مجموعة من قصائد الرثاء التي قيلت في وفاة الشيخ / غازي ابن حبشان الحميداني رحمه الله

بسم الله الرحمن الرحيم



http://www.mustaqbl.com/ghazy.jpg
الشيخ : غازي بن حبشان رحمه الله تعالى

القصيدة الأولى
لشاعر مطير الشاعر : فلاح العراك

[poem=font="Simplified Arabic,6,black,bold,normal" bkcolor="transparent" bkimage="./images/backgrounds/2.gif" border="solid,4,black" type=2 line=1 align=center use=ex num="0,black"]
البارحه جفني حلا النوم عافه = جاني خبر موتة رفيقي مفاجاه
والموت سنه بس غازي حسافه = ليت تعدى يم غيره وخلاه
ليته تعدى عن رفيقي وطافه = الله يبيحك ياشجاع ٍ فقدناه
حطوا عليه من النثايل لحافه = والعمر لو طالت سنينه هذا أتلاه
لو جاء الطبيب وعجلوا في إسعافه = من جاه يومه كثر الأطباب ماأحياه
جعله ليا فكوا حزايم لفافه = الحور بالفردوس الأعلى تلقاه
ويروف به مولاه راعي المرافه = ويمحي الذنوب اللي عليه وخطاياه
شيخ ٍ يحب الطيب لو به كلافه = وليا نخيته جاك كله من أقصاه
ما قـّـط شفنا فيه نقطة ضعافه = والحمل لو زادوه فرده تهقواه
أشقر وعذروبه ماغير الصلافه = ليا شافه الصقار قام يتمناه
لحاق لو راعيه جــّــود كتافه = حرش ٍ كفوفه من قنص فيه عشاه
ليا شاف خرب ٍ طار والخرب شافه = طقه بكفه نطح وإلا تقفاه
وعقب حرار ٍ منه وأطيب خلافه = إمعلمات ومن بغى الصيد يلقاه
نوادر ٍ ما قيل فيهن عذافه = تحتار ما تختار هذا على ذاه
فيهن على برقا الجناح انحذافه = صقارهن خرجه من الصيد يملاه[/poem]

القصيدة الثانية
للشاعر : نغيمش ابن تركي الزويكي

[poem=font="Simplified Arabic,6,black,bold,normal" bkcolor="transparent" bkimage="./images/backgrounds/15.gif" border="solid,4,black" type=2 line=1 align=center use=ex num="0,black"]
البارحه ما غمضن العيوني = سهرت لين الصبح بانت مواريه
من يوم جوني بالخبر وأبلغوني = هلت دموعي وأمطر الدمع صافيه
ياناس كفوا العذل لا تعذلوني = اللي تقولونه من العذل ماأوحيه
مرحوم ياشيخ ٍ بكنــّـه عيوني = والعين ماكلن ليا مات تبكيه
أبكي ودمع العين غرق جفوني = وأقول يا غازي وأهوجس بطاريه
وداع يا شيخ ٍ يحذف الصحوني = غيث ٍ لهتاش الخلا مع عوانيه
ماهو من اللي وقتها يلبدوني = يهد جمعاً ما يحسب قوافيه
ولا هو من اللي بالضيــّــق يجحروني = يا شيخنا اللي ما تبيت نواعيه
شجاع حول حماه ما يقربوني = والخصم لو طال الدهر ما يخليه
أبكيك يا فكاك تالي الضعوني = عوق الخصيم اللي بعيداً هقاويه
ما قلت في راعي الوفاء سامحوني = غازي زبون وعون من يعتزي فيه
له نظرة ٍ قدام ماهي بدوني = والموت ليته ما غدابه مخليه
ناس تبي مثله ولا ياصلوني = صميدع ٍ يعجبك فعله وطاريه
ولنا عواريف العرب يشهدوني = وإلا الخطا محدن يوقع لراعيه
من غاب كل المجتمع ينشدوني = ولاهقوتي ببريه شخصاً يساويه
أقولها لو بعضهم يزعلوني = وإلا ترا الطيب حشا ما نعانيه
عساه بالجنه وخضر الغصوني = ياالله من كل الخطايا تكافيه
أنت الرحوم اللي بعبدك حنوني = رحمتك يوم العبد عندك تناجيه
ترحم عبيدك يوم غيب الذهوني = من يلتجي بك ترحمه ما تخليه
وقبل أنتهي يالطيبين اسمعوني = لو قلت ما عندي حشا ما يكفيه
وعقب لنا اللي جعلهم يسلموني = اللي بقى من فعل غازي توفيه
عياله اللي للخطر يدحموني = شيوخاً ذراهم من زبنهم يذريه
كل الجماعة يمهم يرجحوني = ليا جيت هذا قلت ذاك متعديه
صلوا على الهادي بها وأعذروني = محمد شفيع الخلق كله وهادية[/poem]

