مرحبأ لف مرحبا تراحيب المطر
طبعا جيتو طايريين من عنوان الموضوع
لا تخافوون مافي شي بس
بقوولكم سالفتي مع الصواريخ واللي لها مسمى اخر عندنا اللي هو << شروخه
طبعا هالسالفه ماراح انساها طوول عمري تدرون ليش؟؟؟؟؟؟؟؟؟
لان نتايجها كانت من اشد التهبيب والمصايب اللي سويتها
ندخل بصلب السالفه ....
طبعا مثل اي بنت يوم كنت صغيره كنت اخاف من شي اسمه شروخة العيد
من يجي عيد الفطر والا الاضحى انحاش بالغرف والا عند الاهل والا اي مكان بالبيت
يعني اهم شي الموقع الخطير المسمى (( ساحة البيت)) ما اقرب منه نهائيا
لانه هو اللي تبتدي فيه المعركه
الموهيم
كنت على هالحاله الين وصلت صف ثالث ابتدائي
والحمد لله راحت حالة هالخوف
وبالعكس قررت من يجي عيد الفطر انا بنفسي بشب لي صاروخ وبمسكه بايدي
وبخليه يطير <<< ههااي كملو السالفه وشوفو وش سويت والله بتقولون ياليتك طرتي معه
نكمل..
وفعلا جا اليوم الموعود
وكنت فرحانه الا هههااي متشققه من الوناسه
واقوول في نفسي الله واخيييرا بشب صاروخ
طبعا فيه نوع معروف من الشروخه
الي يسمى الصاروخ الصغير ههههههههههههه<< طبعا اخوي الصغير هو اللي مطلق عليه هالتسميه
يجيك شكله ااامممم ياربي شلون اوصفه اللي اقدر اقووله لكم الصاروخ اللي يكون مثل العود من تحت طويل ولون عود تقريبا احمر مدري عنابي <<< هههههه يمديكم على الوصف << من جد لا تعليق
والناس بالعاده تنشبه في قوطي ببسي والا بالتراب ههههههههههه مدري شالحكمه من قوطي الببسي
اتمنى انكم عرفتوه
ماعلينا نكمل...
ويالله وصلت لبيت اهل امي وانا انتظر لحظة ابتداء الازعاج واطلاق الصواريخ
لااااااا وكنت كاشخه ولااابسه هالفستان الاحمر هههههههه والناس يسلمون ويقوولن يااسلاام عالكشخه<< كالعاده لابد من التخقيق اللي من جنبها ههههه
وانا اقوول بقلبي ههااي بلا فستان بلا هم انا يهمني اذا شبيت صاروخ تمدحون فيني
واخيييييييييييييييييييييييييرا سمعت صوت يناديني
وقلبي يرقص فرحا
الا اخوي ينادي يالله يالله وقت الصواريخ
اللي اذكره كنت قاعده جنب مماتي عند الحريم
ومن سمعته يقوولي يالله وادددددددددددددددددددددزززززز وراه
ما شافو الا غباري وكنت في قمة الحماس
وفعلا بدت الفله والصواريخ
طبعا في البدايه كنت خايفه شوي ومتردده
بس مااعلي مسويتها يعني مسويتها
ملاحظه مهمه...
طبعا بيت اهل امي ساحتهم الخارجيه او علشان اكون دقيقه اكثر
المكان اللي يشبون فيه الشروخه كان مقابله تماما وبمسافه قصيره (( مجلس الرجال))
طبعا بالداخل كان الوالد موجود وخوالي وجدي وباقي الضيوف
نكمل..
