سعود ابن ماجد الدويش ...... الوقت ماغير ابعير الدياحين ...... الرثيع بن حسن
ياسعود انا واللي له الملك والدين = ماشوفك الا طلبة ٍ من سماها
غيث ٍ تبارك فوق الاقصى والادنين = تحدته شمس الضحى واقتفاها
واصبح كما عدن اوروده محيمين = عوب ٍ محاحيله تجاوب غناها
تنصاك بالشدات روس وكـراعين = بعض الذيابه ماتحصل عشاها
تقفي عن القمرا وتصبح على البين = سحم الضواري والهبوب اتحداها
تتلا الضعوف اللي تباكا على الضين = ماتنعرف بوجيهها من قفاها
عقب الوثاره تعترض بالصوالين = دنياً على الله سيلها ومغزاها
لاسكة ٍ عدله ولا مخرج ٍ زين = بعض المقاود خايب ٍ من رجاها
تزعل على الفاضي وترضى بلا شين = لو تنجلب للسوق محدن شراها
روس عليها من سلفها تياجين = تغيرت مايندرا وش بلاها
اطيبهم اللي فاتحله دكـاكـين = واليا عطاله حاجة ٍ مانساها
والوقت ماغير ابعير الدياحين = اسمه على جسمه وهو ماتلاها
تفرق بناته عن بنات البعارين = والناس يعرف طيبها من رداها
موحيت راس ٍ ماله امتون ويدين = رجل ٍ على العليا تسابق اخطاها
شبحه قدم ماله وراء ايسار ويمين = لو تعترض روس الافاعي وطاها
مثلك يا أبن ماجد زبون المخلين = زينة مطير ابشوخها وعقداها
وابن الدويش اللي من أول وهالحين = يجمع مطير اليا تشظت عصاها
مقابس الفتنه اكعام المعادين = لاثارت الهيجا ودارت رحاها
يوم السنين اعجاف والناس عجلين = كم عقلة ٍ راجو على جال ماها
ان اقبلو مثل السباع المجيعين = واليا انتحو دلو ٍ تصرم ارشاها
ربع ٍ فعايلهم عليها براهين = زعيمهم ماجابته من نماها
فيصل ولد سلطان مافيه شيخين = لاعدت اشيوخ العرب وومراها
ترجح بأخو جوزاء جميع الموازين = ماهي سوالف مسردن ماحماها
اليا غدى الصمان مثل البساتين = كنك تشوفه بالفياض ونباها
تمرح جواده من جغبقا لأم قرين = لو أ قفت الدنيا على ماوراها
عليك من وصفه ارسوم ونياشين = تصوطها صوط الجمل وتعصاها
ولاضنتي مثلك على العسر واللين = يامبتدى الكلمه ويامنتهاها
جيتك من أقصايه وأنا خاطري شين = باحت بسدي بيح الله خفاها
غديت مثل اللي يموح الجناحين = واليا قضبله صيدة ٍ ماحتماها
دون الحوايم يبتلش بالثعابين = هكا الوجيه اللي على الله وفاها
والله هو المعطي بلا شك ومعين = عالم خفا روحي على مستواها
لامطوع ٍ وقراء تبارك وياسين = لاكــاهن ٍ شمس المعارف قراها
سيف ٍ من الفولاذ عقب السلاطين = تنسف عليه ام العباير غثاها
متشفقن عقب الحبارى الكراوين = هكا الوجيه اللي قليل ٍ حلاها
علميبهم يوم المراجل هكا الحين = احضهم حض القطاه النماها
واقفوا وانا مالي بطرد المقفين = كلن يموت وحاجته ماقضاها
.
.
.
تقبلوووو
تحياتي
محتار والله
رد: سعود ابن ماجد الدويش ...... الوقت ماغير ابعير الدياحين ...... الرثيع بن حسن
صح لسان الشاعر الرثيع بن حسن الرثيع
والشيخ سعود الدويش يستاهل القصيد والمدح
لاهنت اخي الكريم
رد: سعود ابن ماجد الدويش ...... الوقت ماغير ابعير الدياحين ...... الرثيع بن حسن
محتار والله
قصيده في منتهي الرقه والجمال
والاخ سعود الدويش ستاهل كل الحروف الابجديه
ويستاهل المدح
مشكور اخي الغالي على النقل الرائع
رد: سعود ابن ماجد الدويش ...... الوقت ماغير ابعير الدياحين ...... الرثيع بن حسن
ياسلام لله درالرثيع ومليون صح لسانه على هالقصيدة الجزلة بماتعنية الكلمة وليس اي قصيدة
انا اشهد انه شاع كبير واسندها على من يستحقها الشيخ وبن الشيوخ سعود الماجد الدويش
كل الشكر لك ياأخ محتار على نقل هذه القصيدة ولاهنت .ز
لك تقديري
..
رد: سعود ابن ماجد الدويش ...... الوقت ماغير ابعير الدياحين ...... الرثيع بن حسن
مرحبا سيف ابوحدين
صح بدنك طال عمرك
تقبل ودي
رد: سعود ابن ماجد الدويش ...... الوقت ماغير ابعير الدياحين ...... الرثيع بن حسن
ياهلا فيك
اخوي جندي خفاره
صح بدنك والله يعطيك العافيه
رد: سعود ابن ماجد الدويش ...... الوقت ماغير ابعير الدياحين ...... الرثيع بن حسن
ياسلام لله درالرثيع ومليون صح لسانه على هالقصيدة الجزلة بماتعنية الكلمة وليس اي قصيدة
انا اشهد انه شاع كبير واسندها على من يستحقها الشيخ وبن الشيوخ سعود الماجد الدويش
__________________________________
ياهلا ومسهلا
قصيده في منتهى الروعه والجمال
يابو نادر
مرور رائع وجميل تشكر عليه يابو نادر
