السلام عليكم ... الأعضاء الأكارم ..... الزوار الأحباب ....
شلونكم اليوم ... عساكم طيبين .... ياعساكم دوم ......
الحقيقة ان هذا أول موضوع لي .. في هالمنتدى الطيب ...
وكانت اول مشاركة لي قبل كم ساعة ... في موضوع للأخت maria عن الصمت .....
أقول الحقيقة ... ان هالموضوع أثار عندي .. بعض الأفكار ... ذكرت بعضهافي تلك المشاركة ..... والبعض الاخر ودي أطرحه هنيه ,,,,
لكن اللي أبي أطرحه ... هنيه .... هو الكلام وليس الصمت .....
وفي رأي ان هذين النعمتين ... بينهما ترابط قوي ....
لأني أزعم ان اللي عنده طول بال في الأستماع للأخرين ... عنده الأحساس بنعمة الكلام ......
نعمة الكلام .......
يمكن القليل منا .. اللي تساءل بينه وبين نفسه .... اشمعنى الانسان .. يعتبر الكائن الوحيد اللي يتكلم بصوت واضح وبطريقة منظمة وجميلة .. وكلامه يدل على معاني ....
أقول يمكن القليل منا اللي سأل نفسه هالسؤال .....
كلنا يمكن .. نشعر بنعمة الكلام ...
لكن.. للأسف .. مو كلنا اللي معطي هالنعمة حقها ....
ايش أقصد بهالكلام .....؟
ج: احنا بكل بساطة .. محاطين بأهلنا وأصدقائنا ... وناس حوالينا ....
وبحكم طبيعتنا كبشر ... نحتاج للتفاهم مع بعض ..أو نحتاج نعبر عن همومنا وأحاسيسنا..أو نحب نوصل معلومة معينة او ناخذ معلومة ...أقول هذا التفاهم وهذا التعبير.. غالبا ما يتم عن طريق نعمة ..أنعمها علينا العلي القدير .. وهي نعمة الكلام ...
الكثير منا -وهم للأسف- ماعنده طول بال في أستخدام هذه النعمة ....
شلون ....؟
ج:
يعني تلقى بعضنا يجاوب أهله .. أو يتحدث معهم بطريقة مختصرة للغاية ... مما يبعث فيهم الضجر أو الظن بأنا ما ودنا في الكلام معهم ... وهذا لاشك له انعكاساته على الأسرة ..... أو خل نقول على الأقل مايقوي العلاقة بينهم ... والسبب عدم حسن الكلام .. أو عدم استخدامه الأستخدام الأمثل ..
وتلقى واحد .. يمكن اول مرة تواجهه ... أو يا دوب تعرفه بالأسم ...وصار بينكم كلام ... تشعر انه تفوه بكلمات شوي جافه ... يعني ممكن تقبل هالكلمات من صديق قد عرفته من أعوام ... مو من واحد يادوب توك قاعد وياه ....
وهذا يحصل كثيرا في الدواوين ... خصوصا لما يصير نقاش حول موضوع يعتبر مهم للجميع ....
أقول هذا النوع ما أستطاع ..أن يقدر نعمة الكلام .... ليش؟
لأنه في مقدورنا ان نختار الفاظ غير جافة ... ومقبولة عند الجميع ...لكن هالأخ أبى الا استخدام تلك الالفاظ اللي مو خوش ....
في نظري أخونا هذا .. مايشعر بنعمة الكلام ....هم ليش؟
لأني أزعم ان الواحد اذا ماكسب اللي حواليه بكلامه ... فانه قطعا ما أحسن استخدام هالنعمة العظيمة ... لأنها وسيلة لكسب الأخرين مو خسارتهم ..
مثال ثالث ... أنت رايح مراجعة ..في أي وزارة مثلا.. تواجه الموظف المختص وتتكلم معاه بحكم مسؤوليته ... تجد معظم الموظفين الا من رحم الله .. منفس وماله خلق يكلمك ... وكأنه يتصدق عليك لما يجاوبك ... مع العلم ان هذي طبيعة عمله .... ياخي خل نفرض انك سألته عن شي مو من أختصاصه .. يفترض يكون جوابه بكل ود ومحبه ويوجهك على الشخص المختص ...
أقول هذا الموظف (اللي ممكن يكون أي أحد فينا) ما شعر بنعمة الكلام ...
ماشي ......... ماشي .....
طيب الان ماهو النموذج اللي أدعو له ... اقصد اللي اعتقد انه صح ....واللي في نظري قدر هذه النعمة العظيمة نعمة الكلام ...أقول النموذج الصحيح في بالي هو:
ذلك الشخص .. اللي يكون كلامه سهل وواضح ومفهوم للجميع ...وينتقي ألفاظه (كماينتقي أطايب الثمر) ... واذا ما سأل .. أجاب باسهاب لايمل ..أو اختصار لا يخل .... حتى يعلم السائل انه مهتم في سؤاله .. وهذا يدل على انه مهتم في شخص السائل ..
واذا ما طلب رأيه ... تكلم بتواضع قاصدا نفع الطالب لرأيه ....
كلامه مليء بالحجج والبراهين ... مقنع ... يدخل القلب ... لأن عليه نور وضياء.......
فيكون بذلك نعم الزوج لزوجته (او الزوجه لزوجها)
ونعم الصديق لصديقه....
ونعم القريب لقريبه .....
ويكون قد شكر نعمة الكلام العظيمة ....
مادري .. بس يمكن فيه شغلات ما قدرت أوصلها لكم.. بس صدقوني اني حاس فيها ... وياليت تكونون حاسين فيها انتم بعد .....
عموما ... بس أحب أضيف أضافة أخيرة ...
وهي ان حسن الكلام ... مرتبط علاقة وثيقة بحسن الخلق ....
يعني العلاقة بينهم طردية ... فكلما حسنت أخلاق الانسان حسن كلامه والعكس صحيح ,,,
اللهم أرزقنا حسن الكلام ... وارزقنا شكر هالنعمة ......
رد مع اقتباس
