بنيت لحبها قصر بقلبي مترف وخلاب

ألا يا دمع لا تذرف دخيلك وش هي الأسباب
وش اللي يجبرك تذرف وتكسر في الهوى عيني

وتحرقني ليا منك ذرفت وتحرق الأهداب
وتكسر بي شموخ ما خبرته انكسر فيني

شموخ ما أنكسر فيني على كثر الهوى الغلاب
وكثر جروحي اللي من صدوق الحب تكويني

من اللي يجبرك تذرف من اللي يجبرك تنساب
وتروي خدي الظامي وتنبت به بساتيني

وتشمت فيني العشاق وتشمت فيني الأصحاب
وتشمت بي مع الأصحاب ناس(ن) ما تدانيني

ترى الشاعر له حروفه مثل ما للسباع أنياب
ليا من ضامته دنياه وردها المياديني

ألا يا دمع ويش ينفع خفوقي كلمتين عتاب
ما دام إنه عشق بنت غشاها الملح والزيني

دلال ضمها قلبي.. عشقها ..مات فيها ذاب
تولع في هواها لين قام الحب يرثيني

عيون كحلها يذبح..يدين مزينه بخضاب
شفايف تستفز الصبر وتصحي شياطيني

من وصوف القمر فيها ولكن ويش جاب الجاب
ما دام إن القمر يبكي ليا قامت تحاكيني

يقول أرجوك لا تكشف حقيقة حسنها الجذاب
ترى الناس لامنها درت صارت تجافيني

صحيح الحسن في محبوبتك ما منه شخص إرتاب
ولكن طالبك هالشىء يبقى بينك وبيني

وأنا من شانها مع غيرها ما حسبت حساب
إذا هاذي تحاكيني وإذا هاذي تناديني

بنيت لحبها قصر بقلبي مترف وخلاب
قصر بين القصور المترفه ما مثله إثنيني

قصر كانت به أركانه وفا والصدق فيه أطناب
سياجه أوردة قلبي وحراسه شراييني

تعبت أزرع شجر أرض المحبه والقدر حطاب
تعبت أعلق أمالي على شماعة سنيني

تعبت أقفل لحبي باب ويفتح للحسايف باب
تعبت أجامل النسيان وأقول إنه ينسيني

تعبت أدمح خطأ كذب الظنون وأطلع الكذاب
تعبت أكذب على نفسي وأقول الحظ يخطيني

تعبت أودع الذكرى وأحس بحرقة الأعصاب
تعبت أقفي عن أشواقي ولا تبغى تقفيني

إلين أصبحت ما افرق ما بين الحب والأعجاب
يميني صارت يساري ..يساري صارت يميني

غدت في قلبي الفرحه تشع وتعلن الأضراب
وقلبي مل من جرحه ولابه من يداويني

غدى قلبي مثل طفله بريئه والجروح ألعاب
تبي تلعب إلين أتعب ..تعذبني وتشقيني

غدى مثل العقيم اللي تمنى نعمة الأنجاب
وإذا أطروا له الأنجاب هلت دمعة العيني

وإذا هاذي معاذيرك وهاذي كلها الأسباب
شموخي طالبك يا دمع لا تكسره فيني

أنا رجال ما أحب الدموع اللي على الأحباب
أموت بعزتي أهون ولا حب يبكيني

قصيده جميله ورااائعه بمعانيها
وبصراحه كل بيت احلى من الثاني
لله درك ياجندي خفاااااره وتسلم
هالانامل اللي كتبت هالقصيده
.............

هلا وغلا ولد محماس
وشاكر لك على المرور العطر

صح لسانك قصيده جميله ورائعه , تقبل مروري وودي .

مشكور اخي غنام
والله يسلمك يارب

لاهنت اخي الكريم جندي على النقل الرائع صح لسانك ولسان قايلها


تقبل مروري



خيك


سيف

مشكور اخي سيف على مرورك العطر