المهابدة والمهايط مشكلة والله <<< قصة حقيقة

+18

( دراما + رومانصيه + اكشن + نص حبه بخاري + خبز تميس )

قصة مقعلة من الادب الاقلاعي صرفتها لكم >> اقول انثبر بس )....بالعربي ممنوع اقتراب البزاريين واصحاب القلوب اللي مهي بقوية <<<< اقول تلايط وعطنا المضمون

ابو فأس

يلعن ام الحاجه اللي تخليك تسوي قلق علشأن وصخ دنيا
مره من المرات كنت صاف سرى......لا سرى بالبلوت بعد <<< لا يكثر

لا عاد صدز كنت صاف سرى عند خباز انتظر دوري يجي كنت طالب خبز تميس....يوم جين ابحاسب حصل نقاش صغير بيني وبين الأفغاني
الأفغاني: هزا خبز تميس واحد 5 ريال!!!!
انا: خير ان شاءالله ليه 5 ريال لا يكون ارتفع سعر البانزين على غفله
الأفغاني: هزا كيس طحين صار غالي لازم هزا خلي خبز غالي
انا: اقول بس خذ ريال ولا يكثر ( لا ريال متقطع بعد) ومعه تفله<<< الأخلاق تنباع بمحلات ابو ريالين

الأفغاني ماقدر يتحمل الموقف وخصوصاً الموقف المتعلق بالتفله وهو اللي يقوم ويعطيني ذاك البقس على وجهي وخلاني اضيع الشمال....اول ماطحت على الأرض قمت التفت يمين ويسار ادور على كاميرا ( خبركم رمضان قرب وهذي حركات الكاميرا الخفيه ماتمشي علينا)<<< قديم
يوم ادركت انه مافيه كاميرا عرفت ان الدعوه جد <<< احلف
فقمت من الأرض وسط تشجيع ومؤازره من اخواني السعوديين.....(خبركم مضروب في ارضي وبين جمهوري....والهدف بهدفين خارج ارضك <<< ثقيل طينه)
وانا اللي اقوم وارد البقس للأفغاني في خشته ومعه بقس ثاني وثالث ورابع ( طبعاً الأفغاني ذا اصغر افغاني قابلته طوله طول ساقي....ولا لو هو من الأفغانيه اللي خبركم تسان عطيته 5 ريال من الأول وفوقه بوسه على رأسه بعد )
المهم اني صفقته الين ماخليته تقل واحد(ن) من مشجعي فريق الوحده <<< يبغى يقولكم انه غرقه دم احمر

بين الجمهور كان فيه واحد(ن) اسمر.....اتضح بعد تدقيق وتمحيص انه دون كنج (Don King) منظم بطولات الملاكمه العالميه

من هو دون كنج؟

http://news.bbc.co.uk/olmedia/166000...king_300as.jpg


اكيد انك اول ماتشوفه راح تسأل السؤال التالي: ليش شوشته قايله تسذا؟.......والجواب بكل بساطه من الروعه......هذا ياطوليين الأعمار سنة من السنين كان دون كنج يسرح بالغنم والأرض مربعه....خيم الليل عليه وهو يدور فقع وماحصل....يوم حس انه ضيع.....وهو يرجع لغنمه......يوم رجع ماحصل الغنم وهو اللي يقمط العافيه....لأن راعي الحلال يبي يذتسيه (يذكيه) ان عرف ان الغنم ضاعن.....وهو اللي يرتاع ويخاف......قرر انه ينحاش.....وهو اللي يطلع نفود ....على طريقه جاه حصني... الخبل يحسب انه ذيب وهو اللي يحط رجله من الروعه الين ماقال سلام ياامريكا.......نستنتج من الكلام السابق ان ماحصل لــ دون هو مجموعه من الروعات والمخاوف تجمعت في راسه الين ماخلت شعره يتيبس على فوق.....صار شعره تقل مكنسة حوش

http://www.freenet.de/freenet/sport/..._gross/06.jpeg
(هذا دون كنج يوم انه مشارك في مسابقة اقوى ريحة اباط....وفاز فيها بكل استحقاق لأنه رافع ابطين (مثنى ابط )
اشتهر دون كنج بأنه هو اللي يخليها تقبس بين الملاكميين.....يعنى مثلاً يروح عند تايسون ويقوله: ترى لينوكس لويس متديك قال ان جدك كان صبي عندهم وقال بعد ان امك كانت تخم الشارع ولقتك مرمي جمب زبالاه يازلابه .....يعنى بالعربي وظيفة دون كنج انه ينقل حتسي الملاكميين مع شوية بهارات

http://news.bbc.co.uk/olmedia/166000...king_300as.jpg
(دون يكلم لويس يقوله: ترى تايسون يبغى يطلع كشته ويبغاك تخاويه لأنه ناقصه فحم )

