شيبان ..... يا شيبان <<< يحرج عليهم

[align=center]سللااام
موضوعي هذا سوف اتحدث عنه بطريقة اخري <<<< اخص يا ذا
يعني ابي اجلبط الشيبان هالمرة من خلال خبرتي <<<لحد الان شايف نفسي
قسمت الشيبان الي انواع يالله خلونا نشوف

العيار
هذا النوع عنده قدرة عجيبه على جعل خشتك مثل تسذا (كذا) :eek: ....ودك تمسك فيه خط (ونيس )
والله لو حصلت له فرصة وتم تصويره على فيديو ان مسلسل فريندز ماياكل معه عيش
لكن مشكلته انه على وشك الأنقراض.....زين ان حصلت لك واحد عمره تحت الــ 90
وان حصل وحصلت واحد .......... بالله ارسله لي لو على الخاص

(مواقف من الشيبان العيارين)

الموقف الأول: مرة كان فيه شايب منتهي تاريخه (يعني رجل بالقبر ورجل تشم هواء برى )...و واحد من عياله مهتم فيه يوديه ويجيبه ويساعده بالمشي...يعني الولد ماشاءالله حركي وقرم
مر شايب عيار وشاف الموقف ذا وقال: سبحانه اللي قدر يطلع هالحي من هالميت!

الموقف المثنى: مرة فيه شايبين (مثنى شايب)...واحد عمره 99 والثاني عمره93
الشايب1 : خلاص ماعاد اقدر على شي....الشايب2 : تراك منت بكبير
الشايب1 : انا مانيب بكبير!!!! والله اني اذكر يوم كنت ازمك

الموقف المثلث : فيه واحد كان زعلان ومهموم وقاعد على الرصيف....والسبب انه فقد كل شي بالحياه....جاه شايب عيار وقاله:
انت وش فيك زعلان وشايل هم الدنيا فوق راسك.... صاير تقل افغاني مصكوك(ن) دكانه



القعيطي
هذا النوع منتشر بكثرة...يشكل 99.9 % من الشيبان...وهي نسبه خطيرة جدا(على هالنسبه يمديهم يقدمون
على كلية الطب) <<<< انثبر لاعاد تنكت
يعني:
اذا شفت شايب معه ريالات الملك فيصل (الله يرحمه) الحمر...او لقيت شايب حاط فلوسه في قراطيس الصيدليه ....او لقيت شايب يكاسر على جحه بربع ريال...او لقيت شايب يتشحذ زقاير عند الأشارات (اللهم ياكافي)
فأعلم ان الشايب ذا قعيطي



المتشبب
وخر عنه ...تلقاة رزه رغم انه تعدى الــ 80 بــ 5 كيلومتر....وصابغ شنبه وراسه ببويه سوداء
هذا النوع يصلح يكمل رابع ببلوت.....بس تراه غشيم حتى النخاع باللعب....يعني لاتكوشون عليه... يطيح وجهه ...ويتحطم نفسيا....عاد يله يبغالك طبيب نفسي علشأن يرجع الشايب لحالته الطبيعيه....وهذا يتطلب
جلسات كثيرة مع الدختور.....امداه فطس الشايب ولسى ماخلصت جلسات العلاج النفسي
بالعربي لا تزعلونه



المملوح
هذا ياحظ اهله فيه.....تدرون ليه




لأنه اذا انطبخ بقدر مايحتاج اهله يحطون عليه ملح من زود ملحه << ياثقل دمك
(تصنيفي وبكيفي.....احط فيه اللي ابغى )

طبعا ادبغني على راسي بعجرى اذا لقيت شايب مملوح



اللي ماوراء ليلته ذي ليلة
يالله حسن الخاتمه......هذا النوع حبيب وهادي....ماتخذ منه لا حق ولا باطل.....يهذري ماتدري وش يقول
مرة يتكلم بالدولة العباسية شوي يدخل على حرب الخليج شوي يسب جارهم ....بالعربي يوشوش
صاير تقل رادو مالقط محطه <<<< متأثر بالشيبان العيارين



الصايع
هذا النوع يكثثر من حاجتين.....السفر برى والفياقرا (ماأقصد السيارة )....طبعا ماراح تحصله بالمملكه
لأنه ببساطه سمرمدي .... طايحلك بالشاميات وسحب سيفون على ديرته ...طبعا الشاميات طمعانيين
بقروشه ...ولا لو وقفت على شكله ومظهره ماينباع ولا بدمن غنم ....الله لا يلوم شبابنا دام فيه هالنوعيه
يقولك المثل: اذا كان رب البيت بالدف ضارباً....فلا تلوم عياله اذا هجولو بالشوارع



