا=وتخلف سنة الله والشريعه
أسالك بالذي قربك منا=وخلا القلب في حبك وليعه
حبيب في محبتكم تعنا=تبي تشريه والا تاتبيعه
أنا دايم لشوفتك أتمنا=اليا أسنى القلب شوفتكم ربيعه
وأنا اللي يمكم دوم أتعنا=وعن غيرك ترى رجلي منيعه
عساك تروف في حال المعنا=سبب حبك ترى حاله شنيعه
أخاف أنك على خلك تجنا=وعقب هاك الوصل تصبح قطيعه

[أبن رويل]

البداية والنهاية
قصيدة غزلية لشاعر عبيسان الحميداني


أنا الهاجوس يامحمد سهر بي=سهرت الليل مدري وش بلايه
لهيب النار بالكبد أستعربي=خطيرا" حرها يحرق حشايه
عقب ماهو بنسناس وغربي=تنكس وأنعكس كوس هوايه
سبايب من رهابي ثم غدر بي=أمخليني مثل طفل الحوايه
يتيم من ورا الشارع يذبي=ولا حد ناظر له في عنايه
أنا مثله وهو من كبر ذنبي=بليت بحب من لا بدا برايه
أنا الغلطان أنا اللي تهت دربي=أنا اللي شفت في عيني خطايه
أجد بحب من لا خلص بحبي=وبينهم على غاية غلايه
مراحي يمهم من طيب قلبي=وكشف أسرار قلبي من عمايه
أنا بالحب والمنطوق ذربي=أعرف الحب وأعرف الجفايه
مثل ماكدر الصافي لشربي=أكدر نومته وأجحد بلايه
أبا أقفي عنه مافيها تغبي=ولو نادا ولو صاح بقفايه
ولو مندوبهم جا وأختصر بي=أنا أعلنت البدايهة والنهايه

[أبن رويل]

لا أسمها سلوى ولا تدعى سميرة
قصيدة غزلية لشاعر عبيسان الحميداني


بنت بالله كان مرتك القصيرة=أسأليها ليش ماجات أقصراها
لو يجي مافيه عذروب ومعيرة=كل خلق الله تسير لقرباها
الله اللي حطها عندي نحيرة=يوم جمل طولها كثر حلاها
المدامع خرس واللبه نويرة=كنها بنورتن يوضي سناسها
لو يجي للبيض غارات وكسيرة=كـن مضرب عينها ينثر أدواها
ما أسمها سلوى ولا تدعى سميرة=أسمها ركب على الجسم وزهاها
عاذل قلبي ولا طاوع أمشيرة=ول ياعذال قلبي عن هواها
علميها وخبريني بالسريرة=وجهها هو يمنا ولا وراها
كان قفت ياعسا بالأمر خيرة=لعنبو رجال نفسه ماقواها

[أبن رويل]

طويل الرجوم
قصيدة غزلية لشاعر عبيسان الحميداني



أنا بادي رجم بدا به أدبياني=أرسوم لبن عساف قبلي معديها
بدى فيه يوم الهوى فيه له عاني=قدام العذارى عنه تقطع عوانيها
طويل عما الرد بادنمبه أمسياني=على جو ظلما الثور يكش ضواحيها
نهوني عن المرقاب لرقاه خلاني=طويل الرجوم اللي تهيض مراقيها
بديته ولا طاوعت من عنه ينهاني=على مابديته جابت العين خافيها
على اللي جبينه كنه البدر لا باني=أنا اللي تراى أموت وأحيا بطاريها
أنا اللي تراي أموت وأحيا ليا جاني=كما القاع يوم المطر دوم يحييها

رد الشاعر الكبير محمد الخس


أنا هاضني قاف بدا به عبيساني=ذكرني أمور ماضي الوقت ناسيها
وأنا لا سمعت مغني الحب يشعاني=كما المضميه لا مرها الورد شاعيها
اليا سمعت الهوبال مع الوقت الأذاني=شعتها الورود ولاهب القيض حاديها
يجيها على الهوبال خفخاف وجناني=وطتها الورود وطوح البشت راعيها
سبايب هنوف كنها عود ريحاني=تغلى على وراهي الزين مطغيها
عليها أشقر كنه معارف أكحيلاني=على غرتن سبحان رب مسويها
ثمنها من أول من طويلات الأرساني=أمهار الملوك اللي محد قبل يعطيها
غلاها بقلبي له درايش وبيباني=هي اللي تصك الباب ولمفتاح بيديها

