[align=center]داخل اليوم كالعاده ,, مالي طاري حتى أرد ,, فجأة وأنا في رحلة استجمام مع نفسي، لمحت إيقونه مكتوب عليها : أضـف مـوضـوع ,,
وتذكرت وصية جدي قبل يموت يوم قال: يا ابونبض يا ولدي ,, لا ترد أحد يطلبك ,, تكفى ياولدي لاتفشلني بين القبايل.
طقيت صدري وقلت للإيقونه : يلعن ام اللي يردك يا بنت الأجواد ,, نضيف موضوع ليش لا أهم شي لاتزعلين علينا يا الطخمه وذبيت عليها الرقم (( اعنبوا بليسه أي شيء مؤنث يرقمه ))
وعلى طاري الترقيم ,, أعرف واحد من الشباب ,, مدمن ترقيم ,, مدمن شيء اسمه اكتب رقمك وذبه ,,
لدرجة ان أبوهم مرة راجع البيت وهو شاري صندوق طماط .. وشاف أخونا طماطه في آخر الصندوق متينه ومليانه وحمراء ,, عجبته ذب عليها رقمه ..<< تكفي لا عاد تنكت
إييييييييه اتركونا من خويي الحين وخلونا نرجع لسالفتنا الأصليه ,,
عندي موضوع والله انه يا جماعه فاقع مرارتي ,, مضيق صدري وفي نفس اللحظه لاحس مخي !!
أباطرحه قدام حضراتكم ,, وأنتم براحتكم, , إن بغيتوا اطرحوه أرضاَ أو ثبتوه جواَ أو دحدروا به علي المحذوفات
موضوعنا في هذه الظهريه هو : العبايات ,,, عباية المرأة ,, وآآه يا أخواني من سالفة المرأة وعبايتها لأن موضوعها ذو شجووون والمثل يقول: الشجووون ملعوووون
تكفون لا ينط لي واحد منكم ويقول: وش عليك منهم؟ وش دخل أم اللي جاب مندوبك ؟
لأني وقتها راح أقول له : دخلني الباب وألحس كفر الدباب
ولا يجيني واحد ثاني مطفي النور وداعس ثم يخش فجأة في عيني وهو يشربك ويقول: موضوع مكرر ,,
لأني وقتها راح أظطر أسدد له طراقين . الأول صدقي والثاني مكرر
من جد يا جماعة الخير ,, هل اللي حاصل حالياَ في الأسواق والعروس والشوارع .. اسمه عبايات ؟ ويسمى ستر وحشيمه ؟
سؤال أطرحه لكم ياحضرات القضاه والساده المستشارين وأبي منكم إجابه ..
أنا كـ شاب أعزب أشعث أغبر ما قد شفت الا شغالتنا السرلانكيه .. فجأة تشطفني في الشارع بنت عليها عباية أضوق من ثوبي !!!!! وش موقفي ؟ أكيد بأعض الأرض وأتمتم قائلا : ألعن أبو الصيده يا شيخ
أنا كـ شاب لما أجي السوق وألقى ثلاث بنات مروا من جنبي عليهم اسم طرحه والأكمام كأنها كراسيدا باكستاني أنواع الزخارف ,, وش ترجون مني ؟ أكيد ابليس بيدق علي بيجر ويقول: دز وراهم يا مال السيل
أنا كـ مواطن متحمس و لي حق العيش في هذا الوجود المنتعش ,, أروح المستشفى أبي أعالج راسي من الصداع ,,
ثم تصادفني في ممر المستشفى فتاة عليها لثمه كأنها ناوية تسرق وعيونها كحل في كحل وش أسوي ؟
أكيد راح يزيد صداعي وبأرجع من المستشفى مصدع ألعن من قبل والبركه في عباية بنت الأجواد
لا والمشكله ,, تلقى البنت شينه وشيفه وكأن وجهها قوطي داعسه وايت بس بالعبايه قسم بالله ماتقوم معها حلا شيحه
لحظه لحظه ,, كأني أشوف الأخ بندر راز سبابته اللي كنها عصا موكلي ,, تفضل اسأل :
والله براافو عليك ,, سؤالك جدا في محله .. نعم أحسنت من المسؤؤل (( صفقوا كلكم لبندر الدافور ))
دايم أسأل نفسي وانا من النوع اللي أحيانا في العصريه أجيب ترمس شاهي ومكسرات وأتقهوى انا ونفسي وندردش
بس الغريب ان نفسي من النوع الحياوي . تصدقون ماقد قالت لي ولا مرة: صب لي بياله
قبل فترة كنت جالس مع نفسي وحصل موقف رهيييب .. , سألتها : من المسؤؤل عن هالعبايات السامجه اللي انتشرت ؟ وين اخوانا اللي في الهيئة أو شااابين على مندوبنا حنا بس يا الشباب ؟ وينهم عن عبايات هالغزلان ؟
المشكله أن نفسي ما ترد لأنها مو لاقيه اجابه ..
