الحيطة سمكها صغير ..إهداء إلى الشعب المقهور بالحصار والمعزول بالجدار

الحيطة سمكها صغير


إهداء إلى الشعب المقهور بالحصار والمعزول بالجدار


حبيبة قلبى وعنيا

يافجر كان أغلى هدية

ياحلم عابر من زمان بيزُق فيا

زقّنى ...وأوصل لحدك

وآجى أحضنك ....بيشدنى

يـــــــــــــــــــــاغنوة الحرية!

ياطير مسافر وحدته بتضم فيا

وحشتينى .....سامعانى ؟

حبيبة قلبى إزيك ؟...وحشتينى



كلامك على عينى

يا أول حب خلاّنى ..

تراب ينداس فوقِيه رجليك

ياما عَصَرتك ف الضلوع والدموع ماليَه عنيك

ياما سقيتك من حنينى

بتهرب ..وجىّ تقول وحشتينى ؟


ماهربتش........


لسّانى ماخلصتش وماجاوبتش

ولسَانى عزف عن الغنى ..مابيغنيش

الحب مات .! .....والقلب مات. !

والعين ماعدتش تشتهى كل اللى فات

والحلم اللى كان بيزق فيك عجز وشاب

والحد اللى إنت وصلتله أصبح هضاب

لو غنوة خرجت تِتْحشر فيها الآهات

يتسِقط منها الحروف

لــــسّاك بتشوف؟

عَميت خوفك ولاّ عِميت م الخوف؟



بكاكى والله على عينى

ومهما احلف بتبكينى



ماتحلفليش....بقيت كذاب

تشوفنى ف عز البرد "عريانة" ماتسترنيش

وتيجى الشمس تفضحنى كما الخاطية ...

بجسمى اللى إتملى خرابيش

تحب تشوف؟!

وماتبكيش ....بقيت مكشوف



كفاياكى...

مين اللى قالك تحاسبينى؟

مين اللى ضيع دنيته وحَمَاكى ؟

لو ع البكا ياما ببات باكى

لو ع الغنى مابغنيش!

الأهر عشش فوق جبينى وجتتى

تحبى تشوفى؟

ولاّ مابتشوفيش؟

بقيت زى المجتمع متصاب بفاش

بيفش غله فى الوطن

يصبح أفيش !!

والحب أصبح داء مابيداويش

والأرض تنبت بدل الغنا خفافيش

أنا ميت .....وحق الله أنا ميت

وسايب جتتى فى التيه تعيش

السُكْر خِصلة ف الحياة

والعقل غربة ف البدن مابيعديش

ومهما تشدى عليا بحزامك

كلامك ......مايوجعنيش !!!



معسول كلامك ياصبى !

مالى بموتك والنبى ؟

مطرح ماتبقى ف جنة ولاّ ف نار..مابينا جدار

الغيم حاصرنى...والعزلة بتحاوط عليا

خاتم الأحلام خلعته

والضريح بيشد فيا !!

وبإختصار:

أنا مش هموت ......

والخطوط اللى إتسطرت بين الفراق..

مش هتمنع إنى أسمع نجمة بتنادى عليّا

مش هتمنع إنى أغرس كل يوم الشمس فـيّا

مش هتمنع إنى أحلم برجوعى تانى صبية !!

وخلى بالك..

لو زفير الحب مرة طالك

راح يوقعلك حيطانك !!

وإن مهما تقـّوى فيها - صدقنى يا ابنى - مش هتكبر

لإن حيطتك مهما كبرت....

هيفضل سمكها صغير

هيفضل سمكها صغير




تمت

تسلم يابن النيل

متشكر جدا جدا

يا أستاذ صادق