[أبن رويل]

أبو جاسَي

قصيدة مـدح لشاعر عبيسان الحميداني



اليوم بكرت بالمسراح ياجيبي=أبا الشعيب وهذا ليله وصمانه
روحّ وبا ألعب عليك من اللواعيبي=كلٍ على شف باله ضارب شانه
روح ترا أقصى فريقٍ لك معازيبي=وسأَل عن الشيخ أبو جاسي وعربانه
تلفى على شيخنا ريف المناجيبي=ذباح حيل الغنم والكبد شفقانه
محمد اللي ليا جيته يهليبي=غيثٍ على من يجيه وريف جيرانه
بمخومسٍ رافعينه للجنانيبي=في ماقعٍ بيننٍ للضيف عنوانه
البيت يبنى لنطاحت المواجيبي=ماسمي البيت لطنابه وعمدانه

[أبن رويل]

يـا الحميـَـدي(1)
قصيدة مـدح لشاعر عبيسان الحميداني


يالحميدي جيب ربعي لا تضره=حشم الموتر على شان الحشيمي
موتر اللي مابلى ربعه بشره=ولا يجي لادنا قراباته خصيمي
يوم جيت غنيم* قال أكبر مسره=جهزه ووقف على البيت العتيمي
وذب مفتاحه ماهو مطمع مبره=ماحسب في شوحته يم القصيمي
قضبه خط الخوير اللي يمره=خطه اللي بين مشلح والسحيمي
ولا حظه عن نقص ماه وزود حره=ودي أحرَّصك لو منته غشيمي



(1) الحميدي بن على المهيبيل الحميداني
*غنيم بن غزاي الجلالي الحميداني

[أبن رويل]

غاسّق الـنـــَاب
قصيدة غزلية لشاعر عبيسان الحميداني



أنا ليتني وادعت ابو قذلةٍ هله=قبل تنقطع من بيننا رمس الأعلامي
خذيت الكلام اللي بصدر القضي كله=وختمت الكلام اللي بصدري من العامي
كلام ٍعلى وضح النقى مايجي الزله=بعيدٍ عن درب الدناسة والا وهامي
عسى من تعرض للمحبين بشْكله=عسى يلدغه في غاوي الرجل له هامي
حنيشٍ يعلق غاسق الناب ويتله=يفيض به اللي كالين سبعت أيامي
يجيني بشيره قلت خله ولعله=جزى اللي يجي بين المحبين شتامي
يقولون ليه بايحه قلت لا والله=حرامٍ على امبايحت كل نمامي
أنا كان شفته مات أبازود دفنٍ له=أزود التراب أتراب وقول لا قامي
وأنا أقول كلٍ عارف أن الهوى مله=وأنا أن كنت مخطى فيه مخطين قدامي

[أبن رويل]

كيف أبــّا أصبر
أول قصيدة غزلية
للشاعر عبيسان الحميداني في عـام 1955م



آه من هم لجا في وطواني=مثل ماتطوي خطات الشوشليه
قطروها اللي يحثون السماني=حفها اللاهوب والشنه رديه
مثل ما جاها من الحفة وطاني=لين حشش بالمعاليق القويه
من سبايب جادلن حبه بلاني=حطله ربي بقلبي قابليه
واردله مثل صيام رمضاني=ليا وصل وقت الفطر والشمس حيه
مقصدي شوفه ولابي شي ثاني=كل قلب له من العالم أنحيه
صابر صبر الندم والموت جاني=كيف أبا أصبر والخطر منهم عليه
إن بغيت أصيح ماليه عواني=العرب هالوقت مافيه حميه
صابر في حكمتك يالمستعاني=لين تفرجها وتجعلها فضيه

[أبن رويل]

