قبل كل شي ..... حفر الباطن يسلم عليكم
---
تنويه هام جدا :
هذي اعاده لموضوع قديم ومغبر بتعديلات ( طفيفه ولا تذكر ) والسبب في الاعاده اني الان موجود بمقهى بحفر الباطن وقبل كم ساعه كنت بشعيب الباطن اتندح انا ومعي دلخ من ربعي ( وطبعا ام خمس رفيقة دربي معي وام خمس اللي يعرفها له جايزه طلي موديل 2020 ) المهم وانا اتندح بشعيب الباطن حول ام عشر تذكرت دور مضى ودنيتها خليليه والدموع بغت تسيل الشعيب .... بس خفت على الحفر لا يغرق وهونت بكا هذا غير ان رفيقي بغى يرقعني بالمشعاب ........ المهم مجرد اجترار لذكريات تعشى عليها الدهر بليلة قمرا وماباقي غير يحدرها بالعافيه تذكرت هالموضوع القديم وقلت اغثكم فيه والقدر ما يفوح الا على ثنتين .... والا انا غلطان وبالنسبه للازوال او اللي بهم عرق زوله يدحدرون منا ازين لهم .... وشلهم بالغثا :D
--------------- الموضوع : --------------
حاجز : ( نقطة تفتيش )
هذا الموضوع تعليمي بالدرجة الأولى ويحتوي على مشاهد مخله بالحضارة .... ننصح بعدم قرائته لمن هم فوق حاجز الستين عاما من العمر ...:)
دراما
المكان : طعس أبو درماح شمال شرق النفود الأكبر على حجاجك الايسر وانت طالع من ام الجماجم
الزمان : يوم جمعة من سنة 1422بعد الهجرة
الشخصيات الأساسية : ..عليان ....المعزب وراعي الحلال والكل بالكل ... فهيدان : ولي عهدنا الأمين والحجاج الأيمن لاخوة والمفوض العام بجميع الصلاحيات .... حكيم رحمان ( بنغلاديشي ) راعي الجلد والجلد بفتح كل الحروف فتحة مقاس رفرف يعني مط الجيم واللام .. والجلد مصطلح شمالي صعب على غير اهل الشمال فهمة وهو يعني الغنم اللي ما معها طليان ( ارامل على مطلقات على عازبات و عانسات .. الخ ) ...... التوم سرالختم ( سوداني ): راعي الرغث يعني المطافيل _ امهات العيال _ والمطفل هي ام الطلي المرضع وفي رواية اخرى لعليان المطفل هي كل ذات طلي من الغنم ..... مشعل ولد محمد ( لزوم السعودة ) وهذا راعي البهم ...... والبهم للي ما يعرفه هو كل طلي ( خروف ) او رخلة ( انثى الخروف ) بلغ او بلغت الحلم من ذريه الأغنام وحل فطامها وأقتربت ساعة بيعها او اعدامها .
--------------- البدايه ---------------
الساعة تشير الى الرابعة الا كم شخطة حسب التوقيت الصيفي لطعس ابودرماح .... عليان يتمرغ ويتململ على فراشه الوثير وهو عبارة عن قطعة حريرية مصنوعة من الرمال المخمليه والمأخوذه بتصرف من طعس ابو درماح الاصلي الناعم ... ويملق عيونه وييفكر) يناظر باللغة القحطية ) للسماء ويعد من اليمين لليسار ما تبقى من النجوم في السماء ويفز مذهولا لان الوقت راح والدنيا على وجه صبح ... اصبحنا واصبح الملك لله ... الصلاه ... الصلاه ... ويقوم عليان ويتوضا ويعين من الله خير وبعد ما غدا (يعني ارعب ) على الموجودين وصحاهم صلابهم فرض ربه ..
--------------
الساعة ستة ونيف ( وش رايكم بكلمة نيف ) يبدا مشوار الوجبة الصباحية لرعية عليان من الغنم ومرفقاتها ... التوم يشغل الددسن ويحط بها عشر اكياس شعير وعشرين ربطة ( لبنة ) برسيم ويساعده فيها راعي الجلد وراعي البهم ويتم توزيعها على ثلاثة اماكن مختلفه لكل رعيه مكان يبعد عن الاخرى مسافه كافية حتى لا تختلط الغنم ويقع المحظور . فهيدان يزين القهوة وعليان يغير ( يهجم ) على الخيمة يدور التمر والجبنة والمعلبات لزوم العيشة ( بداوة اخر زمن ....اكلهم معلبات) .. التوم يمسك كم رغوث ( الرغوث هي ام الطلي ) ويحلبهن ويجيب الحليب... . حكيم يخبز لنا بعد الانتهاء من واجباته المعتادة .
------------
الساعة سبعه وكذا شخط فوقها .... يجتمع الجميع بظلال وايت الماء ( سقس او حصنيه ) يفكون الريق ( يفطرون ) وينظرون بعيون مليانه وله وعشق للحلال ..... والجميع يتناولون الافطار الصباحي .