الجلف
هذا النوع نادر جدا جدا.... هذا الشايب مسوي (Delete) على الرحمه في قلبه وحاذفها من سلة
المحذوفات بعد....بعضهم يسميه الشايب العنيف ... اختلف العلماء يوم اجتمعت معهم علشأن ندرس حالته....اكتشفنا ان الحاله ذي ناتجه عن كثرة الفرفرة بالرمضى حافي القدمين....لكن واحد من العلماء انكر نظريتنا وقال ان الحاله ذي ناتجه عن انخفاض هرمونات الخوف نظراً لكثرة تناول التسبده النيه....ويوم شفنا ذا العالم انكر نظريتنا وحنا نقوم وندبجه دبج ...وانا امسك قارورة المختبر واصكها برأسه (هوشة علماء )

(موقف اخر سوف اذكرة لكم اعزاءي الحمادين
كان وقت صلاة الفجر ....وكان فيه شايب رايح
للمسجد بدري (ترى فيه خير )....المهم وهو على
طريقة .....جاه بس (قطو ) وقعد يتميلح عند رجلين الشايب .... الشايب مهوب فاضيله لكن عطى البس نظرة
وكأنه يقول: اصبر خل اخلص من الصلاة.....والبس مسكين مفهي مايدري وش السالفه
اول ماطلع الشايب من المسجد وهو يقوم ويمسك البس مع رقبته.....وعلى اقرب جدار
مستخدماً خشة البس كتب الشايب على الجدار: بسسسسسسسسسسسسس
طبعاً البس لا يملك لا حول ولا قوة في هذي اللحظه....ماغير يهز ذيله يمين ويسار صار ذيله تقل مساحات سيارة <<< برضو متأثر بالشيبان العيارين
طبعاً يوم خلص الشايب وهو يحذف البس على جنب .... والبس مسكين بين الحياة والموت




الذروق
هذا النوع خواف من كل شي.....مثلا وقت الأكل ماياكل شي يقول: انا فيني سكر وضغط وقرحه (يعني سوق امراض اللهم ياكافي).... وهو اساساً مافيه الا العافيه .... بس مدري كيف يعيش دام انه ماياكل؟....الظاهر انه عايش على المغذي (مجرد افتراض).....حتى انه يخاف من الحمام (تكرمون ويكرم السامعين)
تلقاه لا دخل الحمام (يطرف) الباب يخاف يقفله!!!...وياكثر ماتتوهق وتدخل الحمام وتلقى فيه شايب :D



المتهاوش مع الشماغ
اختلف العلماء وانا واحد منهم على تفسير هذي الظاهره.....وهي: ليش الشايب ذا مايحب الشماغ؟
واتفقنا(اخيراً ) على ان هذي الظاهره ناتجه عن انفصام شديد في الشخصيه....فتلقى ذا الشايب وقت
الحر او البرد ماتفرق معه يطلع من البيت من دون شماغ .....واذا تكرم ولبس شماغ بعد محاولات
عديده من عياله علشأن ما يفشلهم قدام الناس.... مايقعد معه الشماغ خمس دقايق الا وتلقاه سادح الشماغ جنبه
ملاحظه:
فيه ناس ماتفرق بين ذا النوعيه من الشيبان وبين الخبول اللي كثرانين هذي الأيام ماغير يدوجون بالشوارع مالهم والي (ياشين الخبل المتعافي ).....نظرا لأنهم كلهم يمشون وقت القايله على الرصيف .... والناس ماعاد صارت تفرق بينهم!!



النظول
اخطر نوع من الأنواع السابقه.....ينافس الجمرة الخبيثة في الخطر على البشريه وبعض الأحيان
يتفوق عليها .... بعض الشيبان النظولين يستدخم عينه الحارة كمصدر رزق....تلقاه بعض الأحيان
يستأجر سطحى ...ويوقف جمب شارع سريع وصيد بالعالم ....طبعا مايقدر على الحوت والفياقرا
وطقتهم الا ماندر....هو جيد بس على ام عزيز (الدتسن) ..... بس تراه طيب يشيلهم ببلاش بعض الأحيان....لأن بعضهم مساكين ماعنده قروش <<<< عمرك سمعت واحد على دتسن جيبه مليان

(مواقف من الشيبان النظولين)

الموقف نمبر واحد: مرة لقيت شايب يأشر بالطريق وانا على سيارتي في عز الصيف....كسر خاطري وانا اللي اوقف واشيله معي....طبعاً انا مشغل المكيف على الأخر....يعني السيارة باردة من داخل
قالي الشايب: قصر المكيف اعوذ بالله تقل بالمربعانيه!!!!! >>> اهب ياوجهه
ماامداه تكلم الشايب الا الكمبروسر انفجر!!!