أحراق بــنّ
قصيدة غزلية لشاعر عبيسان الحميداني



علام الحبيب اللي أبشوفه تقر العين=عليه أتصل ومعاكسني تلفونه
عليه أتصل ليل في يوم في يومين=يدق الجرس ماعنده اللي يشيلونه
لعله عطالن والقضي ماحصله شين=حياتي تراها في هاك الزول مرهونه
أنا كيف أبا أصبر عنك يامورد الخدين=تعذبت بك تعذيب ليلي لمجنونه
أبوك أنت حرقت الضماير بنار البين=كما أحراق بن عند ملا يعرفونه
أنا وارد لك وردة الحولة المضمين=على بير ماء كل المخاليق مشحونه
أحبه وأحب اللي يحبه ليوم الدين=وأنا أعدى عدو الناس اللي يعادونه
تراني قتيله مير خلوه ياأهل الديّن=أنا طارح عنه الخطر لا تهينونه

[أبن رويل]

قصيدة الصمـــّان
للشاعر عبيسان الحميداني 1967م


أنا شاقني براق مزنن أيشاد الليل=تكاشف أبروقه تجهر اللي أيساريها
أبا قف وخيله وتمقل منه باالحيل=لعله على الصمـّان يسقي مناهيها
عسى منه يلفىطارش فى علوم السيل=يقول أن صلبه كاسرات خباريها
مشابه أبرجله ماأخذا علم قال وقيل=يقول أن قوع السدر سيله أمغطيها
عسى غب سيله يصبح القاع مثل النيل=تريحّ أمطير وتهتني في مناديها
أقوله وأنا مالي مع البر شف أو ميل=لكن أن نفسي ماتخلي طواريها

[أبن رويل]

يامعتق هفيات الأرقاب
للشاعر عبيسان بن رويل الحميداني
في السمو الملكي الأمير محمد بن عبدالعزيز آل سعود ــ عام 1976م


سلام يامعتق هفيات الأرقاب=يامعتق ناس على حفرة الموت
عتاق مجلوبين بيدين جلاب=أعتقتهم لله قبل فايت الفوت
بالمال تعتقهم ولانته بحساب=الا لطلبت واحدن يسمع الصوت
من سبتك راحو محبين وأصحاب=راضين منك وخايفين من الموت
يامحمد اللي للفخر دوم كساب=ياسبع نجد اللي من المجد منعوت
يامورد الهياب في كلحت الناب=لياجا النفس في حزت الضيق مغموت
فعلك على جسمك من البعد جذاب=يامزبن المبلي ليا جاه مبهوت
يامرغم للحق عصمان الأشناب=ويا منجيا" بالحق مسكين شفلوت
أنت الذي لا جاك مظلوم ماهاب=وأن جاك ظالم راح خايف ومشفوت
يشد روحه لين يدخل مع الباب=وليا دخل بابك غدا أقصر من الفوت
من سطوتك من هيبتك هاب ورتاب=عنده خبرمايدخل الباب جبروت
أنت الذي تعرف بحلات لأنشاب=وراي تبته نافذ جزم مبتوت
للعقد حلال وللرأي لولاب=مفراص ماص يودع العظم مفتوت
ألين من الماهود وأخطر من الداب=واللي عليه تميل ماهو أمبخوت
من طبت له فهو بلاشك قد طاب=ولا ترا ضدك بلا شك مشموت
تركي على كبده من النار ملهاب=وينام وعيونه بها الزاج والتوت
تشهد على فعلك شبابا" وشياب=واليوم فعلك مايبي حكي وثبوت
أما الصخا تعطى بلا عد وحساب=تعطىملايين وعمارات وبيوت
عطاك لأصحاب مقلين واجناب=تعطي ذهب ماهي دشاديش وبشوت
يأبن الملوك مهدية كل الصعاب=يامطلعت من نجد طاغي وطاغوت
بالسيف عنها نزحوا كل الأجناب=راحت ركايزهم على كل شاتوت
بنو لنجد المجد في كل محراب=بالصارم الهندي ماهو ذبت الصوت
لين البست من حلت العز جلباب=وطليت مبانيها زمرد وياقوت
أنتم حمات الدين عن كل لعاب=واللي معاديكم مكاظيم وسكوت
ياشيخ ياللي من تنصاك ماخاب=أنظر بحال أضعوف طاحوا بتابوت
في جاه خلاق البريا والأرباب=منجين نوح على ظهر جلبوت
اللي فزع لليوب وعقوب باسباب=ومطلعن يونسمن البحر والحوت
أفزع لشيبان على حد مشذاب=شيبان مذبوبين في وسط حانوت
عامين مذبوبين في وسط دباب=لما غدا حال القوي تقل سلبوت
حريمهم تنخاك تنخاك الأصلاب=وتنخاك شياب على حالهم فوت
أرحم رحمك الله ياعرب الأنساب=يامنقذ ناس على حفرة الموت

