يا صاحبي وش خافيات الدعـاوي
وش تحسب ان القلب يا نافل الجيل
ويش انت فيني يا اتلع الجيد ناوي
يا ابوعيـون ٍ ناعسـات ٍ مظاليـل
اذهبتني يـا عيـن فـرخ النـداوي
في خرسك اللي هدت الحال والحيل
حطيت في قلبي عطيـب المكـاوي
واجزلت لي يا ناعس الطرف بالكيل
يا مبعد الخطوات ويـن الحـراوي
صدك على مثلي شقى واكبر الويـل
وزرع الخفوق امسى من الصد ذاوي
لا عاد لا جتنـي علـوم ومراسيـل
حيث ان قلبك من غلايـه سنـاوي
وانا احسب إنك لي تشيل الغلا شيل
يا بنت فيني مـا تضيـع الهقـاوي
ما نيب انا من يقبل الحيف والميـل
ما ني على طـرد المقفِّيـن قـاوي
يردنـي سلـم الرجـال المشاكيـل
ولا ني على من صد واقفى مـلاوي
الله ولا حـب ٍ يــذل الرياجـيـل
يا بنت لو الوضع كـان متسـاوي
لأرخص لك الغالي وما يملك شعيل
ومدام نجمك عن سمايـه نحـاوي
فانا لي الله يـا حسيـن التعازيـل
والجرح له صيًّور وقتـي مـداوي
يبرى وانا اسلى والليالـي مقابيـل
وارجع وقلبي من هـواك متشـاوي
وآطى على جمر العنـا والغرابيـل
واسج بالقلـب السقيـم الشقـاوي
وانت ِ لك الدنيا عساهـا تساهيـل
تلقين و القى لي من الناس هـاوي
خل ٍ يجنبني شقـى القـال والقيـل
يمد لـي حبـل الغـلا والرجـاوي
وامد له حبل الوفـاء والمواصيـل
محمد بن صقيران
رد مع اقتباس
