ستار آكادمي .. سوبر ستار !

[align=center]ستار آكادمي .. سوبر ستار !
^
^
تعددت الأسباب .. والموت واحد !


قدّر الله علي وقررت ( في حالة يأس شديد .. وغفلة ) اني أخذ ملفي واقدم على أي برنامج له شعبية في أوساط ( الكمخ ) من أجل الشهره .. واستغلالها في أهداف ( نبيلة عبيد ) .. خاصة وان الحكماء يقولون ان الشهرة تستر عيوب واجد ! ( أجل بالله ذا البنغالي اللي في ستار أكادمي " الامارتي " يستاهل من يناظر خشتة وشعره ذا اللي تسنّه خوص نخل ... ومن زين الطبايع يتهيبل ويسأل : أين حبيبتي ليلى ؟) !!

كانت مشكلتي الوحيدة ان صوتي شين .. ونفسي ينقطع ومعي كحه مزمنة << على ذا المواصفات المفروض أقدم ملفي لمستشفى الدرن وأمراض الصدر !

ومع هذا وجدت دعم لا محدود من وكيل أعمال ابليس في المملكة << وكيل معتمد له فروع في كل مناطق المملكة حتى المشاعر المقدسه له فيها فرع ( ولو انه يخسر على فرع المشاعر كل سنه ميزانية ترميم عقب الحج والرجم ) !!

**

تم قبولي في برنامج ستار آكادمي .. ودقت علي (مدام رولا ) << وكيل بليس في لبنان والمنتدب من الحكومة الفرنسية !

قالت مدام رولا : ترانا قبلناك في البرنامج ونبيك تجي بيروت باتسر .. ولا تجيب معك شي ابد .. تراك محفول مكفول .. !
جمعت خلاقيني وركبت أول طيارة رايحة لبيروت .. وفي المطار استقبلني واحدن من زبانية البرنامج ( ما أدري هو ذكر وإلا أنثى ) ؟! << طرّاه ان وجهه مافيه شعر .. وجادلن راسه ويديه ناعمه ودك تلحسها ( وجه واحدن ماقد شاف خير ) !!

.. وصلنا للبيت اللي بيصكون علينا فيه مع الشباب والصبايا .. المشاركين في البرنامج !! ( وجه متحسف على اوقات ثمينة قضاها في استراحة مافيه الا تماسيح وكرب وجيههم تقطع الرزق ) !
ومن يوم دخلت في البيت وانا ذابن الميانة .. وماغير اخمخم في ذا الصبايا والشباب ( ما بينهم فرق واجد .. البودي واحد .. واللون واحد .. والمكينة وحده ) << مهنا فرق الا تسان ارتداد البلدية !!

**
يوم راحت السكره .. وجت الفكره .. عرفت اني توهقت في سالفة مهيب لي .. ولا نيب لها !! ( وجه واحد متوهق وبحلن بعمره ) !!

اثر الدعوى فيها قومة صبح وتمارين رياضة .. ودراسه .. وتهيبل .. ونهاق وفوق هذا وذاك .. تشوف العسل ولا تذوقه !!
ومراقبه اربع وعشرين ساعه ( يعني مافيه امل تنفرد بخشمك ابد .. ولا فيه أمل ترقد على بطنك وتسوي حركة الحوت اللي يسوي نافورة ) !!


**

قربت من الكاميرا .. اللي في الصالة .. وقلت : نداء نداء لأقرب خفير على كنترول المراقبة .. بليزززز .. ابي مدام رولا .. في كلمة راس !!

يوم جت تركض .. وقالت : سم آمر .. أحد دعس لك على طرف ؟! .. أحد تحرش بك ؟! ( وجه يقول ايه هين .. الخوف عليهم ) !!

قلت : لا والله بالعكس كل الشباب خكاريه وما منهم خوف .. والصبايا دبش يضحكن على مهناش .. ويبتسن على مهناش !!
بس انا أحس اني منيب نافعن في البرنامج ولا ابي اكمل .. ابي ارجع لبيتنا .. مشتهي فنجال قهوة مع الوالد والوالده عقب المغرب ..!! ( مع اني داري ان اهلي بيستقبلوني في المطار بــ"لي" أحمر .. وينفشون جلدي )!!

