اليا قمنا مقام الجود جدنا ولانمشي مماشي من جحدنا

اليا قمنا مقام الجود جدنا = ولانمشي مماشي من جحدنا
نعز النفس ونعز القبيله = والا منا سمعنا الكيد كدنا
سمعنا من ولد محسن قصيده = وراجعنا المعاني واستفدنا
لقينا الزين في مبدا كلامه = يقول لغير ربي ما سجدنا
ولاكن في سياقه للمعاني = وجدنابه خرافات ولهدنا
مثل حكي الروافض بالمحافل = كلامن ما يغير معتقدنا
يعدد له فعول ما فعلها = وحنا اللي علي كذبه شهدنا
وجفيل الناس من معجب علامه = شكرنا الله علي العقل وحمدنا
علي حكيه مثل عنتر بوقته = حمانا الله بسيفه ما حصدنا
رعد بالحفل وبروقه تكاشف = وعقب عاصوف ابن محسن ركدنا
ركدناله وركدنا المعاني = يحسب انه ليا هاز ارتعدنا
تحاشانا مشاهير القبايل = ماهي كلمه دقيش اللي بعدنا
كبيره شرهه التالي علينا = يسابق نمرنا والا فهدنا
وانا بااقول يامعجب تسمع = مثل شرواك يقصر ما فردنا
كلامي منه تهتز الرواسي = وكلامك يعجب اللي منك وادنا
نهار الحرمليه ماانت حاضر = ولا نشدت يوم انا حشدنا
ترانا بااول الجمع المسمي = ليا قالوا يلد علي وجردنا
وحنا لااعتزينا بالمواقف = وري الهقوات باللقوات زدنا
شياطين ليا منا عدينا = سلاطين ليا منا قعدنا
مزبنه المجنا يوم جانا = سري من حايف الموت وهجدنا
وراع العق يوم انه نصانا = عمدنا العق دونه واعتمدنا
عوايدنا نزبن كل خايف = ليا منه دخل في وجه احدنا
وعمي لا وقف ميقاف جده = بيوت العز ترفعها عمدنا
مثل بالمالحه من دون نايف = خفت برقك وحنا اللي صمدنا
صمدنا قدم دقلات السبايا = وراحن مرج عند اول هددنا
وردينا فرج من بين ربعه = وعند الشيخ منهم كم جلدنا
وجندلنا مشاهير النشاما = علي راسه وبالميقاف سدنا
وعلي قولك بالاقصي والموالي = ترا ذا فعل اهلنا وانت الادنا
فلابك زين تخشي عين حاسد = ولا حنا علي شينك حقدنا
فتقت الخيط وسلوكك ضعيفه = عساك سعيد لامنا نشدنا
ان كان انك تحدي كل ناقد = تذكرنا وحل اللي عقدنا
تمعن بالمعاني والمواقف = وراجع فكرتك وان عدت عدنا
اليا عديت بالضلع القصير = علي قمه جبل سلمي صعدنا

محمد علي بن ضاوي الحميداني

• مماشي