:Dكـــــــل عـــــــــــام وانـــــتم بخيـــــــــــر

وش اخباركم هالرمضانية وش اخبار البلع ..

الشوربة والتوت واللقيمات والسمبوسة << :D



اول مرة اشوف اكل من يذن المغرب وانا بلع في بلع ما تشوفني الا

وفي يدي شي أكلة احس اني اغررررررق اغررررق اغرررق اغررق اغرق

لا وزايدها ذا الخلاقين اللي لبستها تعرفون شتيت يقولون البرد ناوي يهب

هالايام وأطق لك الفروة و ام رقبة قلت اولم العصابة قبل الفلقة ألزم ماعلى الواحد عمرة

<< مماشي شايب

عاد اليوم بقولكم عن الدوامات في هالرمضانية اول ما داومت ويستلموني العيال سلام وحبحبة كني رايق لهم

مدري وش جاهم مصدقين لا و يمسكك الواحد ساعة وهي تسلم ما يفكك وييييييين يا ابوالشباب

توك شايفني يوم الربوع وش جايك عاد البلا لاصار ريحته تطرح الطير من السما

اعوووووذ بالله مهوب معناتة رمضان ما تفرش اسنانك

الا على طاري الدراسة يقولون بة مكرمة و اننا بنعطل في 19رمضان مدري ذا الحتسي

صدق ولا اشاعة مثل عوايد هالناس في رمضان

المهم صار لي مدة ما كتبت موضوع وش فيكم تناظروني تسني بكم تقولون اشوى انك غاثنا

بمواضيعك صح اني غاثكم بس هذا من زود حبي لكم << بالله لاعاد تحب

بعدين ما انسى إلحاح بعض الاعضاء علي بكتابة موضوع ونشبوا فيني نشبة

اللهم ياكافي حتى فية عضو حلف ما يدخل المنتدي الا لين يبشرونه اني كاتبن موضوع

<< اخلص والله محد درى عنك :
خلااااااااااااص عاد خلصت المقدمة (( أسمع بها )) نخش في الموضوع


سمعت حتسي واااااااااجد في قبالة هالرمضانية يدعو المواطنين والمقيمين والمستمعين

الى امور مش ولابد .. امور تفسد الامة و تشتت شملها .. تدعوهم الى وصل الرحم

لذلك حبيت انصحكم وانوركم .. لا تسمعون كلامهم << ما تربي مع الشياطين

ابد وش تبون بالناس ما وراهم الا الغثا والقيل والقال و مشاكل لها اول مالها اخر

اقطعوا ارحامكم يرحمكم الله ... وش زينها لاقعدت لحالك في هالدنيا مبسووووط

واخر روااااااقة
المهم اقطعوا ارحامكم وما جاكم علي :D

خاصتن هالايام القطاعة زينة مهوب تلعب عليك اميمتك وتقعد تدور

بك على بيوت الناس ما يبقى احد ما تسلم علية وتبارك لة بالشهر وبالعيد لاااااااااااا

احذر هداك الله من الوقوع في هذا الخطأ ...
:p
طبعا نصيحتي لكم في قطع الارحام ما تقطعونهم فجأة لا بالتدريج

يعني تبدأ تقطعهم حبة حبة وهذا يعتمد على غثاثة الناس اللي بتقطعهم

بالنسبة لي اول من بقاطعهم باذن الله جيران الهنا جيراننا

وتعريف الجار لغويا : هو من جاورك في المسكن فقط لكن عندنا يجاورك في كل شي

يعني صايرين هم راعين المحل هذا غير ان الوالد حفظة الله ورعاة ما خلى

احد ماتعرف وصار من جيراننا كل الحواري اللي حولنا صاروا جيراننا

عاد ابفصفص لكم هالجيران عاد هم وش كثرهم .. اهم شي انتم ماوراكم شي


1- الجيران العليمين

هذولا يجون مايدرون وين الله حاطهم فية ما ادري كيف صابرين على أنفسهم لين الحين

و يحسبون اننا ملنا شغلة الا هم ان بغوا سباك زهموا علينا ان خرب موترهم جونا

حتى لو صاح بزرهم جونا .. وام جيراننا ذي عليمية من جد اي شي يصير لها

تجي تخرة عندنا ماعندها سدة ابد كل حتسيها ابونا قال لي ابونا جاب لنا

ابونا كفخني كأننا مكلفين بها هي ويا المسعد رجلها

والحل معهم : وهقهم كل ما شاوروكم عطوهم نصايح توديهم في ألف

داهية وصدقوني عقبها بينقطعون عنكم:D




2- الجيران الغثيثين

هذولا بزرانهم متربعين في بيتنا 24 ساعة ... وحنا باحلين بهم ما غير مطامر وراهم

يا مدرسين ذا يا موكلين الثاني يامكفخين الثالث

واعووووذ بالله من هالبزراين ماخذين بيتنا استراحة كل ما ضاقت صدورهم جونا

واحيانا ما ندري الا وامهم وراهم

الحل : هذولي حالتهم مستعصية تدرون قولوا لهم انكم دبابيس :p

وماعاد هم معتبين بيتكم:D



3- الجيران الدوافير

يا كرهي للدوافير عاد ذولي بزوووود من بعد العشاء تلقى بيتهم مظلم

وهم في سابع نومة << وش عليك منهم .. ما عرفتكم على ذا الجيران ..

