°l||l° امثال كويتيه جميله لاتفوتكم °l||l°

سأنقل لكم هذه الامثال على شكل حلقات تبدا باحف الالف وتنتهي بالميم

أبَا زَيدْ حَالَهْ حَالْ رْباعْتَهْ

اِبْرِيقَهْ ما يَطْفِي حَريقَهْ

إبْلِيسْ ما يخَرّبْ عشَّهْ

أَبْلَهْ منْ حْبارَهْ

أبُو طَبعْ ما يْجُوْز منْ طَبْعَهْ

أبُوهْ الصَّايِغْ وْطُوقَهْ من ذَهَبْ

إِبْذِرْ الْحَبْ وِطْلبْ الرَّبْ

أَبْرَدْ مْنِ الثَّلْجْ

أَبْعَدْ مْنِ السِّمَا

إِبْن آدَمْ ضْعِيفْ

أَتْلا الطّب الكَيْ

أَثْبَتْ في الدَّارْ مْن الجدارْ

أَجْرْ وعَافْيَهْ

أَحَرْ ما عندي أَبْرَدْ ما عندك

إحْفَظْ مَالكْ بْنصَّه

أخَذْهمْ بشْراعْ ومِيدَافْ

آخر زمن

أَدّبْ ولدكْ وَلَوْ زْعَلَتْ امَّهْ

إِدْهَنْ سَيرَهْ

إذا الطمَّاعْ ماجُودْ العَيَّارْ عايشْ

إذا بَغيتْ الخَبَرْ يشيع عَطَهْ لأمْ بِزيعْ

اِمَّا حَبا والاَّ بَرَكْ

إذا حَجَّتْ البقرْ عَلَى قرونْها

إذا حَصَلْ الهَرسْ بطَلْ الدَّرْسْ

إذا سَلَمْ العُودْ الحَالْ تعُودْ

إذا صَار خَصْمكْ القَاضِي ... مْنْ تْقاضِي ؟

إذا طَاحْ الجمَلْ كِثْرَتْ سَكَاكِيْنَهْ

إذا طبَعْ دُوسْ تِرِيكَهْ

إذا طَقْ الخَشِمْ اِهْمَلَتْ العَينْ

إذا كثَرْ الشَّيْ قَلَّتْ أكَّالتَهْ

إذا نسَيْنا الحَمْدْ شِنْصَلِّي بَهْ

أَراوِيكْ اِنْجومْ اللَّيلْ بالنَّهارْ

إِرْبطْ الحْصَيِّنْ عِنْدْ الحْمَيِّرْ يِتْعَلَّمْ النّهِيقْ

إِسْأَلْ مْجَرِّبْ وَلاَ تِسْأَل طَبِيبْ

اسْتَسْمِحْ الوجُوهْ واسْتَرْزِقْ الله

أَسْفَرَتْ وانْوَرَتْ

اسْمَهْ أَكْبَرْ منْ جِسْمَهْ

اشْتَرْ طَيِّبْ وْرِدْ بفْلوسكْ

إِشْ حَادّكْ يا مِسْمَارْ قَالْ المِطْرِقَهْ

إِشْ حَدَا مَا بِدَا

إِصْبرْ والحَجزْ يُوَدِّيكْ

إِصْرفْ مَا بِالجَيبْ يَاتِيكْ مَا بِالغَيبْ

إطْعِمْ الحَلْقْ تْستِحِي العَيْن

أَطْهَرْ منَ حَمَامْ مَكَّهْ

أَعْطِ الخَيْلْ رَكَّابْهَا

أَعْمَى وِيْقُودْ مْفَتّحْ

أَفْرَضْ منْ الصُّومْ وْالصَّلاةْ

أَقْرَبْ مْنِ الحَاجِبْ للْعَيْنْ

إِقْطَعْ رَاسْ مَوّتْ خَبَرْ

إِقْعَدْ بحَضْنَهْ وانْتِفْ ذَقْنَهْ

أَكَلْ مَالَ الله وْمَالْ عْبادَ الله