نرجع لقصتنا

جاء عندي دون كنج بعد الملاقط مع الأفغاني وقالي: معك دون كنج.....قلت له: عاشت الأسامي وش يقرب لك برجر كنج ؟.....قال: خلنا من الحتسي الفاضي انا شفتك قبل شوي مع الأفغاني وباين ان عندك موهبه بالملاكمه وقررت اني ارشحك علشأن تقابل بطل العالم الحالي "بيرنارد هوبكنز" (Bernard Hopkins) وترى الوعد لوس انجلوس....انا ماصدقت خبر على طول وافقت

لملمت اغراضي على السريع....ورحت عند لوس انجلوس.....اول ماوصلت رحت عند اقرب مقهى انتر نت واخذت اسوي (سيرتش) لــ بيرنارد هوبكنز
http://www.boxingpress.de/fotos/Hopkins0508.jpg
دُهشت يوم عرفت ان بيرنارد طلع خاله مايك تايسون وهو بنفس الوقت مناسب محمد علي كلاي (يعني شارب الملاكمه شرب)....وقاعد اقرى سيرته الذاتيه.....اتضح ان كلاي في البدايه مارضى يزوج بنته لــ بيرنارد والسبب ان هذا الأخير اصله من موزنبيق وكلاي يبغى واحد(ن) من غانا <<< بالله ياكلاي اشر بأصبعك على الفرق بينهم
زعل تايسون خال بيرنارد على كلاي علشأنه مازوجه....وهو اللي يروح عند كلاي ويقوله: يارجال حنا مناسبين غوانى (جمع غاني ) كثار....مير وافق الله يصلحك.....ضَحِكَ كلاي كثيراً ووافق<<< تحس ان كلاي يدربيها ولا يدري وش السالفه
طبعاً بيرنارد هذا هو بطل العالم الحالي ومافيه احد قدر يهزمه او حتى قدر يطيحه على الأرض.....بصراحه حسيت ان بأرتجاف فرائصي <<< ملطوشه من احد البرامج.....وبراطمي قامن يتصافقن

وجاء الموعد

VS

القلب النابض VS بيرنادر هوبكنز

دخلت الحلبه وسط حضور جماهيري كبير يساندون تسلبهم....وانا لحالي

مقدم المبارة تكلم:
in this corner weighing 225 pounds Bernard Hopkins
AND
in this corner weighing 170 pounds qlb nabd >>من اللي علمك انجليزي بس

انا بصراحه ماادري وش قال عني (فاذر اوف سلاش)....ماادري هو نطق اسمي او سبني....انا احتياطاً قلت له: كل تبن <<< مسوي ذكي

Round 1
اول بداية اللقاء....هجم علي هجوم عنيف....وكأني ذابح واحد(ن) من عياله ( الظاهر ان الكنينه دون كنج وصل له كلام مهو بمضبوط عني)....المهم انه استلم الجهه اليسرى من خشتي...وخذ تبقيس الين ماصار وجهي مايل...وانا لا حول ولا قوة

Round 2
(نفس الجوله الأولى مافييه تغيير ....هالتسلب الكور دون حطني مع بطل العالم في اول مباره لي....والله لو اني اكل حلبه زي اليمني ابو حميد )

Round 3
نفس الجوله الأولى بعد ....بس حصل تغيير خفيف....وهو ان خشتي تواسة بعد ماكانت مايله....لأني خليته يركز على الجهه اليمنى من خشتي....والله لو يشتغل بيرنارد سمكري ان يدخل ذهب <<< فاضي