امهم وابوهم مدرسين ( ما جمع الا وفق ) وعيالهم كل ابوهم دوافير

اعنبوهم عجزت انظلهم ابي واحد هاة يطلع نص نص يعني يجيب جيد جدا

بس كلهم طالعين يقدرون الدراسة .عاد لين سيرت علي ولدهم يغثني بسواليف المدرسين

ودرجاتها خاصتن اذا نقصه درجة تتعب نفيسيته و يجي يسوي لي قلق ويعيد

ويزيد على سالفة ذا الدرجة ..هو الولد يجي منه اتذكر كارفه ايام الدراسة يحل واجباتي

عاد هو يحلها بذمة وضمير وتسطر ويزبرق:p بس مشكلته اذا انطلق في سواليف

المدرسة تخيلوا في العطلة يهذري بالدراسة وانه اشتاق لها بس لين شفته طول في

هالسواليف عطيته بقس محترم يوصله بيتهم

ولا يوم دروا اهلة اني جبت العيد بالجامعه قاطعونا اهلة خافو اني نعدي عيالهم خخخخخ
ازين شي




4- جيران المصالح


اخبر فية ناس عادي عندهم يطلبون من جيرانهم شي اذا انزنقوا

بس ذولا غثيثين ما ينعطون وجة ماخذين بيتنا بقالة لا وبالتوصيل السريع بعد

صرت اعرف وش يطبخون يوميا من المقاضي اللي تنقصهم :p

الحل : اكتبوا عند بيتكم مغلق لعدم التفرغ



5- الجيران الصمخان

هالجيران عارفينهم كأنهم عايشين معنا

طال عمركم هالجيران ما يهنى لهم يسولفون الا ومسمعين الحارة معهم تعرف هم

متلاجدين ولا متصالحين .. مصخنين ولا طيبين واخبارهم وسواليفهم توصلك اول باول

و اكثر ما ينبسط عليهم امي لين جاء مسيان قعدت في الحوش تسمع لهم وتكركر

تقول قاعدتن عند تلفزيون ولين جيت عندها يقالك ابنصحها لا تتسمع ألقاها تقول : ا

لحق الحق ام حمد متذابحة هي ومرة ولدها

الحل : حطوهم على الصامت :p


6- الجيران الموحشين


ما نعرف هالجيران هم حيين ولا ميتيين .. يسولفون ولا ساكتين << استنكر:p

اول مانزلوا هالجيران راحت لهم امي ومعها دلال القهوة يقالك بتقهويهم وتتعرف عليهم وتفلها معهم

قالوا لها مانبي جيران يدخلون ويظهرون علينا ما نحب هالشي << والله هم الرابحين

وغالبا يصيرون هالجيران من النوع الكشخة



7- الجيران الملاقيف :


يا شينهم ما يمديك تعطس الا داقين يقولون ارحمك الله:D

ما يشوفون سيارة ملبقة عند بابنا الا زاهمين علينا وتقعد امهم تتميلح وتنشد عن احوالنا

و قلبها يفرفر ودها تعرف وش السالفة وان شافت امي ما عطتها وجه وما عطيتها الخبر قالت : ولدي حمد الله يحفظه

توة لامح سيارتن عندكم وش زينها خخخخخ
الحل : مدري


8- الجار الونان


يا بغضني لهالنوع لين سيرم يبدون بالتشكى وتونون


الحل : عطوهم كروكي المستشفى :D


9- الجار المثقف


عاد هالجيران باز بهم ما بقى احد ما علمتهم عنهم

يعني مثقفين ثقافة صاحية مهوب حافظين جملتين فصحى و يزمرون بها لااااااا

بس فية فرق بيننا هم في وادي وانا في وادي

لو تشوفون الحوار بين ابوهم وابوي .. ابوهم كان يسولف عن الادب في القرن العشرين

وابوي يقول حطواااا العشاء:D

ولا ولدهم مثقف ويكتب روايات وقصص قصيرة مهوب مثلي الله يخلف مرة سألني

هل لديك محاولات أدبية ؟ قلت اييييييييية يجيب الله مطر
يا حليله يقول مثله الاعلى جبران خليل جبران .. قلت له من هو ذا اكيد يمثل في الحور العين
على طاري الحور اكيد جت يالله عن اذنكم

<< توهق بالخاتمة انطلقت ولاعاد عرفت اسكت
:p

المهم الموضوع يتكلم عن انواع الجيران مويجيني واحد ويقول هذا وش عنده وتري يومني اقول لا توصلو ارحامكم امزح<<<احلف:p