قصيدة للشاعر فلاح مبرد الحميداني المطيري
يصف بها بعض الامور الدقيقه ويذكر فيها من يسحتق المدح ومن لايستحق المدح
يالقرم انا ماني على خف و جناح
خذ من كلامي للمفاهيم تصحيح
مانيب من يمشي ورى كل ضحضاح
ولا اقضب يد القاصر لو اقوم واطيح
لاتحسبنّي مثل شعّار الأفراح
اللي لهم وسط المحافل مطابيح
اللي يبي ما لاح ويجيب ما لاح
تلقى لعرفه في حصيله مناضيح
ماهاب من نقّادة الشعر لمّاح
ولا استشار العارفين النواصيح
له في سبيل المدح روحه و مسراح
عنده مقام الشعر خضرة فلاليح
مايدري ان الشعر تاريخ و سلاح
وشهادةٍ لمحققين المطاميح
اسمع كلامي وافهم العلم ياصاح
الطيب لقفول المعاني مفاتيح
لاتمدح الا مستحقّين الأمداح
اهل المواقف بالليال الشلافيح
عليك باللي كنّه السيف ابو لاح
لاجرّده بوجيه ربعٍ زحازيح
قرمٍ شجاع و ناهمه واحدٍ صاح
من الغضب يضربّه الراس ويطيح
النادر اللي للمواجيب نطّاح
سلايل اللي يبعدون المشاويح
للطيبين بكفّة الوزن مرجاح
تلقى الوفاء عند الوجيه المفاليح
عرف الرجال الطيّبين من الارباح
اليا اظلمت دنياك مثل المصابيح
ولا يفقد الا راعي الطيب لا راح
ساعة فراقه تجرح القلب تجريح
ولا الردي همٍ عن القلب ينزاح
يروح وعلومه رمادٍ مع الريح