استراحه مابين الجولات
بصراحه فقدت الأمل....وخيبت ظن جماهيري اللي عند الخباز.....فذهبت عند شنطتي في زاوية الحلبة....وقلت خل اضف عفشي والقط وجهي بدل مااتهزئ زياده ......وانا اضف اغراضي لفت نظري كيس .....يوم فتحته حصلت اغراض لامي (الله يهديها مضيعه الزبالاه)......وانا قاعد اتفحص الأغراض شفت غرشة ابو فأس محطوطه في كرتون فيكس....ويلعب الشيطان برأسي .....قلت: الدعوه خربانه خربانه....مير خلني ارد كرامتي على الأقل.....وانا اللي اعبي القفازات بــــ ابو فأس

Round 4
الدلخ كان يحسبني مثل الأول راح استسلمله.....اول ماجاني وانا اعطيه لكمه خطافيه على عيونه ....يوم حسيت انه مايشوف.....قلت هاذي فرصتي .....واعطيه لكمه يمنى ولكمه يسرى ومع بطنه وحتى لكمته مع المنطقه الحساسه (ياشين الأنتقام ).....واكمل عليه لكمه يمني ويسرى وفوق وتحت ويمين ويسار وفوق وتحت ويمين ويسار وفوق وتحت <<<< بالله ماتذكرتو مدرس الرياضه ايام الأبتدائي في الطابور الصباحي
المهم اني لكمته الين ماعض الأرض واشوته ذيك الشوته برجلي وخليته يطلع برى الحلبه(الصورة تحت)
http://image.guardian.co.uk/sys-imag...RagingBull.jpg

بعدها رفعت يدي وقلت انا الفائز.....الحكم التسلب ماقام يعد عليه.....والسبب انه يقولي ان الخصم خارج الحلبه لازم يدخل علشأن اعد عليه!!!!!.....وتقفل معي .....وانا اتناقش مع الحكم حول الموقف هذا استغل التسلب بيرنارد النقاش وهو
اللي يعطيني لكمه على وجهي وغرقت الجمهور دم....(الصورة تحت تصف الحال...طبعا استعرت خشة دي نيرو للتوضيح <<<<< طراه ان بعض الخشش صايره سبيل كل(ن) يستخدمها
http://www.gonemovies.com/WWW/TopFil...ngBull2_sm.jpg

قمت من الغفوة اللي جتني بعد لكمة بيرنارد.....ولقيت الحلبه فاضيه ومافيها احد....ادركت حينها ان احلامي تبخرت
ورجعت لديرتي بعد ايام....يوم جيت ابسلم على اخواني واصدقائي كلهم انحاشو ورفضو السلام علي؟
رجعت البيت يوم دخلت على اهلي كلهم تغطو يحسبوني اجنبي ....صعدت الى غرفتي باكياً
يوم ناظرت المرايه دُهشت ..... لقد شوهة لكمة بيرنارد وجهي <<<< مسكت معه فصحى

لكن فجأة اتضحت ابتسامه على خدي <<< ترى متعوب عليها حيل
وقلت: ان اسقطت البطل ولكن الحكم حرمني من الفوز.....انا البطل الغير متوج
وقعدت اردد:
Im the Boss Im the Boss Im the Boss
<<<< ابد ماشاف نهاية فلم الثور الهائج

الــــ END

مايمكن لطشه من القصه:

1- ابو فأس له اكثر من استخدام

2- ترى انا السبب في رجوع قيمة الخبز التميس الى ريال واحد

3- الناس يحسدون دون كنج على شعره تدرون ليه.....لأنه اذا جاء ينام مايحتاج له مخده

4. اياكم والمهابد وانا خوووووووووووووووووكم

هههههههههههههههههههههههههههه



أياك والمهابد وانا اختك




سؤال هل هي منقوله ام لأ ؟؟

وش تتوقعين انتي ؟

،،
ملاحظة الصور ملطوووووشة من ذا الموقع
http://www.boxingpress.de

لأ ليست منقوله



اردت التأكد


لديك اسلوب فريد


ياروح الفكاهه بالمنتدى



دمت لنا

هههههههههههههههههههههههه

يعطيك العافيه والله يبا يشفيلك وجهك

ويخليه ينبض مثل أسمك ويسلمووووووو

أخوك : رااعي الدهماء

مشكوووووووووووووووره أختي القلب النابض

ههههههههههههههههههههههههههه

نصيحه أخويه لا تهابدين ولا تهايطين

هههههههههههههههههههههههه

والله يعطيك العافيه


على النقل الممتاز والجميل

مع تحياااااااااااااااااااااااااااااااااااتي

الــــــــــحـــــــــــمـــــــــــيـــــــــــدا نــــــــــــــي