إِكْلُوا وْنَاكِلْ يَا عْمَلانَا

أَلله أَرْحَمْ منْ خَلْقَهْ

الله أَعْلَمْ بْنَقَّادْ الدَّراهِمْ

الله أَقْوَى منْ خَلْقَهْ

الله خَلَقْ وْفَرَّقْ

الله رَبُّنَا وْرَبَّهْ

الله مِنْ عَصْرٍ مْضَى

الله يِخْرجْنَا مِنْهَا سَالْمِينْ

الأَشْقَرْ منِ الخَيلْ خَيَّالْ

الأَوّلِي لاَعبْ وْالتَّالِي تَاعبْ

إِلْحَقْ الكَذَّابْ لِبَيْتْ أَهَلَهْ

اللِّي أَكْبَرْ مِنْكْ بْيومْ أَفْهَمْ مِنْكْ بْسنَةْ

اللِّي بِالْفَخْ أَكْبَرْ منِ الطَّيرْ

اللِّي بْشِلِيلِكْ مَا هُو لِكْ

اللِّي صَارْ صَارْ لَكِنْ خَايِفْ منِ اللِّي يْصِيرْ

اللِّي عِنْدَهَا خَمْبُورْ مَا تْبُورْ

اللِّي فَاتْ مَاتْ

اللِّي فِي القِدْرْ يِطَلْعَه الْملاسْ

اللِّي فِي قَلْبَهْ يْطَلْعَهْ لْسَانَهْ

اللِّي فِينِي كَافِينِي

اللِّي فِيهْ رِيحْ مَا يِسْترِيحْ

اللِّي يَاكِلْ بْضِرْسَهْ يِنْفَعْ نَفْسَهْ

اللِّي مَا بَهْ خَيْرْ تَرْكَهْ أَخْيَرْ

اللِّي مَاخُوذْ حَيَا كَالْمَاخُوذْ قَهَرْ

اللِّي مَاخُوذْ مَا يِسْمَعْ صْيَاحْ

اللِّي مَا عِنْدَهْ عَتِيقْ مَا عِنْدَهْ جدِيدْ

اللِّي مَا عِنْدَهْ دَارْ كُلْ يومْ لَهْ جَارْ

اللِّي مَا عِنْدَهْ شَيْ مَا يُوخَذْ لَهْ شَيْ

اللِّي مَا يَدْرِي يْقُولْ حِلْبَهْ واللِّي يَدْرِي مِتْوَحْلٍ بَهْ

اللِّي مَا يَرْزِقَهْ الله تَعْبَانْ

اللِّي مَا يِرْضَى بِجَزَّهْ يِرْضَى بِجَزَّهْ وْخَرُوفْ

اللِّي مَا يِرضَى مْنَ أَهَلْ فَيلكَهْ

اللِّي مَا يِطْلَعْ عَلَى اْبُوهْ نَقَلْ

اللِّي مَا يْعَرف الصَّقِرْ يَشْوِيهْ

اللِّي مَا يْعَرْفكْ مَا يْثَمْنكْ

اللِّي مَا هُوْ يَمّكْ لاَ يِهْمّكْ

اللِّي مَا هُوْ عَلَى دِيْنكْ مَا يْعِينكْ

اللِّي مَا يْحَسْبنِي رَاسْ مَالْ مَا أَحَسْبَهْ فَايْدَهْ

اللِّي مَا لَهْ أَوَّلْ مَا لَهْ تَالِي

اللِّي مَا يْنُوشْ العَنْقُودْ يْقُولْ حَامضْ

اللِّي مَا ييَّسْرَهْ الله عَسِرْ

اللِّي هَذَا أَوَّلَهْ يِنْعَافْ تَالِيهْ

اللِّي يِسْبّكْ يِحِبّكْ

إِمَّا بِسْرَاجَينْ والاَّ بالظَّلْمَهْ

إِمَّا خَالْ والاَّ أَبُو ثِنْتَيْن

