[align=center]هذه قصيدة للشاعر عبد الله بن زويبن الحربي قالها عند ما قال له أحد أصدقاءه أنا عندي قصايد لو تسمعها يا عبد الله ما عاد تقصد فقال أبن زويبن ردا عليه :
ياعلي قـول ولا لـواردك ملطـوم
ياراعي الخرمـة حديـد البقومـي
عندي علوم وخابـر عنـدك علـوم
وتبـي تعلمنـي وتاخـذ علومـي
لا كن انا ماني رفيـق لـك اليـوم
أنـا رفيـق للشقـاء والهمـومـي
البارحـة واليـوم ماجانـي النـوم
بيني وبينه مثـل حـرب النجومـي
سهران طول الليل لا أرقد ولا أقـوم
أقالـب الجنبيـن تقـل محمومـي
وأن نمت صحاني من النوم جاثـوم
اللـي يصحـي غارقيـن الحلومـي
الله على اللي مقدمـه تقـل مبـروم
شد الخواجه مـا ببديـه هشومـي
ماجِيب عـن السمكرييـن مصـدوم
ولا قيل هـو مسيـوم ولا نسومـي
مقوس الصـدام وجنوطـه كـروم
فكسار منـوة كـل راعـي لزومـي
إلى مشى بالخـط ولخـط مزحـوم
يروج مثل السيـل بيـن العقومـي
بالوصف كنه فـارس يمنـع القـوم
يرخي العنان ولا يحـزم الكمومـي
فـارس وشيـخٍ للمغاويـر زيـزوم
قـدام شيخـان العبـي والختومـي
شيخ بكفه رمح مسقـى ومسمـوم
أما مـن الدوشـان وإلا الفرومـي
وإلى أعترض خطه لشعبان وحـزوم
يشبـه لسبـاحٍ يغـوص ويعومـي
ما قص له لوحات بحروف وأرقـوم
إلا سنـد جمـرك بدفـع الرسومـي
أبيه عن دارٍ بهـا الصـدر مكتـوم
يبعد مسايـه قبـل أمـزع هدومـي
لأرضٍ يساقيها من الشبـط ديمـوم
ومن أول الوسمي عليهـا قدومـي
فياض وجبالٍ لهـن طـور ورجـوم
ملس المراقي مكنعـات الخشومـي
ما فقست بلجوفهـن بيضـة البـوم
مرفا الحرار مخاشـرات السهومـي
ماكنـي إلا عايـشٍ دايـم الــدوم
إلـى رقيـت مناطحـات الغيومـي
أرتاح وألقى متعة الطيـر بالحـوم
يوم الهوى ينفض شماغي وتومـي
وياعلي أنا قبلك عن الشعر أبا أصوم
زينه وشينـه مبعـدٍ عنـه حومـي
وش عاد ابا بالشعر والشعر مظلوم
وإلى سمعت النـاس ردوا عزومـي
اللي ليا سمعـوا شريـط أم كلثـوم
من الطرب كـل ٍ يطـق البهومـي
هيضتني يا ذخر من يذبـح الكـوم
في ساعةٍ فيهـا البخيـل مهزومـي
يقلط وهو كنه على الوجـه مرثـوم
يطيح وجهه مع وجيـه الرخومـي
وأصل البخيل خمام معطى ومحـروم
وكفه ليا جـات اللـزوم محزومـي
والنـاس بالأفعـال فايـز ومذمـوم
وإلى النواصي ما عليهـا وسومـي
وأنته مع أهل الطيب لك حظ وقسوم
وعن الردى في كل حال محشومـي
لك مسهمٍ بالطيب ما هـوب مثلـوم
ياطيب الرفقـة شريـف السلومـي
وتم الكلام اللي من الراس منظـوم
وعسى حياتك ( يازميلي ) تدومـي
وإن مت جعلك من سنا النار معصوم
في جاه غفـار الذنـوب الرحومـي
وعندما سمعها صديقه رد عليه بقصيدة ولا كنها ليست موجودة لدي للأسف الشديد ووجد أبن زويبن بقصيدة صديقه سوء فهم فأراد أن يردف له بقصيده اخرى يبين له سلامة منهجه وهي كما قال :
عسى الله ينجيني من المدفع اللي ثار
بعيد المدى اللي كل الأهداف يعطبها
يخوف ويرعب كل ماثار ياستار
يهد المباني والرواسي يشطبها
حديث المديل اللي على كهربا وزار
عسى الله يعين القوة اللي يحاربها
رماني وجاني من سهومه مطر وغبار
ولغات المدافع بالصواريخ أخاطبها
ألا ياهلا يامرحبا والكبار صغار
وترى الناس تهديد العدا مايهيبها
عزمنا على عسف النظا نسع الأزوار
وجزمنا على مس الكتب في غواربها
وكربنا الأشدة فوقهن في حقب وحضار
ونسفنا مواركها وشلنا مزاهبها
ونوينا على رد النقا للعميل جهار
على شان صعبات المواقف يجربها
تدور المعارك والجنايز لها قبار
لها من يكفنها ويركز نصايبها
حصل ماحصل والمبتدي ماعليه حيار
وترى اللي تقدم لحيته عند شاربها
وترا الشك ودى له رياجيل يم شهار
تربع بليس بروسهم لين خربها
مع الدرب الأيمن رح وخل الشكوك يسار
تراها بعيدة عنك وأنته تقربها
عطيناك بشتٍ ماتخالف بها الأنظار