وانا ان بغيتي الصتز يا مدام رولا .. ما عندي شي ممكن اقدمه للبرنامج !!

قالت مدام رولا : ذاك منول يومك في عند اهلك تقول ذا الحتسي .. الحين .. ما فيه طلعه من ذا البيت الا عقب ما نستوفي منك حق التذكرة والتوضيب والسكن والاكل .. وبوسات الصبايا ( وجه جنية معها عداد .. وحاسبتن عدد بوسات الشباب للصبايا ) !!

قلت : بس .... يا مدام ... انا ما عندي ما عند جدتي .. أخاف اوهقكم وأخرب البرنامج .. تخبرني شكلي ما يساعد .. وصوتي رايح فيها .. ناهيك عن اني ما اعرف البس كنادر وما اقدر استغني عن الزبريات !!

قالت مدام رولا : اترك عنك البربرة .. والله ان تقعد في البرنامج وان نحلل قيمة تذكرتك واقامتك لو نخليك تجيب خبز لاهل البيت كل صبح ! ( وجه يقول منحاشين من استعمار اهلنا .. وتوهقنا باستعمار ذا الشيفه ) !!

**
قعدت في البرنامج .. وقلت مهيب مشكلة .. كلها اسبوع واصير ( نومنيه ) واطلع وارتاح !! ( وجه يحتري لحظة توديع الصبايا والشباب والخمخمة على المسرح ) !! << عشان ينقهرون عيال الاستراحة !!

**
بديت اتهيبل .. وأخرب قشان البرنامج ( مرتن اعلق صروالي على الكاميرا .. ومرتن ارجم الدرايش .. ومرتن أطبخ رز تالي الليل )<< شهوة نسوو!

ومن زود الخبال قمت اعلم الصبايا والشباب السامري والخبيتي .. الين صارو يطيحون زيران !!

يوم جاء يوم الثلاثاء .. وقعدنا في الصالة ... نحتري اعلان اسماء النومونيه .. واقعد اعضعض في برطمي .. يعني اني خايف اصير نمونيه ,, وانا تسبدي تقطر على النومنيه .. يوم قالت المذيعه ترى النومنيه ( فلان اللبناني وفلانه التونسيه وفلانه المغربيه ) <<< كلهم صارو نومنيه عشانهم طاحو زيران على أغنية ( يا رولا .. بااحي .. صبري ومزاحي .. وان جيت ابوسه .. طلّع لي ضروسه .. وان جيت أخمه .. صيّح يبي امه ) !!

**
انا عرفت ان أقرب شاة للذبح هي ذا التونسية ... ( اللبناني بيفزعون معه اهل لبنان .. والمغربية بيفزعون معها أهل الخليج . .. والتونسية بتروح طعام جحوش ) !!

قلت انا مستعد أخذ مكان التونسية في النومنيه . . ( يوم بغت تطلع علي مدام رولا مع الشاشة ... وقالت : والله ان ما جزت عن ذا السالفة .. ان اخلي اذاني واذانك اربع !!) <<<< عاد انا ذروووق كلش عندي ولا التهديد !!

**
قلت اجل مهنا الا تسان اخربها في حفل البرايم !

كان مطلوب مني اقدم فقرة سامري في البرايم .. وبيمسك الصف معي فرقة استعراضية فرنسية "حمران عطران" !! << خلق وفرق .. السامري عندنا تخصص غربان .. وفي البرايم بيصير طيور زينه !!

يوم جاء دور فقرتي في الحفل .. وانا أخربها واستنزل .. واطيح عليهم .. واقعد ازبد .. وامحّط بعمري على المسرح .. ابيهم كودهم يطردوني !! يوم قامو الجمهور يصايحون .. ويشجعون .. يحسبوني ارقص " راب " وإلا " بريك دانس " !! ( خشة واحدن يشجّع ويحتريني أسوي حركة الدوده ) !!


