يمه.... ابي اعرس
ايو ايوا غنوا معي
هلع هلع غنوا معي
شمال يمين - - فوق تحت - - ........- - تننا نا نا نا
هالبنت شحليلها مع ان ضروسها غلط :D
بس على الاقل اغنيتها تونس اشوي
الا على طاري الاغاني
في وحده مزيونة مرة مرة تغني اسمها على ما اظن دالي مدري داني
تقول في مطلع اغنيها الرهيبة : سلام الله على قلب هواني وانا ما هويته --- شي زي كذا
بس تراها مزيونة بالحيل عليها دلع مهوب صاحي
من الحين اقول لكم اني حاجزها لا احد يجي ويقول انه فاك معها
<=== شغل مبزرة :p
ما علينا
اي تذكرت
الليلة انا ضاربه معي الرومانسية بشكل غريب
متهيض على العرس ما ادري ليه :D
يا جماعة ابي بزر لي
بجد نفسي يجي لي طفل لي بروحي
بس مع ذلك احس ان العرس ما ينفع لي
يعني ودي اعرس بس سنة اجيب بزر وبعدين اطلق
<=== بدينا في الافكار الوصخة خخخخخ
وحتى اذا ما عجبني البزر بعدين بارجعه لامه ولا اسوي له ديليت
<=== وجهك انت وجه بزر ؟؟
احس البزران حلوين بس مو على طول
يعني حلو ان يكون عندك بزر لساعتين كل يوم
بس طول اليوم احس ان هالشي صعب ما ادري ليه
عليهم حركات بايخه هالبزران -- بس مع ذلك شحليلهم
ما علينا عن البزارين
انا حاتكلم عن الزواج الي هو العرس
انا من اشوف فيديو كليب نانسي عقرمة وانا ما ادري وش فيني
الواحد وده يعرس بصراحة على بنت حلوة ( بداية التحطيم )
يعني انا اول يوم اني صغير ( يعني صغنن )
كان نفسي اتزوج بنت حلوة وقمورة بس والله الاشكال ما تساعد ترى ( حقيقة مرة )
اول وانا صغير كنت اقول لاهلي ابغى اتزوج وحده تشبه نشوى الرويني ( مالت عليك وعلى طموحك ) :D
خبركم اول يوم جي في برنامج ما يطلبه المشاهدون كانت قطعة بصراحة ( قصدك صاروخ )
طيب وكبرنا وقلنا نبي نتزوج
كيف نختار هالزرافة الي بنتزوجها ؟؟ ومن وين نخطبها ؟
يعني بصراحة حنا شباب طخمان حرام يضيع شبابنا على وحده مانيب قايل :p
اول خطوة في الزواج المنيل بستين نيلة هي الخطوبة
والسؤال الي يبطح نفسه بقوو اوي اوي هو من وين نخطب ؟
من وين نخطب ؟
عندك خيارين لا ثالث لهم
انك تتزوج من بره او من البلد
اذا بتتزوج من بره روح ودربك سالك ما عليك من احد:D
اما اذا بتتزوج من البلد فوضعك صعب اشوية والله يعينك على مقابل الركب الي تخرع
مناطق المملكة فيهم بنات شحليلهم بصراحة مهوب شيون ابد
بس احلى بنات وهذي شهادة ناس كثير هم بنات الحجاز ما ادري ليه
يقولون انهم صواريخ في الجمال ودمهم عسل بصراحة
بس عيبهم انهم بايعينها نوعا ما .. يعني فالينها بزيادة :D
وبرضو اهل الشرقية ما يحتاج اتكلم عنهم تاج راسي والله ( صورة قلب يقول الهوا شرقي )
جمال وخفة دم وشياكة وكل شي الله يحفظهم لنا ان شاء الله
عيبهم انهم طيبين بزيادة بصراحة وفيهم دلع ماصخ وشوفة نفس اشوية :D
واهل نجد عليهم ملامح حادة وحلوات ما شاء الله وخاصة في العيون
بس عيبهم انهم يتابعون الموضة وهم من جنبها
هو باختصار بناتنا كلهم ما عليهم كلام واحلى من الحلى نفسه
بس كل واحد وذوقه من اي منطقة يبغى
انت شوف المحل الي يصلح لك وتزوج منه وكل واحد راسه في عقله ويعرف خلاصه :p
كيف تختار البنت ؟
على اي اساس تبغي تتزوج هيلة او حصة ؟
