ياليل داوي كان تقدر تداويه
قلبٍ من الدنيا تزايد مصابه
يبكي ألم صرخه قهر في محانيه
من هو سمع ياليل غيرك عذابه
عن هم عمره مالقا من يسليه
عاش اليتيم اللي نسته القرابه
تعصف به رياح الشقا ماتخليه
يقدي طريقٍ تاه فيه وغدابه
مرسى الأمل ياليل وينه موانيه
من يرشد التايه ويجلي ضبابه
متخاضعن للهم والياس والتيه
خذاه حلمه للتعب ثم سابه
حتى الرفيق اللي تعزه وتغليه
أليا طلبته حاجةٍ صك بابه
لو تبصره وقتك يا مكثر بلاويه
يرتاح منه اللي توسد ترابه
مير صل فرضك /واجبك لا تخليه
ومقسومك أرضا به/لا تطرد سرابه
عش واقعك وانسا حلومه وأمانيه
مابالحلوم إلا العناء والكآبه
وإن ضاق بك وقتك فلك رب ناجيه
لا تشتكي لغيره ترا الوقت غابه
يقولها أللي مالقا من يداويه
وقلبه من الدنيا تزايد عذابه