القصيدة الثالثه
للشاعر : عطالله بن باخت الهجله

[poem=font="Simplified Arabic,6,black,bold,normal" bkcolor="transparent" bkimage="backgrounds/6.gif" border="solid,4,black" type=2 line=1 align=center use=ex num="0,black"]
في ذمتي كني على الصدر مقدود = بمصقلاً مارده إلا نصابه
البال ضاق وصاير الفكر مشدود = ولن جيت أبكتب ماأستطيع الكتابه
ماكل رجال ٍ ليا غاب مفقود = كم واحداً لا غاب محدن درابه
وكم واحداً لا مات تشهد له شهود = والموت ما خلا النبي والصحابه
غازي ولد حبشان رجال معدود = له مع جميع الناس قدر ومهابه
لا والله إلا أقفت به ليالنا السود = شيخاً على جمع العدا يندعابه
شيخاً يحل عقود ويعقد عقود = أشهد شهادة حق من روس لابه
لا قيل غازي قالوا معرب جدود = يحسب على كل الصعايب حسابه
هو راعي النخوه وهو راعي الجود = وهو راعي الطوله من أول شبابه
غازي رجل بالدين والصدق محمود = لاقال جابه ماتبدل بجابه
دون القبيله دايم يذود ويذود = ركن القبيله كان جات الطلابه
اليا اعتزا صايد ولاهو بمصيود = ولابه ولا رجلاً طمع في جنابه
يصل الحراوي ساعة الضيق ويزود = يا كثر ناس ً تشتكي من غيابه
أقفت ركابه والعوض عقبه اسود = شيخاً عطيب مغذي اسود غابه
بالطيب والطولات جاذبهم العود = شجاعه ونخوه وعرف ورحابه
يالله يامعبود ياخير معبود = ياحي ياقيوم منشي سحابه
يامن خلقت وكلاً إليك مردود = يا عالماً بالكون واللي سعابه
يامنجياً ذا النون يا ناصراً هود = أنته رجانا مايخيب الرجابه
تغفر ذنوبه عد ماهبت النود = اوسعله بقبره وثبت جوابه
في دعوتي لا تجعل الباب مسدود = رحمة جليل الملك تسبق عذابه
يارب لا تجعل دعانا بلا فود = نطلبك بيمينه تسلم كتابه[/poem]