[أبن رويل]

وارد الفوردات
قصيدة غزلية لشاعر عبيسان الحميداني ـــ عـام 1970م
في أهل الشاعر عندما كانوا في البر ورا نفود الدهنا

العرب قالوا ترا عانهم بأم الهشيم=بينن عنوانهم حد عرق من حجر
مير قالوا دونهم عرق للموتر يضيم=يعطى اللي موتره جيب من صاف الكدر
لي بهم ملحوظة من بعدها مستهيم=يالله أقزر مع الصبر ليا راس الشهر
مايقرب دارهم كود هاف له نهيم=وارد الفرتات يعجبك لا منه زجر
لا نتحا يشدا لسيل تحدر بالنظيم=يوم حدر حده الجال وأنحا وأنحدر
كـن صفق المرو بالبدي من حرالجحيم=صفق رشاش الجنود الغرار ليا أستمر
خص لا ساقه من الربع سواقن فهيم=شايفن بيديه نوع الحروق من القشر
ماتعلم للسياقة تحت فكرة غشيم=عارف وش لون ممشا المان من الخطر

[أبن رويل]

عنيزة الفيحاء
القصيدة للشاعر عبيسان الحميداني في عـام 1989م


على عنيزة الفيحاء لعل السحاب يميع=من الغيث هتافٍ يروض مرابعها
مرب الجمال اللي طبيعي ماهو تلميع=مغن الجمال اليوسفي من منابعها
تصادفت مع غيدٍ بهن الخيار يضيع=بهن عندلٍ ياليت منهو مسنعها
عليهن الباس الغي والذوق والتدليع=سهوم المنايا تنطلق من مدامعها
غنادير لبسن البراقع عن التفريع=عجب لو تبا تنشال عنها براقعها
تعطل حركة السوق مافيه سوم و بيع=تشوف البشر مشدوهةٌ عن بضايعها
وقاني عظيم الشأن والا بغيت أضيع=خذني بنظرةٍ أبعادٍ مرامعها
وقفت أبمكاني حايرٍ بين سوق و وريع=كما اللي يدور حاجةٍ له مضيعها

[غريب الدار]

مشكور ابن رويل
جهد واضح وتشكر عليه
صح لسان الشاعر \عبيسان الحميداني
وجزاك الله خير
اشكرك جزيل الشكر
تقبل اجمل تحيه من الخوك
غريب الدار

[غريب الدار]

ابن رويل
يعطيك العافيه على جمع القصائد للشاعر عبيسان الحميداني
مطلوب قصيده عبيسان
يقول مطلعها
محدن لفانا من طواريش طابه000ولاحدن من هاك الديار انحدريا
وكذلك رد الشاعر خلف الخس على هذه القصيده


مشكووووور

[أبن رويل]

أبشر أخوي غريب الدار

[أبن رويل]

محدن لفانا من طواريش طابه

قصيدة الشاعر الكبير عبيسان بن رويل الحميداني المطيري
مسندة الى الشاعر الكبير / محمد الخس



