الجرح يكبر معي والناس مشغوله
واللي أبيهم مشو واحد ورى الثاني
الليله ياطولها والدرب ياطوله
واللي ورايه أحس انه تعداني
الوقت لامن تغير هذي فعــوله
أما لعب لعبته وإلا تحداني
أبواب مقفله ودروب مجهوله
واذا تبي كل حاجه لازم تعاني
كلام أبقوله لكن ما أقدر أقوله
أشياء في خاطري توقف على لساني
غلطه من صاحبي وأقول مقبوله
مره علشانه ومره علشاني
والمشكله لو تطول شوي محلوله
عشان مايشمت القاصي ولا الداني
تكفون وإنتم ليا جـيـتـوه قولوا له
إني أعزه كثر معزة إخواني
معقوله ينساني !! لا ماهي معـقـوله
حتى الشعر وقتها ماراح ينساني
فلت حجاج .. وقصيد .. وصوله وجوله
يعني متى ما تذكر شي يلقاني
ما شلت هم الشكوك الدايره حوله
وإلا الخوي لاتردى قلت : يفداني
مرات أحس إني حاكم تنقصه دوله
ومرات مدري من اللي ينقص الثاني
رد مع اقتباس