قمت وتدربيت الين طحت من على المسرح ... ابي يعطوني فيزة خروج نهائي من ذا البرنامج اللي سلبني أعز ما أملك ( وجه بزر يحفظ سوالف الأفلام ولا يدري وش تعني ) !! << أجل الله لا يخزينا أعز ما أملك ؟؟

ومع هذا ... زاد حماس الجمهور .. وتعلقو في اكثر .. وصارو الصبايا يصاحين ويشاهقن .. واللي أغمى عليها .. ( وجه مستغرب ) !

واسمع وحده لبنانية .. تقول للي جنبها : يجنن .. هيدا .. الشاب .. مهضووم كتير... !

يوم سمعت المذيعة تقول : هيدا هو الشاب السعودي .. اللي يملك كارزيما مش معؤله ... وستاااايل خاص .. واضح من نوعية هالحزااء اللي ما عم يستغني عنوو ابد"ن" ..... !! <<< اثر زبيراياتي جايزتن لهم !!

يوم شفت انهم مستقعدين لي .. وما فيه امل يطلعوني من البرنامج .. واروح لذا التونسية اللي بتطلع من البرنامج واخمها شوي تسنّي اواسيها .. وانا اناظر في الكاميرا .. ولسان حالي يقول ( أحدن معه خله ,،، ويناظر الساعه ) !!

بتلت كل اسبوع اودع شاب والا صبيه .. وراس مالي هبال وزبيريه !! وصار الاعلام يتكلم عني وعن الكارزيما اللي عندي ( ترى الكاريزما مثل الحساسية مالها دواء ) !!

وبدأ الناس والنقّاد ( مع الخيل يا شقراء ) وصرت بين ليلة وضحاها .. فنان وأعرف كلش ( تمثيل .. وغناء .. ورقص .. وتقديم برامج .. وتقديم نصائح للمصاخين واللي ضايقتن صدورهم ) <<< بالعربي صرت محش ومجرده !!

السؤال اللي يطرح نفسه ..!


من أنا ؟
ولماذا اخترت الطريق الوعر ؟ << ما تسنّه اسم مسلسل ؟
وهل وصلت الي ما وصلت اليه بروحي .. او بمخطط استهدف مدخرات بلدي ؟!
هل ستبقى "زبيرياتي" تلعب نفس الدور في مجتمعي ؟ ام ان زبيرياتي .. بتختفي وسط زبيريات مجتمعي ؟!! ( وجه خايف يتصفق بزبيريه من الهيئة مثل بعض الناس ) !!

وأخيراً ... تهقون ان مدام رولا .. طلعّت راس مالها .. من استضافتي في البرنامج وإلا خذت حقها أضعافا مضاعفة والبركة في الكمخ اللي طارو في العجة تسنّهم اول مرة"ن" يشوفون زبيريه ! او حفلة سامري !؟!!

أخيراً .. هل ورد في الموضوع اسم هشام عبدالرحمن ؟ << طرّاه الكاريزما !!

انتهى ........! [/align]

القلب النابض بالنسبة للي يشارك براحته
بس تمنيت

يكون محور حديثك للي يرزون خشتهم على الشاشة لمتابعة احداث منزل ستار اكاديمي

واللي يدفعون من جيبهم الريالات للتصويت

كان يكون انفع

وشكرا لك

والقضايا اللي تتعلق بالمجمتمع لابد ان يكون طرحها منطقي وجدي يكون افضل وجهة نظر واحترم ماتفضلت به


وشكرا

[align=center]يا هلا فيكم اخوي ابو جراح واخيرا احد رد علي موضوعي ههههه
اول شئ مشكور علي تعقيبك وفية شئ الكبير من الصحة
وثاني شئ بالنسبة لكيفية طرح الموضوع صدقني ما ينفع الجدي هالايام لانه لما يشوفة الزاير بيحط رجلة لانه كل كلمات صعبة علية ولا هو فاهم شئ منها فحبيت اطرحة باسلوب عامي مثل ما يقولون
علي العموم احترم وجهة نظرك عزيزي
تحيتي[/align]