القصيدة الرابعه
للشاعر : عبدالكريم الظفيري

[poem=font="Simplified Arabic,6,black,bold,normal" bkcolor="transparent" bkimage="./images/backgrounds/6.gif" border="solid,4,black" type=2 line=1 align=center use=ex num="0,black"]
الموت حق وكل نفس ٍ لها حين = ومحدن يموت أو ينولد قبل حينه
باللي كتب رب المخاليق راضين = وكلن كتابه خط بأعلى جبينه
هذا طريق ٍ كلنا فيه ماشين = حتى لو إن العبد طالت سنينه
واللي وهب عمره ودنياه للدين = هذا كتابه ياخذه في يمينه
وغازي ولد خالد أمير الحمادين = تبكي العيون بغيبته لأجل عينه
وين أنت ياللي غيبتك طولــّــت وين = وفي غيبتك كلن سأل قال وينه
مرحوم يا شيخ ٍ على العسر واللين = طال الطوال النايفات الحصينه
حلال عسرات النشايب من البين = ريف الضعيف اللي حياته رهينه
طيبه مثل زايد وباسه كما حسين = وشجاعته مثل الأسد في عرينه
وتواضعه مثل الملك بالدواوين = وعدله عدل جابر وحنكة جهينه
من لابة ٍ تلطم خشوم المعادين = الطيب يلبسهم وهم لابسينه
خيالة ٍ فوق الأصايل مغيرين = حمر النواظر عمرهم مرخصينه
إن جيتهم باللين تلقى بهم لين = مثل البحر لا شال حظن السفينه
وإلا القساوة كل ابو مطير قاسين = مثل الحديد الصلب محدن يلينه
هذاك غازي والحقايق براهين = واللي يتنكر للحقايق نهينه
جده وأبوه وجد جده سلاطين = شيخ ٍ على أهل البادية والمدينه
الفرم وإبن سويط والشيخ أبو ثنين = وكل العرب لغياب غازي حزينه
يا الله يا خالق عبادك من الطين = أغفر لمن بالطيب بيضاء يدينه
وخل القبر يارب ورد ورياحين = ورطــّـب ترابه بالجلال الحسينه
آمين يارب المخاليق آمين = ياللي بيدك نفوس خلقك رهينه[/poem]

القصيدة الخامسة
للشاعر : معجب بن محسن بن شرعان العبداني

[poem=font="Simplified Arabic,6,black,bold,normal" bkcolor="transparent" bkimage="./images/backgrounds/8.gif" border="solid,4,black" type=2 line=1 align=center use=ex num="0,black"]
دمعتك ياراس عباد في عصر الربوع = والله ان ابطي وانا مانسيت اسبابها
جعل عيناً لإبن حبشان فاضت بالدموع = ما يلوذ السهر في نونها وأهدابها
يجزع الحر النداوي على الحر الجزوع = كلمة ٍ قبلي سبيل المسمى جابها
كلمة ً فيها لمن يبخص الأنواع نوع = الغبي ما همته والذكي يشقابها
آخر أيام البنادم نزول ٍ من طلوع = والختام بساعة ٍ ما غفل حسابها
يا جنان الخلد ياشيخنا اللي مايتوع = لو غدت روساً تقدي ولا يقدابها
ضبضبوا مع ساقته مثل ضبضاب الفزوع = لو تضف بشوتها بين ٍ ضبضابها
نادر النــّــدر وراه اللزايز والتبوع = والحرار الصيرميه تعرف عقابها
الحدوم الصاطي الفاتك الصلف البتوع = شيخنا شيخ الحمادين قطب أقطابها
موقف زحول المواقف على ركبه وكوع = ترتخي من قدح عينه سيور أرقابها
أمرداً ما ينتروض ولا أعتاد الخضوع = كود للي واهبه سمعة ٍ يحكابها
شيخته من يوم عصر المعارك والنجوع = شيخة ٍ تلقى سند صفحة ٍ بكتابها
يوم عترات النمش والأشده والدروع = والعرب ماتستوي روسها وأذنابها
يوم إبن حبشان غازي يلوع الجمع لوع = كم أصيلاً منه تردح على ركابها
له على بلعوم وقفه وطاريها يشوع = مفخره لمطير لولاه مافزنا بها
ذاك غازي في سنين ٍ طفت عنها الشموع = جد غازي في سنين ٍ تساوينا بها
يوم ابو فارس يخلي ذراع الخصم بوع = لو عليه القبه اللي تمس أطنابها
ضربته تودع متين الضلوع بلا ضلوع = ان برا مضهارها مابرا مضرابها
ياجنان الخلد يا قاطع لسان اللذوع = يارصيد مطير في الضيق يا محرابها
يا ثقيل الروز ياأنزه نزيهين الطبوع = يا مشرع بابها يا مقفل بابها
يامطوع عاصي الأمر لين انه يطوع = يا سنام بريه يا محتمي مرقابها
انته اللي وان تقدمت ما تطري رجوع = ما تدوس إلا حنيش ٍ تحك أنيابها
أنت مثل الجمع وحدك ولا مثلك جموع = وصيحته منته وراها يحوم غرابها
وأنت لك فجباه الأخصام ميقاع وقوع = وقادر اعد الوقايع وأعد أصحابها
في صلاة ٍ مابها لا سجود ولا ركوع = كم عيون ٍ فيضت مابها من مابها[/poem]

