قصــه وابـيــــات

القصه تدور احداثها حول ثلاثة من الحنشل تخاووا يبون طوارف هالعراق غديهم يحصلون مايكفي حاجتهم من الجوع والحاجه في هالكوقت الله يديم علينا نعمته..

الحاصل انهم مشوا من الصباحيه او الجهرا ( العد اللي هم قاطنين عليه )
هكالليله امرحو خلا وليلة ثانيه او ثالثه وهم يحوفون هكالعرب بعد ماتشاورو وحددو المكان اللي
يلتقون اذا صار ماصار والوعد المفاخت اذا كان الموعد الاول مخطر
والوعد المفاخت (الاشعلي) وهو جبل معروف بالعراق
المهم انهم تسللوا ياما دكولهم يجي ست سبع من المراح واليا هل البل معهم
ثارت البندق وصوب شاعرنا بطل هذه القصه وخلوه اخوياه وهم يشوفونه بزعم انه مات
ولالهم عن اهلهم ويوم جو العرب وين فلان
قالو فلن انذبح لانهم يشوفونه يوم طاح...

فلان نقل صوابه ولاله عن وعدهم واليا ماهم بالموعد الاول اللي فيه الركايب
قال الوعد المفاخت يوم جا الاشعلي اليا هذي جرتهن حدر القمرا هجيج ماحتى احتروه

وشهوله يوم مالقاهم اخذله شوي وهو بين الرجا والاياس
مشى من الاشعلي يبي له ثميلة ماء خابرها حوله ويوم جاها مع انباحة الشوف واليا هكالبعير عليها
يدور الماء وهي منهدمه...

واصبحت حياة هذا الشخص على الله ثم على هالبعير
وشوي شوي ياما قضب يد البعير ونوخه ويوم تساوى عليه وهو يوجهه يمة هله ونهاره كله وليله والنهار الثاني مادرو اهله الا البعير على الماء وعليه جنازه ..

يوم جوه والياهو فلان اللي ربعه يقولون مات
نزلوه من البعير يابس ٍ حاله وفمه و باطراف اصابعهم يقومون يرطبون فمه وينقطون فيه سمن ياما قبل الماء وتعافى
وش القصه يافلان ومرتك محاد لها اليوم ثالث
علمهم بالقصه وافرضو على اخوياه اللي كانو معه يجلون عن القبيله بعد ماسودو عليهم.


الابيات

عديت بالاشعلي واجر بالونه
....................اجاوب الورق واقنب كني الذيبي
جيت الوعد خالي ٍ ماكنه جنه
................... الله يسود وجيه اللي على الشيبي
اقفو على مزهبي والبشت والشنه
.................راحو عليهن يعرضون المشاعيبي
والله لو اني عليهن مايتعدنه
...............لين اشهب الملح يسطي بالمصاليبي