اخيل من وسم الحيا نوٍ عبر فلاح مبرد

اخيل من وسم الحيا نوٍ عبر
غرّن يخلّ انصوبها برقٍ سرا

يسوقها النسانس وانقاد وزبر
على بحورٍ هايجه وارضٍ ثرا

لا عين شايفته ولا سامع خبر
الله جعل له عن هل الدنيا ذرا

كبرت والمعنى بتفكيري كبر
لابد مايقراه راسٍ ماقرا

ونسجتها نسج العباه من الوبر
وقدّمتها تقديم من باع وشرا

من فيض تفكيرٍ ليا منّه سبر
اغوار احاسيسٍ لها طارن طرا

من  وكّل الله والتجى فيه وصبر
تصرّفت به حكمة الله مادرا

شكيت للجبّار كسري وانجبر
واصبحت امد خطاي في عالي القرا

ذا قول من فكّر بوقته واعتبر
ياحاسدي باحساس فكري وش ترا

اليوم شفتك في جهاز المختبر
الله خبير وحط بالخلق خبرا

وميّزت عضمك من ورى جلد وهبر
وشفت المرض والسم في دمّك جرا

يبي يوريك الدهر يومٍ غبر
تموت موت وجرح قلبك مابرا