القصيدة السادسة
للشاعر : محمد بن خالد الحميداني

[poem=font="Simplified Arabic,6,black,bold,normal" bkcolor="coral" bkimage="./images/backgrounds/.gif" border="solid,4,black" type=2 line=1 align=center use=ex num="0,black"]
عسى فصل الربيع اللي ليا طــّــول ثلاث شهور = تجي كل السنين المقبله ما تابس أوراقه
عسى قبر ابو فارس من هماليل السما ممطور = تواصل بين زلزال الرعود وبين براقه
نواوير الخزامى فوق قبره من ثلاث زهور = يالين الورد فوقه ينتثر باقه ورا باقه
عسى يطاف حوله صبية ٍ كاللولو المنثور = عسى مثواه جنات التعيم وطيب أعباقه
لونه ضيف عندي ما ذخرت بحلتي مذخور = اجل وشلون دامه حل ضيف ٍ عند خلاقه
جبل ضله ضليل ٍ وطور شانه بالنعالي طور = وعلى كثر الأمور اللي جرتله ماحد ٍ واقه
خلج وضحاً جنبها عقب موته مايبي المقهور = تجاوب بالحنين وعقب ما أقفن أرزمت ناقه
بكته الجرع وخشوم الثمامي والخبب والخور = بكى لغف النفود وجاوبه زراق وطراقه
بكت ظلما القراين والقسومي والشعب والغور = بكت حتى العزايم والهمم والصبر والطاقه
لو ان الدمع يحيي هيلعن تحت الثرا مقبور = ليمشي وادي الباطن من حجازه ليا عراقه
على شيخاً تحدينا المصايب في ذراه دهور = عن الرمضى براد ويدفي السبرا بمشراقه
وبقى بيت الكرامه عقب توديع العزا معمور = بمواريث الحرار لمن زبنهم يذري رواقه[/poem]

القصيدة السابعه
للشاعر : فالح بن محسن الراشدي الحميداني

[poem=font="Simplified Arabic,6,white,bold,normal" bkcolor="black" bkimage="" border="none,4,gray" type=2 line=1 align=center use=ex num="0,black"]
قال الفتى فالح من الوجد هاضني = رجم ٍ طويلن في ذعاذيع نودها
عديت فيه عصير والعين شافت = غدر الزمان وبيح الله سدودها
دمع ٍ جرا مني على الخد وإنتثر = أودع جفوني والمحاجير سودها
غازي رحل لو كان فالقلب باقي = لاهان راسه في مطاوي لحدودها
تراب الندى ماترتخي منه هامه = من جاه بالشدات يرقى سنودها
شيخاً يذوب لوطيته جامد الصخر = صوت الصواعق من مرازم رعودها
تبكي عليه معكرشات الجدايل = وخيلاً تدك من الحوافر حيودها
لاشك له من صقلت الراس عزوه = ستر العذارى ما بقى من فهودها
فارس كما حر ٍ بروس العوالي = لا يابعد من بالهدد قل فودها
من سرح البلها لظلما غصيبه = يوم ان غيره ما تعدا حدودها
متسلسلاً بين الجدود العريقه = صم الحوافر بالحرايب تقودها
ومسلط على العدوان سيف ٍ مجرب = حطم معالمها وقطع كبودها
مسلط صليب الراس ذخري من الملا = نسل الشيوخ اللي عريبه جدودها
وماجد على أسمه جا وسيع البنايد = يافخرها ياذخرها ياعمودها
تقصر يمينن طايله دون تركي = يمناه للعايل سريعاً ردودها
تمت وصلوا عد وبلن من الحيا على الوطا وشعابها مع نفودها[/poem]