أُمْ الطّرمَانْ تَعْرِفْ لغَةْ عْيَالْهَا

أَمْرَ الله شَقْ القِرْبَهْ

أُمْ نَاصِرْ اللْسَانْ طْوِيلْ والحَيلْ قَاصِرْ

أَنَا أَمِيرْ واْنتْ أَمِيرْ مِنْ هُوْ اللِّي يِسُوقْ الحَمِيرْ

إِنْ القَحَتْ والاَّ مَا ضَرْهَا الفَحَلْ

إِنْ اشْتَدْ الحَرَجْ فَابْشِرْ بِالفَرَجْ

اْنتْ اْبُوهَا وْسَمْهَا

إِنْ فَاتْ الفُوتْ مَا يِنْفَعْ الصُّوتْ

إِنْ حَبّتكْ عَينِي مَا ظَامَكْ الدَّهَرْ

انْ رْفَعَنَاهَا للشَّارِبْ وانْ طَمنَّاهَا لِلِّحْيَةْ

انْ سَبَّكْ النَّذِلْ إِسْكتْ عَنْه وِارْتَحِلْ

إِنْ سَلَمْ العُودْ فَالْحَالْ يِعُودْ

انْ سَلَمْتْ مِن وِديعِكْ مَا عَليّ خْلاَفْ

انْ شِفْتْ شَيْ لاَتْقُولْ شَيْ

انْ شِفْتْ صَاحْبكْ حلُو لاَ تَاكْلَهْ كِلَّهْ

إِنْ صَارْ وْدّكْ مَا حدٍ يِرِدّكْ

انْ طَارْ الطَّيرْ قُولْ سبِيلْ

انْ طَاوَعَكْ الزَّمَانْ والاَّ طِيعَهْ

انْ طَالَتْ خَطَاهَا تَرَاهِي رَبَّاضَهْ

انْطرْ يَا حْمَارْ لَمَّنْ يِجِيكْ الرِّبِيعْ

انْ طَقَّيتْ أُوجِعْ وانْ عَشَّيتْ إِشْبِعْ

انْ عَدَّوْا الصَّرايفْ تَنَحْنَحْ الكُبرْ

انْ غَابْ القَطُو إِلْعَبْ يَا فَارْ

انْ غَابْ عَنْ عَينِي سَلاَ عَنْهْ بَالِي

إِنْفَخْ يَا شْرَيمْ قَالْ مَا مِنْ برْطِمْ

إِنْ كَانْ مَا عِنْدكْ سَنَدْ إِقْبضْ فْلُوسكْ مِن دْبَشْ

إِنْ كَثرْ سِمَادْ وإِنْ قَلْ رمَادْ

إِنْ لبَسْتْ إِلْبَسْ حَرِيرْ وإِنْ عَاشَرْتْ عَاشرْ أَمِيرْ

أَهْل القُبُورْ مَا يِشْتِهُونْ مْحَمَّرْ
مقتبس من كتاب الاديب الراحل
عبدالله النوري

بنت الكويت

الف شكر لج على الأمثال

وعلى مجهودك الرائع

تسلم

مشكور علي الرد الحلو

بنت الكويت
اتشكرك ملايين
يعطيك العافية حبيبتي
بانتظار جديدك

خالص حبي

فجورة

بنت الكويت مشكوره ع المجهود الطيب
ودمتي بود

يعطيك الف عافيه

امثله حلوووة


يسسسسلمووو

بنت الكويت


يعطيك العافيه


بس عاااد بنوته مو كل الامثال هاااي للكويت بس حنا متشاركين معكم بنصهااا هههه


والكويت واهله جميلين مو امثالهم بس


خالص التحاياااا

اشكركم علي الرد

اعزائي شرفتووني

هههههههههههههههه

اخووي احنا كلنا واحد