نفسى فيك....
ياللى ف غيابك شاغلنى
ياللى بوجودك شاغلنى
ياللى لمّا بيجى إسمك
بين حروف الحب شامخ بيوانسنى ..
ويجالسنى
نفسى فيك...
نفسى أستنشق عبيرك
نفسى أعبـُر بين بحرورك
نفسى تلقانى ف طريقك
نسمة دايبة أو وردة شايبة
أو بنت خايبــــــــــة
نفسى تلقانى وخلاص . !
ده انت لخـّصت الأمانى
ف انك إنت تكون حاسسنى
ياللى ف الأحلام لامسنى
نفسى أكون لك توب لابسنى
نفسى أبقى طريق ماشينى
أو أكون تراب تدوسنى
نفسى أتحنـّى بحنينك
عاوزة أخطف اللى باقى من سنينك
ياللى حبك كل ماضى وكل آت
مش هعيش لحد غيرك
ومش هموت ف حد غيرك
لو يقابلك حب تايه ...
إعرف إنه آهه من آهاتى
وإنه نقطة ف بحر راشف
من حنين الحب ليك .
نفسى فيك....
أه لو بس أقابل يوم عنيك
راح هقطع منها الحتة العميانة
وهبعتر فيها ورود وزهور
وتشوفنى ف ليلك قمراية
تلقانى ف نورك فراشاية
فراشاية بتعشق بالفطرة
وبتفرش أحلامها على كتافك
وتطيـــــــــــــــر......
إيه ياسجّان الخواطر ؟!
ياللى خليت الميلاد ميلادين
كل يوم بترسم..
ف نن العيون سؤالين :
بتحبيه..؟
يالــــــــــــــــــــــهوى بـــَــحـِـــبـَــك !!
وسهمك إترشأ جوه !
طيب وهو ....؟
المهم إنك ف قلبى مستخبى
من عيونى ومن عـنـيـك
ومهما كان....هتكون إجابتى
إنى برده نفسى فيك....
ياحبيبى نفسى فيك .......نــــفـــســـى فــــــــــــيك