القصيدة الثامنه
للشاعر : نواف جاسي بن مليح الحميداني

[poem=font="Simplified Arabic,6,black,bold,normal" bkcolor="transparent" bkimage="backgrounds/7.gif" border="solid,4,gray" type=1 line=1 align=center use=ex num="0,black"]
عصر الربوع اللي مضى يفج سنين = فجعة قبايل ماأنفجعبه قرابه
اكبر قطب لمطير شلناه الحين = وسط القبر قمنا نساوي ترابه
مرحوم ياشيخاً نعتك الملايين = يالله طلبت انك تفرج كرابه
خالي ولد خالد لطام المعادين = لا جاء نهار الكون غازي إيجابه
شيخاً تعدى شيخته للحمادين = حتى النجوم اللي تعلت تهابه
شيخاً رسم للمجد كتب وعناوين = كل الكواكب تحت مجده تشابه
غازي على فعوله شهود وبراهين = ما تنحصي يا ناس عند الكتابه
له ميزة ماكشر بوجه مسكين = وإلا اليتيم بفزعته له صلابه
له ميزة ٍ فمصادم اللي مسمين = ما ضاع حق ٍ دام غازي سعابه
وعند الحقوق البينه يوفي الدين = ما يضرب إلا راس شيخ العصابه
حراً شهر بالمرجله بين حرين = خالد ولد غازي وغازي سمابه
والله ما جابت شبيهه ولا عين = من الفرات إلين توصل صبابه
اقولها الحين واقول بعدين = لو يحملن البيض ماله مشابه
شفت الحزن بعيون كل المعزين = كلن يقول الشيخ وين العزا به
يالله عساه بجنة الخلد آمين = قولوا معي يا سامعين الإجابه[/poem]

القصيدة التاسعه
للشاعر : حبشان بن فالح بن حبشان الحميداني

[poem=font="Simplified Arabic,6,white,bold,normal" bkcolor="darkblue" bkimage="" border="solid,4,white" type=2 line=1 align=center use=ex num="0,black"]
قامت تصاريف الزمن تطوي البين = والموت يشعب كل يومن ركابه
لله في خلقه شوؤن وقوانين = وحنا على نهج الولي وثوابه
نؤمن بأن الخلق ماهم بباقين = لابد من يومن يجي في حسابه
ويوم الثلاثاء يوم مامرنا لين = خيم علينا هم حزن وكآبه
لا مافقدنا فيه واحد ولاأثنين = إلا فقدنابه جموع وقرابه
مرحوم يا شيخ الصخا والحمادين = مرحوم ياشيخ ٍ عزيز ٍ جنابه
من وين أببدا فيه وإلا أنتهي وين = علق على راس الثريا كتابه
ماقول من فقده تضيق البلادين = اقول من فقده تضيق الرحابه
وماقول من فقده يسيل أزرق العين = أقول سالن المدامع صبابه
مازودته ألقاب وإلا مسمين = شرواه يعطي للأسامي مهابه
جدد مفاهيم ٍ وسطر عناوين = يا طيب أخو نوره وماأكبر صوابه
طرياه تبقى دين وذكره بعد دين = خالي ويوم أبكيه ماهي غرابه
يبكونه الأجناب قبل القريبين = وتبكيه وضحاً ربعت في هضابه
وغير البشر تبكيه حتى الميادين = ومحقبة تبكي وظلما خرابه
حماي تاليها على العسر واللين = كسب المدايح غصب ماهي نهابه
ويوم ان جدانه تصادم سلاطين = غازي يصادم من سطا الراس لابه
سقم الحريب كعام راس المعادين = كم شن من غاره وشب الحرابه
ستر العذارى يازبون المخلين = ما صك في وجه المخلين بابه
يا جامع الثنتين دنيا مع الدين = من قال بأن موت الأوادم مشابه
أحد ٍ ولو هو حي مالناس دارين = خبلن مايسوى ملي طارف ثيابه
وإلا أنت لوك غبت حين ٍ بعد حين = ذكرك وباقيلك موارث ذيابه
لعل قبر ٍ ضم راسك لثنتين = بستان يسقيه الولي من سحابه
ويالله يا منزل تبارك وياسين = إنك تحشره بالنبي والصحابه[/poem]