على اي اساس سليم تختار خطيبتك الحلوة القمورة ؟؟
نصيحتي لك
اجلس تدحوس ( يعني دايم متبطح عند اهلك ) واسال اهلك عن البنات :D
اذا لقيت وحده فيها 4 صفات من 7 صفات حط عليها علامة صح علشان تكون مرشحة اولى انها تكون زوجة لك
1- تحب شغل البيت
يعني من النوع الي تموت في شي اسمه طبخ ونفخ وكنس البيت وكوي الثياب
اما اذا سمعت ان هالبنت مخططه تجيب شغالة او مخططه تخليك تغسل ثيابك في المغسلة فما لها داعي بصراحة
انت محتاج وحده تريحك وتطبخ لك
2-تسقط في المدرسة
يعني مهيب دافورة
البنت الدافورة بالعادة ما انصح فيها احسها وحده دايما مادة بوزها شبرين وكشتها منفوشة ما ادري ليه
اذا نقصتها نص درجة جلست تصيح وسوتها مناحة في البيت وهذا ما غير جالسة قدام الكتب وانت جالس بروحك تطالع الدش
اما اذا سمعت ان البنت دايم ترسب في المدرسة وطموحها تصير خياطة فتاكد انها راعية انبساط وعرس
3- فيها لتغة
اللتغة حاجة حلوة في البنت وخاصة اذا كانت حرف واحد بس
واا حصلت لك بنت تدلع في حرف الراء يكون احلى واحلى هذي بنت نادرة كثير وما في في البلد الا ثلاث بس
يعني تشوفها ترقص حرف الراء اذا جات تقوله وخاصة اذا جات تقول مرررة مرررة -- هرارررة
4- ابوها مطلق امها
علشان تفتك منهم لانهم راح يكونون لاهين عنها
واذا حصل ان ابوها وامها ميتين يكون احسن واحسن
ما لك بالازعاج ومصالة ابوها وامها -- تحس ان ما لهم داعي في هالعرس
5- اكشخ مطعم عرفته هو كودو
لانها بتكون قنوعة وشحليلها ما تتطلب كثير
حتى انك بدل ما توديها شهر عسل يكفي توديها ماكدونالدز وتشتري لها وجبة اطفال
بس اذا كانت من النوع الي تعرف مطاعم ايطالية وخرابيط فانت بتروح في داهية
اصلا بيني وبينك -- يدعيك قلبك تدفع في وجبة عشا اكثر من 15 ريال ؟؟
6-تقول نكت بايخة
يعني مرحة وفالتها بقوة بس مو نكت وصخة وصخة يعني نص نص يكفي
بس اذا سمعت ان هالبنت ما تقول نكت او انها تقول نكت من مجلة ماجد
فما انصحك بصراحة لانك تحس انك متزوج بزره مهوب بنت
7- تسوي مكرونة باشميل
هذا اهم واصعب شرط بالنسبة لي
لاني الى الحين ما لقيت البنت الي تسوي مكرونة باشميل
في علم النفس يعتبرون البنت الي تضبط مكرونة باشميل فريدة من نوعها وملكة جمال عصرها
فنصيحة لا تفوتها ابد واعتبر هالشرط هو مفتاح الحياة الزوجية السعيدة
كيف تفحص شكل البنت ؟
اذا حطيت وحده في بالك جينا للخطوة الثانية انك تشوفها
علشان تقرر اذا تبيها او لا
وبصراحة يا اخوي الشاب لا تحط في بالك انها حلوة ابد
ولا تقيس اذا كانو اخوانها ورعان وحلوين انها بتكون مثلهم
عليك بالمعاينة الشخصية ولا تسمع كلام امك او العجيز ترى ما عندهم سالفة :p
البنت الحلوة عندهم هي الي مربربه وعيونها كنهم كشافات استاد الملك فهد :D
انت ضروري تشوفها ولا يقصون عليك ويزوجونك اياها على الضمان ( بيعطونك ركبة )
لازم تشوف طبيعي اذا تقدر عن طريق الشوفة الشرعية
واهتم بكل شي بتفاصيل الوجه والجسم لا تستحي انك تقزها من فوق لتحت
ولازم يكون الجسم متناسق مهوب في كل مكان ورمة
الزواج مهوب لعبة
المهم هذي بعض الاشياء لازم تتاكد انك تشوفها اذا رحت تشوفها
اذا عدت 3 منهم اعرف ان الي عندك قطعة وشحليلها
