أبيات للشيخ "أبوممدوح المرداسي" الله يطول عمره
بالشيخ "سليمان البازعي" رحمه الله
شيخٍ كريمٍ للمواجيب حمّال ... ياما ذبح ما بين كبش ٍ وحايل
راعي دواوينٍ بها زل ودلال ... وفيها الصياني فوقها السمن سايل
للضيف والعاني مضاف ٍ ومدهال ... ويقلط عليها مكرمين السبايل
يوم إن بعض الناس ما يدرك ريال ... وهو يجهزهن بكل الوسايل
وله حوطةٍ غنّا بها ابراك و اظلال ... وفيها النخل من طيبات الفسايل
وفيها الشجر والزرع من كل الأشكال ... نقعد بها وقت الضحى والقوايل
هي بيتنا الثاني على كل أبو حال ... والشيخ ما قصر وسيع البلايل
نخله نوايع ياصل الماء لها ازلال ... حدب الجرايد واسعات الظلايل
حدب الجرايد مثقلات بالأحمال ... اردوفهن صارن عليهن ثقايل
اردوفهن اكبار بالحيل و اثقال ... وش عذرهن والماء تحتهن زلايل
الشيخ سبلهن ولا همه المال ... للطير والطرقي وبعض العوايل
له عادةٍ في كل عام له اسبال ... ومن يزرع المعروف يلقى الحصايل
كلٍ عن الدنيا مغادر ورحّال ... ويلقى الذي سوا بها من عمايل
وكل البوازع من قديمٍ ولا زال ... يضرب بهم بالطيب أحلى المثايل
وصلوا على اللي نافلٍ كل الاجيال ... محمد المبعوث بأغلى الرسايل
رد مع اقتباس