[align=center]وللإستماع الى القصائد الر جاء الدخول الى هذا الرابط

القصائد بالصوت والصوره[/align]

الله يرحم ابوفارس ويغفرله




صح لسان كل شاعر من هالشعراء والحقيقة كل قصائدهم قوية ونقلت بعض مايميز الفقيد من مكارم


وعزالله أن ماقلوفيه هالشعراء صحيح ويستاهل اكثر من ماقالو فيه الله يرحمه .



الشكر كل الشكرللشعراء خاصة من غير الحمادين . أما الحمادين فهذا واجبهم ليس فيه منه .






عفاك الله يابوجراح على النقل ونجددلك احرالتعازي والموساة والله يرحم الميت ويخلف على الحي ويبقيه



ابونادر




....

مشكور أخوي الغالي ابوجراح0وشاكرين ومقدرين لك هذا المجهود الطيب لانك طيب
والشيخ غازي رحمه الله ستحق اكثر من ذلك0000000000
وكما قال اخوي ابوانادر00شعار الحمادين هذا واجبهم والله يعطيهم العافيه ويسلمون
واما شعار غير الحمادين فلهم من جزيل الشكر والعرفان والاحتام وبيض الله وجيههم
وصحت السنة الجميع000000000
جمل الله حالك يالسنافي 0ولاهنت ياابو جراح0
وان شاالله البركه فيك انت وخوانك وجعلكم ساالمين غانمين
ومن اخوك لك صادق المحبه والاجلال00
اخوك --برق الوسم

مشكور أخوي الغالي ابوجراح0وشاكرين ومقدرين لك هذا المجهود الطيب لانك طيب
والشيخ غازي رحمه الله ستحق اكثر من ذلك0000000000
وكما قال اخوي ابوانادر00شعار الحمادين هذا واجبهم والله يعطيهم العافيه ويسلمون
واما شعار غير الحمادين فلهم من جزيل الشكر والعرفان والاحتام وبيض الله وجيههم
وصحت السنة الجميع000000000
جمل الله حالك يالسنافي 0ولاهنت ياابو جراح0
وان شاالله البركه فيك انت وخوانك وجعلكم ساالمين غانمين
ومن اخوك لك صادق المحبه والاجلال00
اخوك --برق الوسم

الله يرحم موتانا وموتى المسلمين


انا لله وانا اليه راجعون

اعلم انه ليس كل رجلا يغنيك عن رجل اخر


اشكر جميع الاخوة الشعراء على صادق مواساتهم ورثاءهم لفقيدنا الوالد رحمه الله تعالى غازي بن حبشان

وجميع من قام بالتعزيه سواءا حضوريا اوهاتفيا


واشكر مرورك الفاضل ابونادر فعلا الشعراء من الحمادين واجب عليهم ماقاموا به وليس منه

واشكرمرورك العذب الاخ الفاضل برق الوسم وانشاءلله من كان للوالد له معزه ومقدار فهو على ماكان بالنسبة لاولاده ونحن انشاءلله مهما علت مناصبنا فنحن ابناء القبيله لانذخر عنها شيئا وبالتأكيد اقصد قبيلة مطيرفهم والله عندنا اقرب من الحمادين وهم من نجالسهم اكثر من الحمادين ولايخلى بيت احدا منا الااحدا من القبيلة عند احدنا نحن اولاد قبيلة مطير
واسال ان يبارك بالطيبين

الله يرحمه ويرحم امواااااات المسلمين