السلام عليكم ورحمة الله وبركاته
هذه مختارات من طرائف الشعر النبطي ارجو انها تنال جزء من اعجابكم
وابدأ بالشاعر الكبير ضيدان عندما زار
صديقه سعد فتأخر عليه في تقديم القهوه والقدوع فقال
جاك المسير مالقى منـك ترحيـب
لاجبتلـه قهـوه ولامـن قدوعـي
ياليتني دورت غيـرك معازيـب
جيتك جويع ورحت منّك بجوعـي
الظاهر انك ماتعـرف المواجيـب
لاشك طبعك يختلف عن طبوعـي
حنّا لاجانا الضيف ننفض له الجيب
ونجيبله من كـل شكـلٍ ونوعـي
عاداتنا والرزق من عالـم الغيـب
هذا وانا ابخل واحدٍ مـن ربوعـي
فجاء سعد بالقدوع والقهوه وقال غاضبا
اقدع عسى يقدع على راسك الذيب
في خايعٍ مابه من الناس دوعـي
متعطـلٍ بالبـر قبلـي تناقيـب
من ليلة الجمعه ليـوم الربوعـي
ومروك ناسٍ غايب عنهم الطيب
وخلوك وحدك في مكانٍ يروعـي
ثم جاك ذيبٍ ماسنونـه بتركيـب
ذيبٍ ولد ذيبٍ وشـرس قطوعـي
سوّى بك سواةٍ على غير ترتيـب
يجزع لها قلب الشجاع البتوعـي
مرحوم ياعودٍ كسا راسه الشيـب
هنديته تـذرف عليـه الدموعـي
وهذه مساجله ايضا بين سعد وضيدان عندما طرأت على سعد فكره
جهنميه وعرضها على ضيدان وقال
:
ضيدان ماودك نشكل عصابه
نحتل بعض بنوكها والمحلات
اما يجيلي ولك قدر ومهابـه
والا تبيتنا بيـات الشريفـات
والرجل ودك يشتهر في شبابه
بالطيب والا بالعلوم الرديات
ولكن ضيدان رد على هذا التفكير المتهور بحكمه وبعد نظر قائلا
لاتحسب انّا ياسعد وسـط غابـه
هاللي تراوالك تراهن عمـارات
وموضوعك اللي جبت كله غرابه
والظاهر انّه من سابع المستحيلات
واخاف لاتنبـح علينـا الكلابـه
ثم هات نسلم من مخاليبها هـات
ويابوك ماعمري دخلـت النيابـه
ومن العمر ماباقيٍ كثـر مافـات
وان كان تبغى الراي قيبل ايغدابه
من واحدٍ جرب جميع الحيـالات
خل الحطب للي يعرف الحطابـه
نهارنا شمـسٍ وبالليـل لمبـات
قد يسبب الغزل حادثا داميا كالذي حدث لهذا الشاعر
يا بو ندى ويلاه ماغيـر اونـي
مكدتي صارت عليّـه خسـاره
اكد عبري مير هـن ضيّعنـي
بالشارع الفرعي يمين العمـاره
نويت الف وشفتهن واخرزنّـي
اربع بنات وصاحبك بالغمـاره
مريت ابيهـن ياولـد يشّرنـي
عيّن وانا ياخوك مامن جسـاره
قويت قلبـي ميـر ماهرّجنـي
علكت من غيض الجمر والزقاره
بغيت اسولف ياخلف واسفهنّـي
طرت عبري والمناوي دشـاره
ياحيف شفني مابقى غير سنّـي
وعكازةّ صارت عليّـه عيـاره
بدون ذنـب بزينهـن دودهنّـي
اعدمت ضايع وموترين واشاره
تعرض الشاعر عبد الله السلوم لموقف لايحسد عليه عندما وجد ونش المرور يجر سيارته الجديده
بدون أي ذنب اقترفه وهاهو يحكي لنا الامر بالتفصيل
:
لقيت الونش يسحي موتري في ساحة الديـره