1- ضروسها ما فيهم فتحه
شوف لك وحده ضروسها مصفوفين كنهم حيطة لاعبين من الاتحاد بيصدون فاول
اما انك تاخذ وحده بين كل ضرس وضرس فتحة تكفي سيارة التيما فانا ما انصحك
يعني بصراحة يشوه الشكل مو ؟؟
وفي بعض البنات اذا صار لها ضرس مكسور او ضروسها داخلين في بعض تصير حلوة
بس مو كلهم
2خشمها مرتب ومهضوم
حاول يكون الخشم ملموم على نفسه ومختشي
لانه اذا كان كبير وفتحاته كبار تصير مشكلة
لانها اذا تكلمت بتحس انها تقول كلام وخشمها يقول كلام ثاني
يعني راح يتهيأ لك انها تتغزل فيك وخشمها يسب فيك خخخخخخخخخ
3- فيها غمازات في خدودها
يا شيخ اروح وطي مع الغمازات
وخاصة اذا ابتسمت وطلعوا الغمازات بتحس انك في دنيا ثانية
4- فيها حبة خال
وهذي بعد يا روحي على حبة خال نوال الزغبي
بس يعتمد على مكان حبة الخال اذا صارت في الخدود او فوق الفم عال العال
بس تجيك في الجبهة او تحت الفم مالها داعي
بعد الخطوبة ايش تسوي انت وياه ؟
اذا شفت البنت وعجبتك وقلت خلاص اعتمد
تجي الحين فترة الخطوبة الي هي بعد الملكة
ولازم تراعي في هالفترة انك تصير ثقيل وما تعطيها وجه كثير
وامسك روحك في هالفترة ولا تدخل في الثقيل
خلك في الحركات الخفيفة بس لا تعمق اكثر بعيدن تتورط وتروح حلاوة العرس عليك
<== ابوها الصراحة الي تعرفها خخخخخخخخخ :D
ونصيحة لك اذا زعلت خطيبتك لا تراضيها خلك حمش من البداية
ترى حنا ناس صعايدة ومهوب خفيفين كل ما زعلت نروح نراضيها
خلها يومين ثلاثة لمن تدري انك طابوقة ما تحس وبعدين ترضى من نفسها :)
ما علينا منهم اخي الشاب الاطخم يالي شحليلك
انا عارف ان حنا رومنسيين زيادة :)
انا والله اوقات اذا صرت اهوجس في العرس اجلس اخطط كم خطة رومانسية اسويها لخطيبتي
مثلا اوقات اقول اذا خطبت باشتري لها وردتين جوري احمر واحطهم في خشمي واعطيهم اياها خخخخخخخ ( حلوة الحركة )
قصدي باشتري لها ورد واحطه مع صندوق بطيخ واغلفهم واعطيها اياهم هدية خخخخخخخخ
امزح معاكم
انا اقول لكم ايش راح اسوي
بس على شرط انتو تقولون لي بعد
<== مكثر من حركات البزارين هاليومين خخخخخ :D
حلفو انكم بتقولون لي :p
المهم
باقول لها عمري انا توقعت انك تكونين شيفة
بس فاجئتيني بطعامتك وخفة ظلك
انا قلت لاهلي انك حتكوني بقرة بصراحة
بس الي اشوفه قدامي -- غزال شارد
كنت ناوي اتزوج عليك سورية
بس الحين
باجل الموضوع اشوية <<<<ابوك يا السجع :D
ابيك من اليوم ورايح
تلبسين لي لبس خالع العن ابو الفقر
<=== شاب سعودي ذابحته العزوبية خخخخخخ
امزح
خلاص الحين باتكلم جد الجد
بامسك ايدها بكلتا يدي ( شرايكم في كلمة كلتا )
واقول لها :
تمنيت هاليوم من زمان واتمنى ايامنا الجاية كلها حب وسعادة
انا انولدت اليوم وبداية حياتي معاك
اوعدك
اكون لك الزوج الي ما يزعلك ابد
واتمنى اكون سبب لسعادة عينيك يا عومري
<== مو كانه خق من البداية خخخخخخ
بعدين باغني لها اغنية حبيتك تنسيت النوم يا خوفي تنساني
يمه
ابي اعرس
<== تهيض مرة ثانية
ابـي لـي مهـره ماعسـفـت صغـيـره وبـنـت حـصـان
أبــــوهـا الـلــي يـفــك المشـكـلـه ويـزبــن الـجـانــي
واخوهـا لا تـعـزوى باسمـهـا فــزوا لـهـا العـربـان
