عسى الخيال اللي مزونه مزابيـر
وبلـه علـى دار الصبـاح يتهامـا
دار لهـا قيمـه وشيمـه وتقديـر
من قدر أخو مريم عزيـز المقامـا
مرحوم يافرز الوغى جابر الخيـر
عليـك مـن دار السـلام السلامـا
وينبت على قبرك زهور ونواويـر
ويعطـره ريـح النفـل والخزامـا
حكمك عدل يا أمير والعدل يا أمير
شعبـك تحـت ظلـك بعـزّ يتنامـا
ياما على شانه بذلـت المخاسيـر
وياما علـى شانـه جفيـت المنامـا
وياما تعرضت لمصايب وتفجيـر
وأنجاك ربي مـن عيـال الحرامـا
ويوم الكويت إجتاحها الفجر خنزير
بالغدر ماهـو بالضفـر والحسامـا
حررتها بالعـزم والفكـر تحريـر
والدم والمـوت الحمـر والنشامـا
فالجو طياره وفـالأرض جنزيـر
لين إن طير النصر رفرف وحامـا
وعادت مثل ماكانت بدون تقصيـر
وإسمك سما والشعب بسمك تسامـا
واليوم يبكونك صفـوف وطوابيـر
لأنك لهـم والـد وحاكـم وإمامـا
ويبكن عليك المترفـات الغناديـر
وليـا بكنـك ماعليـهـن مـلامـا
يا أمير يامقدم زحـول المناعيـر
لا طار ستـر مرودعـات الوشامـا
حققت بالحكمه ملاحـم وأساطيـر
ويامـا تعديـت الأساطيـر يـامـا
يابواليتاما من رحيلك وش يصيـر
أكيـد كـل الشعـب عقبـك يتامـا
وإن مارثيتك عن بني عمي مطيـر
إني ماعاد أرثـي علـي الحرامـا
مرحوم يافرز الوغى جابر الخيـر
عليـك مـن دار السـلام السلامـا
رد مع اقتباس