ركضت وقلت:يا سواق خبرني وش الجاري
انا ماخطيت بالماقف وتخطيطـه وتنميـره
وش اللي خصصه بالجر علمني وش الطاري
خزرني بالعيون الصفر واسرع لي بتكشيره
يقول اني سحبته ياقليـل العـرف بخيـاري
وقفت ارجيه كني عبده اللي طايلـه خيـره
وهويضحك مثل مايضحك فليحان بمكـاري
مشى قدام وجهي مانشد عنـي عسـى قيـره
يصلّب في مكانه لين يذري فوقـه الـذاري
وتستمر الحكايه الى قسم الشرطه حيث دفع الشاعر الغرامه واترد السياره:
دفعت اللي طلـب منـي وحطـه بتقريـره
ورجعت بموتري للسمكره لو توني شـاري
وهذه قصيده لشاعر وحداني سخّر معلوماته في مجال الحاسب الآلي في قصيده وضع
من خلالها اسسا تكنلوجيه لتطوير علاقة الحب التي يمر بها ويقول
نويت استعمل بحبك نظام الحاسـب الآلـي
نويت ادخل برامج ملتقانا كـل عصريـه
نظام ادخال يحفظها بلا تزويـر واشكالـي
على دسكٍ كما لو كان مطبوعات صوتيـه
حقوق الطبع تحفظ لي بالاول وانتي يالتالي
واحذّر من اعادة نسخها نسخـات عاديـه
لاني ما قدرت اجمع حروف الحب يالغالي
خصوصـاً لاتكلمتـي بطريقـه بهلوانيـه
جمعت ولاطرحت وصار ناتج قسمتي خالي
وانا نسبة نجاحي بالحساب اثنيـن بالميـه
وهذه قصيده للشاعر عبدالله اللويحان عندما زار اسبانيا لعلاج عينيه وبعد شفائه مضى يمتع
نظره فيها ويمتدح امانة اهلها مشجعا على السياحه قائلا
:
باسبانيا يامـا نظرنـا مـن الزيـن
وين انت ياللـي تـو عجّـة شبابـه
اوقف على الشارع ضحى يوم الاثنين
تشـوف زيـنٍ مـا يعـدد احسابـه
اشكال واجناس كمـا شـرّد العيـن
هاك الخشوف اللي طـوالٍ ارقابـه
الا ومع هـذا مـن الغـدر امينيـن
نزيلهـم كنّـه مـن اقـرب اقرابـه
يظهر من الغرفه ويرجع بعـد حيـن
والله فـلا تلمـس مخابـي اثيـابـه
سيراتهم حلوه وهـم مثـل حلويـن
لاتسمـع الشحـذه ولابـه انهـابـه
لعب الامل واليأس مباراة في كرة القدم داخل قلب الشاعر سويد العنزي من عرعر
وهو يقول معلقا على هذه المباراة
:
امس العصر كان الامل يشكي الياس
في ملعب الاحزان داخـل فـؤادي
صارت فعاليّات واصبحت انا الكاس
والظاهر ان الياس اقـوى النـوادي
يوم العبوا في ملعبٍ كلـه امـواس
الياس يلعب والامـل حيـل هـادي
والياس سجل قوول والضد محتاس
مـن كـورةٍ مخطوفـةٍ بانفـرادي
وهذه قصيده للشاعر عبدالله البراك يخاطب بها صديقه سعود حين شاهد فتاة غنيه
وتذكر حالتهما الماديه وقال
فوق الشبح ياسعود حطت ايديهـا
وانته وانا يا خوك نكشخ ابنيسان
انا اشهد ان الوقت مرهي عليهـا
ماهو بمثلك في هوى الدين غرقان
وانا ادري ان دنياك بلشان فيهـا
لاوفيـت ديّـان تذكـرت ديّـان
المصدر كتاب المستطرف النبطي
ارجو ان تنال اعجابكم