نقينا المشالح لين جبنا لك أطيبها
وقبلت الهدية ثم مدري وش اللي صار
لقيناك يوم تصلي العيد قالبها
وأنا ياعلي ماني مراوغ ولا غدار
أقدر خويي والمحابيل ما أنصبها
وأجنب عن الشينة ونفسي لها مقدار
مع الطيب تمشي والردا ما يناسبها
وأنا ماني اللي يعترض سكة المرار
أنا لي طريق وباقي الطرق أجنبها
أخل العرب وأسرارها ما أبحث الأسرار
أجنب ولالي في خطاها وصايبها
أعرف أن لو أنه يطق الحجار حجار
تقوم السباع إلها سباعٍ تجاوبها
وتصير القضية مسألة بحث واستفسار
وعلى راس منشيها تعود عواقبها
وتراك انت راع الرمية اللي بدون عيار
طريقة خطا مدري عليه مصوبها
تبجح وتنظر لي بتصغير واستهتار
كبيرة عليك ولا أعرف ويش واجبها
وتقول أنك انت الشاعر الماهر البيطار
جميع المثايل مفردٍ في غرايبها
وأنا خابر انك لك بضايع مع التجار
على كل سوقٍ يشري الزين تجلبها
وبالأسهم تساهم بالجنيهات والدولار
مع أرقى البنوك اللي تضاعف مكاسبها
وترى كل ديرة غير ديرة بها خبار
أهل معرفة بسباعها من ثعالبها
وترى كل ديرة غير ديرة بها صقار
يعرف الصقور الرقش ويعرف أ رانبها
وأنا يوم سويت القصيدة خبر وانذار
وأنا ما أحسب انك تشتبه في مآربها
وتعبت وتعبنا والنتيجة ما غير أصفار
والأصفار بالأصفار وشلون نضربها
وأنا مسهمي ماهو بناقص مع الشعار
أروض صعيبات المثايل وأرتبها
وأسوق القوافي لين تمشي مع المعبار
كما سوق هجنٍ حنوة العود تدبها
على درب شيخٍ كل يومٍ يصبح دار
يسج النشيط من النظا لين يتعبها
وأجيب البيوت المفردة وأترك التكرار
نقيض الفوا رغ بندقي ماتزهبها
وأطب الفياض المخضرة واقطف النوار
اقص الزهور الناعمة من ذوايبها
واطب المزارع واتنقى من الأثمار
أنقي نبات اثمارها من شوايبها
وأغوص البحور اللي بها الحص والمحار
وأخلص عميلي دينته قبل يطلبها
وأعرف البضايع واعرف السوق والأسعار
واثمن واقدر سلعتي قبل أطببها
وترى اللي سواك نشيمه شيمة الخطار
وفاء والنفوس الطيبة ليه نغضبها
لاكنا على اللي فيه زودة لغانا حار
مشاهيب نارٍ من زمهرير نجذبها
تواهج توهج شقر الأسياخ وسط النار
وانـــا نـمـثـنـيـهـا صـفاتٍ تذوبهـا
وترى الشعر فتل ونقض ماهو بخبط أشجار
وترى الفرق بعقول الرجال ومواهبها
وترى الحكمة البلغة وباق الكلام بخار
يمر الحلوق الناشفة ما يرطبها
والايام والدنيا ترى مالها استقرار
على نجومها تطلع نجومٍ تغيبها
الأيام تخفي غيبها والزمن دوار
بطش بالملوك وحالها عن مناصبها
على عروشها مثل النوادر على الأوكار
وتصف العساكر بالطريق لمواكبها
تلاشوا مثل نبتٍ بروض وطاه عصار
عواصف رياحٍ طيرت به هبايبها
نواعم غصونه طار فيها الهوى التيار
وبقايا عروقة جارح السيل سالبها
تعيش الأوادم بالأمل والعمار قصار
وراها محاسب والله اللي يحاسبها
رجانا وملجانا هو الواحد القهار
ولي العباد اللي يحقق مطالبها
وقرينا الكتاب اللي نزل لأولي الأبصار
بشير ونذير ولابه آيه نكذبها
قريناه بالغنة والأخفا وبالأظهار
وبالإدغام واللي بالحركات نعربها
وتبعنا طريق اللي كسر شكوكة الكفار
ونقيم الصلاة الواجبة مع رواتبها
وتركت المجال لصاحبي لجل مايحتار
تقصرت ولى لو تقصيت أشيبها
وأنا خابر انه صقر ماياكل االاسوار
وطعام الصقور الجارحة من مخالبها
وتقبل تحياتي وهذا اخر المشوار
قصيدة جديدة بـ أزرق الحبر كاتبها
قصيدة تشره مابها شجب واستنكار
نظيفه عفيفة مابها ما يعيبها
على مبتداها من نسيج الحرير شعار
وعلى منتهاها العود الأزرق يطيبها
وصلاة الله الباري على سيد الأبرار
شفيع الخلايق يوم تكشف حقايبها
نبيٍ أوحي له بالرسالة وهو بالغار
بها خصه الله من عباده وفاز ابها
أتمنى لكم الأستمتاع بهذا الإبداع للشاعر المبدع...
وآسف ع الاطاااالة لكن الشاعر يستاااهل...[/align]
رد مع اقتباس