يـحـق لـهـا الفـخـر فـــي قـولــة آل فـــلان جـدانــي
أبـيـهـا فـــي بـحــر عـشـريــن لا زود ولا نـقـصــان
أبيهـا اقصـر طويلـة والوصـوف اشـكـال والـوانـي
أبي الجبهه كما الصبح وكما القوس اسود الحجان
وابـيـهـا نـاعـسـات ونرجـسـيـه ســــود الاعـيـانــي
ابـي رمــش كـمـا ريــش يغـطـي الثـلـج فـالاوجــان
وابــي جـفـن يشـيـل الـرمــش طـربــان وكـسـلانـي
ابــي خـــد كـمــا ورد تـنّـمـى فـــي طـــرف بـسـتـان
وابـي خـشـم صغـيـر ومـثـل حــد السـيـف شامـانـي
ابـي البسمـه كمـا البـرق وثناياهـا كـمـا المـرجـان
شـفـاهــا جـمـرتـيـن وفـمــهــا خــاتـــم سـلـيـمـانـي
ابــي شـعـر مـثـل ذيــل الـفـرس لا طـبّـت الـمـيـدان
او الـشــلال لامـــن بـــات لـيـلــه بــيــن الامـتـانــي
ابــي جـيـد ســـوات ابـريــق فـضــه نـاتــق مـلـيـان
وصــــدر كــنــه مــرايــه عـلـيـهـا طــلــع رمــانــي
ابـي ظهـر كمـا الـجـدول وقــدّ مـثـل غـصـن الـبـان
وخـصـر مـثـل مـجـدول الاعــلان وجـسـم رويـانــي
ابـيـهــا نـابـيــة ردف وبــطـــن ظــامـــر جــوعـــان
ابـيـهـا مـدمــج ســـاق وقـدمـهـا لــســان ثـعـبـانـي
ابيـهـا بـنــت عـــز مـــن رغـدهــا يـنـعـم الفـسـتـان
ابــي الـرقـه وابــي الـدقـه لـهـا باطـرافـهـا شـانــي
ابي المشيه كما اللـي طالـع مـن المعركـه كسبـان
وابيـهـا تــرش مـــع خطـواتـهـا مـســك وريـحـانـي
ابـي صــوت الــى مـنـي سمعـتـه كــن فـيـه الـحـان
يـدغـدغ مسمـعـي ويثـيـر كــل السـحـر فـاشـجـانـي
ابيهـا حـب واخـلاص وهواجيـس وفــرح واحــزان
ابيـهـا مـثـل مــا دكـتـور اهـالـي العـشـق وصـانــي
ابـيـهـا لــوحــة مــــا صـورتـهــا ريــشــة الـفـنــان
ابـيـهـا جـوهــره مـــا جـابـهــا قــاصــي ولا دانــــي
ابيـهـا تنتـصـر لــي مـــن زمـــان حـطـنـي نـيـشـان
وتبـشـر بـالـغـلا الـلــي مـالـفـى بـــه واحـــد ثـانــي
مـهـرهـا قـلــب وشـعــر يـهــز الـقـلـب والـوجــدان
وألبـسـهـا القـصـيـد وتـصـبـح اوزانــــي وقـيـفـانـي
ابي اللي فات واللي فات صعب ومن لقـى العنـوان
يــرد الـعـلـم ولا افـضــل ابـقــى اعـيــش وحـدانــي
ابوك يالمتحطم <<<خشة واحدن حاطن يدية علي خدة
القصيدة ملطوشة <<<< عمري يا الامين
المهم
نبي ناخذ رايكم في بعض الامور يا اللحوات الغانمة
1. هل تأيدون الزواج المبكر في هذا العصر ؟؟ علل؟؟:D
2. هل تختار شريكة حياتك عن قناعة ولا خبط لزق ؟؟ برضوو علل ؟؟:D
3. ماهي اهم الصفات اللي تحب انها تكوت في خطيبتك_ خطيبك للبنات:D ؟؟؟
4. هل تثق بذوق اهلك ؟؟ ولا عندك فلسفتك الخاصة ؟؟؟
خاتمة
هذا انشاء الله اخر موضوع انشائي لي
انا طبعا داخل على مرحلة عصيبة جدا في الدراسة :D
وما راح اقدر ادخل المنتدى كثير الا قليل مررررررررررررررررررررررررررررررررة
اتمنى ما احد يكون زعل مني من قبل واتمنى اني ما غلطت على احد ابد
كنتو زملاء جداطيبييين معاي وبجد عشت معاكم في المنتدى ايام حلوة
اتمنى ما يكون احد حقد علي لسبب او لاخر
وسوري اذا كان في هالموضوع كلمات وقحة اشوي
فتكم بعافية :)
رد مع اقتباس
المشاركة الأصلية كتبت بواسطة النقل الجماعي