-------
الساعة الثامنه صباحا تبدأ المهمة الأصعب وهي ترضيع الطليان اللكايش ( الايتام ) ويقوم الجميع للرغث وتصير عفسة اطرح تربح كل نعجة بها زود حليب والا ترملت بموت طليها يمسكها ((التوم ))والا ((فهيدان)) ويرضع بها حدا اللكايش المساكين ... وتستمر المعركة الى التاسعة صباحا ويخرج عليان منتصرا من المعركة وغبار المعركة لا يزال ساكبا خلفهم .... وتركض خلفه اللكايش فرحة وسعيدة وبطونها ترج من الحليب والخير .
-----
الساعة التاسعة وفوقها خزله ( كمشه ) يتجه التوم وبقية الرعيان للمرعى والثغاء يجلجل خلفهم ويعود عليان ومعه الحجاج الايمن فهيدان للخيمة سالمين غانمين ويخلدون الى قيلولة مغتضبة تمتد الى منتصف النهار او بعده بقليل .
-----
الساعة المعلقه برواق الخيمة تشير الى الواحدة والنصف من منتصف النهار واشعة الشمس الذهبيه تنعكس على رمال الطعس لتكون لوحة جماليه نادرة تستنهض كل ما تختزنه النفس البشريه ( مسكت ) ويرفع عليان رأسه منتشيا بجمال الصورة ولسان حاله يقول
يا هيه ياللي متنحرين الوسيعة ...... مرو بخلي وصلوله سلامي <<<دوووووووووووس;)
----
الساعة تصتدم بايقونة الثالثه عصرا .... يخرج عليان في جوله تفقديه لاحوال الرعية ممتطيا صهوة الددسن العريقة بنت العراوي الاصيل ومتجندا بشوزن ام خمس لحاجة في نفسة ...
----
الساعة الرابعة عصرا ينتهي المبجل عليان من هموم الجولة اليومية بعد ان اوعز بكامل التعليمات والتلميحات للمسئولين لديه ولاخوة الفاضل فهيدان وكذلك بعد ان ادى اليمين الدستوريه المعتادة لابو فروة بحفظ الود والبقاء على العهد ... وابو فروة هذا اكبر المراييع في رعية عليان مرياع ابن مرياع يعني اصل من كل ابناء الطائفة البربريه والسواكنية والاستراليه ... والا تدرون والنجديه بعد ... وهو من اقدم المراييع ويعتبر الاب الروحي لرعية عليان ويكن له الجميع الاحترام والتقدير .
----
يتوجه عليان ممتطيا صهوة الددسن الى شعيب الباطن يبحث عن الصيد الوفير ويصتدم على حين غرة بجول ( مجموعة طيور وبلغة اخرى رف طيور بس الغره هذي مدري منين طلعت ) من ماركة ابو حليق الشهيرة ويبدا مشوار الصراع الابدي من اجل الحياة وتدهر ام خمس ( الشوزل )وتنتهي الجولة بخسارة فادحة لفريق ابو حليق قدرها ثمانية وعشرون حليقياً تكفي لاعداد كبسه بريه بنكهة ابوحليق .:D
----
الساعة تقترب من السادسة ينظر عليان الي الشمس وهي تكتسي بحلة الغروب ولسان حالها ( الشمس ) يقول اني أستأذن بالإنصراف فيلوي عنان الددسن متجها نحو المضارب منتشيا باحاسيس النصر ويرفع عقيرته بصوته المجلجل بهجينيته الشهيرة
يا راكب اللي يهجني ×××× من باب حايل لعماني ....... الخ
ويقترب من المضارب محملا بالصيد الثمين .... ويبتسم ابتسامته المعهودة التي تكشف عن نوايا ضروسه الخلفية ويسدل الستار .( موسيقى مقتبسة من مسلسل اردني يقال انه بدوي ) .:cool:
--------------------------------
طبعا قريتم الموضوع وتقولون هذا وش عنده ، ما فهمنا شئ بقولكم يا طويليين العمر ،؟:eek:
سؤالي ، ماهو رأيكم بالمسلسلات الخليجية برمضان ؟:D:p
/
/
/
/
/
/
مكثر من حركات البزران
هههههههههههههههههههههه
لاجد ، كثير منا يتنكر لحياة اجدادنا واهلنا عندي واحد من العيال كل ما ادق علية حزة العصر الا يقول بالسوق او بمقهي انترنت وهو وجهه ما يساعد للامور هذي دايم مرثع الله فية ، مرة دقيت علية الا واسمع وراه ثغاء واصوات غنم ، طلع الرجال يروح للغنم ويعلفهن وما يعلم احد من الشلة علي بالة انه عيب وخاف يعيرونه بالصبي ويقول انه بالسوق او بالانترنت يعنني متمدن وراعي اتكيت
المثل يقول اللي مالة اول مالة تالي ، والرسول صلي الله علية وسلم خير قدوة لنا ، الرسول كان يرعي وهو خير منا وصاحب رسالة :)
كلكم قريتم السطور اللي فوق بالله ما اشتقتم لحياة البر والروحات والجيات فية ، ما اشتقتم للمطامر ورى الجفيرات (( جمع جفير )) :D
الله علي زمان مضي !!!<<اخص يا الشايب :p
الموضوع فية اكثر من تعريف
طبعا الموضوع طويل واطول من طريق ام سدره ....... الله يعين اللي وصل للسطر هذا
وعندي له سؤال فني ..... أي ازين لاهل الصيد الدحاريج والا القميري .... ولا يهون ابوحليق:p