سألت نفسي ثاني مرة : اعنبوا بليس هذولي ما وراهم أهل يقولون: هالعبايه عيييييييييييييب حراام !!
للمرة الثانيه تلتزم نفسي السكوت ولا ترد ,,
سألت نفسي ولثالث مرة : طيب وين الحمية ؟ وين أخوانهم الكبار عنهم ؟ أو بس جيدين في تحويم الحمام في السطوح؟
وللمرة الثالثه مارست نفسي السكوت وعطتني خامس !
سألتها لرابع مرة : طيب هالبنات وش هدفهم من عبايات الخصر واللثمه والدانتيل والزخارف؟ معقوله يبون لفت انتباهنا وفعلاَ راضين بالترقيم وتحرش هالمراهقين ؟
كالعاده لم ترد علي نفسي للمرة الرابعه وحقرتني !!!
عصبت انا ,, ,, وأنا من النوع اللي إذا عصب على طول يحمق قلت :
مو معقوله يانفسي .. ياختي قولي شيء ,, بالله عليك مو حرام اللي نعيشه في الشوارع والاسواق والمحلات وعند الاشارات ,, ياهوووه تكلمي انطقي بالله مو ظلم مو حرام هالعبايات تلعن جدفنا كشباب طموح . ردي يابقرة
وفجأة .. وبدون مقدمات .. طار الحب والفستق وانكبت زمزمية الشاهي وقامت نفسي علي وسددت لي ذاك الكف وشالتني ومحطت بي ثم انفجرت تصارخ علي تقول:
(( يااخي أزعجتني ياخي من يوم طبيت الثمانطعش الين الحين في الثنين وعشرين من عمرك وانك مزعجني بهالاسئله .
نعنبوا من جابك 5 سنين وانت شغال تجلدني بأسألتك لابوك لابو مخك لابو هالعبايات والبنات اللي تقول .
ياابن الذين آمنوا شغل مخك خلاص وقتك تغير .. هذا زمان البنت مو زمان الولد .. انت اللي تستحي وهي لا .. هي الجريئه وانت الحياوي ..
ياخي عاصر زمانك وخلك جنتلمان او ياخي انطق في بيتكم لااعاد تطلع ,, انثبر في غرفتك الله ياخذ شكلك وفكني .,,
لاعاد تتمشى بسيارتك ولا عاد تروح دوامك ولاعاد تطب الاسواق وكل تبن واقضب ارضك ,, جعلك الماحي قل آمين تكفىيا بندرأشطب يوزره والله انه ابلشني))
مرت خمس دقائق وانا فاقد الوعي وخايف من نفسي وقعدت أفكر في كلامها وبالذات كلمة :
إقتباس »
(( اقتباس من مشاركتها ))اقتباس:
ذا زمان البنت مو زمان الولد .. انت اللي تستحي وهي لا .. هي الجريئه وانت الحياوي ..
قمت ,, عدلت الزمزمية ,, جمعت الحب والفستق والقرضي اللي طاح ,, والتفت عليها وحبيت راسها وقلت :
سامحيني والله انك صادقه ابشري من اليوم ورايح ما هنا طلعه ووالله صدقتي في كل كلمه ,,
ضحكت وقالت لي : هههههههههه أعترف صح جلدتك ؟ صح أنا أخوف لما أكون عصبيه ؟
قلت: لا وفوق هذا والله انك حكيمه بعد .. الله لايحرمني منك ..
قالت : ولا يحرمني منك بعد أنت يا بعد روح روحي ..
السؤال : هل تتفقون مع ما قالته نفسي الحكيمه ؟ أم يا هل ترى بالغت وشطحت قليلا (( ماخذين بالكم من الفصحى ؟ ))
ليش اللوم والحكي كله على الشاب والبنت طالعه منها براءة ؟ ليش ؟ ليش؟ (( وجه واحد منهار في المحكمه ويقول: اغيثونا ))
اللي بيجاوب ..يجاوب ,, واللي مهوب يجاوب لا يجاوب .,
THE END النهاااااية
--------------------------------------
هذا المسلسل برعاية : شاي ربيع .,, مع شاي ربيع مش ممكن تضيع
نشكر محل ابوريالين اللي ومستشفى الملك خالد ومحل فول السعودية لسماحهم لنا بتصوير هذا المسلسل عندهم
كان معكم
القلب النابض[/align]