محدن لفانا من طواريش طابه =ولحدن مع هاك الجبال انحدريا
اذن يفـرحنا بعلمن لفـابه =ينفعك من دار المحبين طريا
يجيب علمن ناخذه ونهجابه =من واحدن حبه برا الحال بريا
بريت قلم ورعن غشيم الكتابه =طول عليه ابـريته وانكسـريا
بسباب غرون طاغين في شبابه =اغراني الله فيه والحب غريا
اوما على قلبي بسيفه وصابه =بسهوم نجلن تفري الجوف فريا
خلا فوادي والظماير خرابه =مجروح روح منه والناس بريا
نبنوب موزن ناعمن في شرابه =عليه ريعان الجليب انفجريا
مكنون عن لفح الهواء والتهابه =جذعه عليه الماء الرهاو تسريــا
وخدن كما البنور عند انشبابه =ولا ايشادي نور ضوح القمريا
يامن يجيب ومن يود الاجابه =يمشي خفا والناس ماهم بدريا
علي معروفه وبالله ثوابـه =يطلب ومايطلب علي الخسريا
للي قنب دونه غليث الذيابه =نحوا وراحوبه عوجان الاريا
من دونهم خدن يطمه سرابـه =هـم بالجبل وانا بحد البحريا
عسى السحاب الغر يسقـي ترابه =ياخذ اسبوعين المرازيم جريـا
على هك الوديان يهمل سحابــه =قوع الشجر من جرت السيل عريا
واليا خذا مـده ورفع ربابه =اليا الجبل والقاع كله خضريا
كل الجبل يربع ويخضر جنابه =تندا ويطلع من قرها الوقريا
بيوت الشعر تبنى ويرفع اقطابه =واشوف من يطلع ويدخل جهريا
انا اليا ماشفت زوله كسابه =والله ماغبـط اهل البنوك التجريا
اخير من قصرن اليا صك بابه =يضيق صدر اللي يسوق النظريا
من اول صابر ولا قلت جابه =واليوم باح السد طـول الهجريا
يابو خلف صاحبك جاه ولجابه =من نوع ماتشكي بهاك الشهريا
يوم انت تشكي حب جالي اعذابه =تشكي ومن حبه تهل العبريا
منهن تحملت العناء واللبابه =ومن ريقهن كد ذقت طعم الخمريا
اليوم لاتنقل عليه عتابه =في حالتي يالخس دير البصريا
افزع لمن خله سعى في ذهابه =حاله من الفرقا عليها الخطريا
اما وصفت اليا الدواء والشفا به =ولا ترى اخوك الصغير انتحريا
لياعاد أبن عم ورفيق وقرابه =اللي علي انه يجيك الخبريا
ومني سلامن مايعدد احسابه =للي على الحب الشريف انتصـريا


رد الشاعر محمد الخس على الشاعر / عبيسان بن رويل الحميداني



حي الكتاب وحي راع الكتابة =ترحيب الذ من العسل لاعصريا
يامرحبا عد الورق له بغابه =وعد الجراد اليا نهض وانتشريا
في مرسل المكتوب عرب النسابه =نسل الفهود مسرحة لنذريا
عبيسان يلي فيك عقل وذرابه =لعل عمرك طول عمر النصريا
جاني جوابن فيه نوع انقلابه =حلون ومدفونـن مـع الحلو شـريا
ومن التعسر فيه نوع وصلابه =وانا علي العسر ماهـو عسـريا
انا سريع الرد لاجت نشابه =انشد وتلقاني بطول الدهـريا
ان كان ماجوبة خصمي عيابه =بلي مقاطعهن مقاطع صخريا
اليا هاج بحر الشعر ثم جاك مابه =مركب غرامي بالمواقف دفريا
فتحت فقرن مثل فقـر الهابه =لو تجهره كل العرب ماقصـريا
وصبيت من زين المثايل اصبابه =مثل الجنيه اللي ذهبها حمريا
ماوالله انقل من خصيمي حزابه =الا الرفيــــق ادراه دري النظـــريا
اقـوله هـلا ويا مرحبابه =واعطيه ماتملك يدي لا ومريا
ليامنه اونس كبر راس الذبابه =افداه بالغالي واشيل السهـريا
ولاكثير الناس رفقة خيابه =يرافقك من شان نتف الوبـريا
رفيق بيام الرخاء والطرابه =وليا نخيته من المخافه صفريا
ترى الزلابه له رفيقن ازلابه =تلقى الغبر يحط مثله غبريا
ماوالله ارافق ادحوش الدبابه =اللي تهارش مثل وصف الجعـريا
اهل النقيلي بينهم والسبابه =من رافق الرديان خاب وخسـريا
ربعي هل الناموس سقم الحرابه =فهود الزراج اللي وراهم سفـريا
هم الملوك اهل الشرف والمهابه =والا نشامن طيبهم ماخشريا
واقرب اربوعي من شكى ناس طابه =ابو محمد طيبن لانعثريا
فيه المروه والصخا والحبابه =طيب وانا بطيبين افتخريا
والحب من عصر النبي والصحابه =شكوه اهل جوخن تنقش بـزريا
عبيسان من خله اجروحه اعطابه =سحر الهواء صابه وهو منسحريا
ساقه وعاقه واخذ قلبه انهابه =عنق الفريد من المها لنذعـريا
ابو محمد جاب عمره اطلابه =من حب غضات النهود انحشريا
نجل العيون اللي عليهن رقابه =اللي تحـس بجيوبهن الثمريا
راع الهواء لاورد فيه انحطابه =يفتر قلبه مثل فر الكفريا
يقنب قنيب الذيب لامن عوابه =لولا الحيا من العرب ماستتـريا
يجر صوتن مثل صوت الربابه =تقول سكرانن وهو ماسكريا
هذا وياباغي من الخس ثابـه =تقول ماللحب طبن اذكريا
شفاك ورضاك الخفي والدوا به =من ذبلن بشفيهن الشكريا
ليا نمت مع غض النهد في ثيابه =هذا هو المطلب وهذا الدوريا
مع عود ريحانن يميل الهوا به =عليه شطين العراق اتهـدريا
سقني وبعني قدم وجهك اجلابه =في لازمك ممنون لاتفتكريا
حالي ومالي لك بليا اطـلابه =الطيب عنك اليوم عنك ماينذخريا
اليا عطــى الوالي بليا انهابه =خذ صاحبك وانا علي المهريا
وما صباح اليوم ماينحكا بــه =مافيه كز السبر ثم قول اغريا
فاتت مراجل لابسيــن العصابه =حكام وحكومات ماتنقدريا
تمت ياشوق اللي تلاعج اعذابه =وانكان اني قصرت ابيك اتعذريا