العيال برا شغالين شرخ ورا شرخ وانا اطالع في قمة الحماس اقوول متى يجي دوري
واخيير جت اللحظه المنتضره
وجاني اخوي يالله يالله جربي
وانا خلالالااااص سعابيلي طاحت من كثر ما انا فااقه فمي اطالع فيهم
قلت يالله قدام
وعطاني واحد قالي يالله ثبتيه بالتراب الي عندك
قلت لالامابي ابي امسكه بيدي<<< مسويه الفارس المغوار امحق شجاعه
قالي حركااات طيب مو مشكله
ويعطيني اياه ويوريني شلون لازم امسكه علشان ما تتعور ايدي
قالي هاا تمام
قلت اييييييييييييي ازهله خلاص عرفت
وبالفعل مسكته وشبه وانا لفيت وجهي مازلت خايفه شوي
ويااااااااسلااااام يطير الصاروخ
طبعا من حظي النحس ماطار في السما زي العالم والناس
لااااا ههههاااي الا نشب في مضلة البيت اللي على اليسار
طبعا ما اهتميت اهم شي اني واخيرا شبيت صاروخ
وبعدها عجبتني السالفه
قلت لااازم اخلي ابوي واخواني الباقين يشوفون اني معد اخاف
شوفووووووووووو وش سوييييييييييييييييييييت؟؟؟
هناا المصيبه بالفعل
قمت وقلت لاخوي عطني واحد بروح اوريه ابوي
قالي طيب
وعطانياه وهو على نياته مايدري وش بيصير والا كان عطاني طراق بدال الصاروخ
الموهيم
وقفت قدام باب مجلس الرجال
وانادي بنت خالتي بكككللللللللل ثقه
فلانه تعالي وجيبي معك الالولاعه علشان تشبين لي الصاروخ
والحمد لله والشكر صارت ذيك اهبل مني وجت بكل ثقه وجابت الولاعه
ويالله تولع فيها قالت لي هاا مستعده
وانا اقوول اييييييييي يالله
وتششششششششششششب الصاروخ
واطير انا ركض علشان اوريه ابوي قبل مايطير
واداهم المجلس وانا مااشيه الف كيلو
ما امداني اقوول يبه شف
الا الصاروخ طار من يدي وههااي طار على هالمساكين اللي بالمجلس
لو مافيه الا خوالي وابوي والاهل كان تهون بس المصيبه هالرجال اللي عندهم
ويالله تشوف كل واحد حاط رجله ورافع ثوبه
واللي نقز على الطاوله
واللي انسدح على الارض
واللي فاقعين ضحك
واللي توزا ورا الكنب
بسس اللي من جد انا رحمته واحد شباب تقريبا عمره 23 سنه كان يتقهوى هههههههههه ومعه الفنجال مسكين مادرا اني بدخل مدرعمه عليه
من طار الصاروخ طار الفنجال ورراه ونقز نقزه ههههههههه وربي من جد ارتاع
وعااااد تشوفون وجهي انقلب الوان
واقفه انا وهالفستان حتى شعري طار من الروعه ومنلخمه بقووه
مدري شقول
ماغير متحنطه بمكاني كني خشبه
وجدي يناظرني وفيه الضحكه بس مسوي نفسه معصب علشان الرجال
تعرفون ماينفع يضحك قدامهم على هالموقف
بعدين ناظرني ابوي وعلى طووول صحت هههههههههه واقووله ما قصدت يطير عليكم والله
والله
ما اعيدها
واللي بالمجلس كلهم فقعو ضحك علي شكلي يكسر الخاطر
قالي ابوي خلاص رووحي عندامك
طبعا من سمعت هالكلمه دزيييييت عند امي ماصدقت على الله
من شفتهم يناقزون وانا اقول بقلبي هههاااي اصبري بيتوطون في بطنك الحين
بسسسسسسسسسس الحمد لله عدت على خير:aaa14:
بس ماخلوني كل عيد يذكروني بهالسالفه ويضحكون علي
وابشركم بعد الصاروخ اللي بالمجلس ماندري وين طار له اختفى تمامااا ههههههه
وبعد اسبوعين من الحادثة الشغاله كانت تنظف المجلس ولقته تحت واحد من الكنبات
وان شا الله يكون موقفي اعجبكم
واتمنى ردودكم عليه
رد مع اقتباس