الموقف رقم تو: كان فيه شايب واقف عند اشارة....فجأة مرت دوريه من جنبه بسرعه وهي مشغله" السيفتي"...الشايب يوم شاف السيفتي قال: وش هاللي تقل يتمضمض
الا فجأة الدورية انقلبت<<<كذبة مفلصة

الموقف خمسه ناقص اثنين >>ينكت
ه شايب وولده بتمشون بمزرعتهم....الولد شاف طيرين (مثنى طير) ....واحد منهن يحك رجله بمنقارة والثاني يغرد (مبسوط)....الولد: يبه ابي واحد من هالطيور
الشايب: اي واحد تختار ياولدي تبغى اللي يقرأ او اللي يكتب!!!
شوي... الا كل الطيور طايحه في حضن الولد
(ينطبق عليه المثل: فلق عصفورين بحصاة )



مايمكن لطشه من الموضوع والتصنيف:
1-بالله لا تنسى اذا حصلت شايب عيار بلغني
2-اذا كنت تمشي بالسيارة ...ولقيت نقطة تفتيش قدامك.... طالع بالمرايه وراء.....اذا حصلت سيارة وراك قاعده تلف يمين ويسار....فأعلم ان راعي السيارة قاعد يربط حزام الأمان <<<< وش دخل امها بالموضوع
3-قبل ماتدخل الحمام(تكرمون)....طق الباب
4-يوجد 10 انواع من الشيبان....ماابي احد يجي ويبلشني ويطلعلي نوع ثاني ترى هذي الأنواع جت بعد مشاد شوش ومضارب بيني وبين العلماء سالفي الذكر
انا مرررررررررررريت من هنا ويا ويل اللي يلطش الموضوع ويتميلح بمنتدي ثاني[/align]

[align=center]مشكور أخوي على جهودك وفعلاً أجتهدت

وأنا فحمت وأنت ماخلص تصنيفك

بس ما تلاحظ أنها طويله شوي يعني أنا وأنا ولد فحمت وشلون باقي الأعضاء

:p أشوف مافيه رد :p

مشكور وماقصرت أخوي لزاق جروح

ولا تزعل على التعليق وآسف إذا غلطة

والـــــــــــــــــــســـــــــــــــــــلام [/align]

فــــــــــــــــــــــــعلاَ يعــــــــــــــــطيك العــــــــــــــافيه أخــــــــــــــــوي على هــــــــذا الموضوع الجـــــــــديد في طـــــــــرحــــــــــــه والأسلـــــــــــــوب الفـــــــــــــكاهي الممتع وعلى قولــــــــــتك اللي ذبحتــــــــني ضحــــك هي

اقتباس:

---

هذا النوع يصلح يكمل رابع ببلوت.....بس تراه غشيم حتى النخاع باللعب....يعني لاتكوشون عليه... يطيح وجهه ...ويتحطم نفسيا....عاد يله يبغالك طبيب نفسي علشأن يرجع الشايب لحالته الطبيعيه....وهذا يتطلب
جلسات كثيرة مع الدختور.....امداه فطس الشايب ولسى ماخلصت جلسات العلاج النفسي
بالعربي لا تزعلونه

---

شـــــــــــــــكراَ مــــــــــــره ثــــــــانيه أخـــــــــــــوي لـــــــــــــزاق جرووووووح على هذه البـــدايه الطيبـــه ,, وأرجــــــوا المـــــــــــــــــزيــــــــــد فـــــــأنت مبـــــــــدع , ولك من يثنــــــــــــــي عليـــــــــــك

اقتباس:

---

المشاركة الأصلية كتبت بواسطة صاحب صاحبه

[align=center]مشكور أخوي على جهودك وفعلاً أجتهدت
هلا فيك ومشكور علي مرورك
وأنا فحمت وأنت ماخلص تصنيفك
لية مافي بيتكم ماء <<<<ينكت
بس ما تلاحظ أنها طويله شوي يعني أنا وأنا ولد فحمت وشلون باقي الأعضاء
احلا يبي يعلم انه ولد ههههه طلعت تمساح وانا متأمل انك بنت :D


:p أشوف مافيه رد :p

مشكور وماقصرت أخوي لزاق جروح

ولا تزعل على التعليق وآسف إذا غلطة
هلا فيك ولا تزعل مني وانا اعتبر اللي بالمنتدي كلهم اخواني :p
والـــــــــــــــــــســـــــــــــــــــلام [/align]

---

.................................................. .................................................. .................................................. ..

هههههههههههههههههههههههههههههههههههههههههههههههههه :)


شكــــــراااا على الموضوع الرائــــــــع

بدااااااااااااااايه رااااااااااااائعه منك ونتمنى الاروع منك

سلاااااااااااااااااااااااااامي.......

هلا فيكم
انا مرررررررررررررررررررررررررررررررررريت من هنا