[الغريب؟؟]

مشكوووووووووووووووور وماقصرت ياااابن رويل علي القصايد وصح السان قيلها ويعطيه العافيه
تحيااااااااااااااااااااااااتي لك
الغريب؟؟

[غريب الدار]

ابن رويل
بيض الله وجهك ماقصرت
وصح لسان الشاعرين
عبيسان ابن رويل الحميداني
ومحمد خلف الخس
مشكور على الجهود النيره
دمت بخير
وفقك الباري

[أبن رويل]

مشكوووووووووووووووور وماقصرت ياااابن رويل علي القصايد وصح السان قيلها ويعطيه العافيه
تحيااااااااااااااااااااااااتي لك
الغريب؟؟


مشكور أخوي الغريب على تعقيبكم الرائع وحنا بالخدمة

[أبن رويل]

ابن رويل
بيض الله وجهك ماقصرت
وصح لسان الشاعرين
عبيسان ابن رويل الحميداني
ومحمد خلف الخس
مشكور على الجهود النيره
دمت بخير
وفقك الباري


أستاذنا الغالي غريب الدار

ماسوينا الا الواجب وأن شاء الله تكون هذه المجموعة للشاعر هي المطلوبة والتى عليها طلب كبير من الأخوة هنا وهناك

تقبل تحياتي

[غريب الدار]

مشكور ابن رويل
الواجب على الجميع ولايستثني اي شخص ينتسب للقبيله
اكرر شكري على الاهتمام والجهد الا محدود
وفقك الله

[راعي المجاهيم]

يعطيك ألف عافيه علي القصايد الملكيه هذي ويليت تذكر قصايد الروله كلهم وشكرك

[الليث]

ننتظر قصايد منك أكثر يابن رويل ومشكووووور

[راعي الدهماء]

مشكووووور على المجهود الكبير
اللي بذلته من أجل المنتدى ومن أجل الأعضاء
ومن أجل النشر أيضا، ويستاهل الشاعر عبيسان
ولاتبخل علينا بكل ماهو جديد وفريد في جعبتك

تقبل أرقى التحايا من : أخوك : رااعي الدهماء

[ابو ليلي]

اخي الكريم ابن رويل


اشكرك جزيل الشكر


على جهودك المبذوله


والحقيقه الشاعر : عبيسان


من فطاحلت الشعر النبطي المعاصر


والدليل القافيه ومطلع البيت



وانا اسف على تأخري في الرد


& ابـــــــــــــــــ ليلـــــــــى ـــــــــــــو &